|    Sep 21 Fri, 2018 11:17 am
FLASH NEWS

സഹകരണ മേഖലയില്‍ വേറിട്ട സാന്നിധ്യമായി ഗുരുവായൂര്‍ കോ-ഓപറേറ്റീവ് അര്‍ബന്‍ ബാങ്ക്

Published : 19th April 2018 | Posted By: kasim kzm

ഗുരുവായൂര്‍: വളര്‍ച്ചയുടെ പടവുകള്‍താണ്ടി സഹകരണമേഖലയില്‍ വേറിട്ട ശബ്ദമായി മാറിയ ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്ക്.  1995-ശേഷം ആദ്യമായി ഓഹരി ഉടമകള്‍ക്ക് ഡിവിഡണ്ട് തുക അക്ഷയ തൃതീയ ദിനമായ ഇന്നലെ മുതല്‍ നല്‍കുവാന്‍ തീരുമാനിച്ചതായി ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്ക് ചെയര്‍മാന്‍ വി വേണുഗോപാല്‍ വാര്‍ത്താസമ്മേളനത്തില്‍ അറിയിച്ചു.
തുടക്കത്തില്‍ ലാഭത്തിലായിരുന്ന ബാങ്ക്, 1998-മുതല്‍ നഷ്ടത്തിലായതിനെതുടര്‍ന്ന് ബാങ്ക് ലൈസന്‍സ് റിസര്‍വ്വ് ബാങ്ക് റദ്ദാക്കുന്ന അവസ്ഥയി ല്‍ നിന്നും ഭരണസമിതിയുടേയും ജീവനക്കാരുടേയും കഠിന പ്രയത്‌നംകൊണ്ടും സഹകാരികളുടെ ആത്മാര്‍ത്ഥമായ സഹകരണംകൊണ്ടും നിക്ഷേപ വായ്പാരംഗത്ത് വന്‍ നേട്ടം കൈവരിക്കാനായി. 2012-മുതല്‍ തനതുകാലങ്ങളില്‍ ലാഭവും 2015-മുതല്‍ അറ്റലാഭവുമായി പ്രവര്‍ത്തന ലാഭത്തില്‍ വന്നതിനെതുടര്‍ന്ന് റിസര്‍വ്വ് ബാങ്ക് ഡെപ്യുട്ടി മാനേജര്‍, അര്‍ബ്ബന്‍ ബാങ്കിലെ ഡയറക്ടര്‍മാരേയും ജീവനക്കാരേയും അഭിനന്ദിച്ചതിനോടൊപ്പം ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്ക്, മറ്റ് അര്‍ബ്ബന്‍ ബാങ്കുകള്‍ക്ക് മാതൃകയാണെന്നും അഭിപ്രായപ്പെട്ടത് റിസര്‍വ്വ് ബാങ്ക്, ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്കിന് ചാര്‍ത്തി നല്‍കിയ സുവര്‍ണ്ണമുദ്രയാണെന്ന് ചെയര്‍മാന്‍ അവകാശപ്പെട്ടു. ഒപ്പംതന്നെ 2020-ല്‍ നൂറുവര്‍ഷം പിന്നിടുന്ന ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്ക്, ഇതരബാങ്കുകളോടൊപ്പം കിടപിടിക്കാന്‍ സാധിച്ചതായും ചെയര്‍മാന്‍ അവകാശപ്പെട്ടു.
2017-18 സാമ്പത്തിക വര്‍ഷം ഓഹരിമൂലധനം 6.03-കോടിയും നിക്ഷേപം 221.72 കോടിയും വായ്പ 154.81കോടിയും ഗോള്‍ഡ് ലോണ്‍ 40.21കോടിയായും വര്‍ദ്ധിപ്പിച്ചു. വ്യക്തികള്‍ക്ക് വായ്പയായി ഒരുകോടിയും കൂട്ടായ സംരഭത്തിന് 2-കോടിരൂപയും നല്‍കി വരുന്നു. കക്ഷിരാഷ്ട്രീയത്തിനതീതമായി വായ്പ നല്‍കുന്നതുകൊണ്ട് നിരവധി സഹകാരികള്‍ ബാങ്കിനെ ആശ്രയിച്ചുവരുന്നതായും ബാങ്കിന്റെ ഇപ്പോഴത്തെ എന്‍പിഎ 2.57-ശതമാനമാണെന്നും ചെയര്‍മാന്‍ അറിയിച്ചു. 2009-വരെ നഷ്ടത്തില്‍വന്ന ബാങ്ക്, 2010-മുതല്‍ ലാഭത്തില്‍ വരികയും 2017-18 സാമ്പത്തിക വര്‍ഷത്തില്‍ നീക്കിയിരിപ്പിന് ശേഷം ഒരുകോടിയോളംരൂപ ലാഭത്തിലെത്തിക്കാന്‍ കഴിഞ്ഞത് സഹകാരികളുടെ നിര്‍ലോഭമായ സഹകരണമാണ്. ഇപ്പോള്‍ 9-ശാഖകളുള്ള ബാങ്കിന് പുതിയ മൂന്ന് ശാഖകള്‍ ഇക്കൊല്ലം തന്നെ ആരംഭിക്കും.
ബാങ്ക് നിയമനവുമായി ബന്ധപ്പെട്ട കോഴ വിവാദം ഈ ബാങ്കിനെ തകര്‍ക്കാന്‍ ചില തല്‍പരകക്ഷികള്‍ നടത്തുന്ന ഗൂഢതന്ത്രമാണ്. നിയമനങ്ങള്‍ തികച്ചും നിയമാനുസൃതവും സുതാര്യവുമായിരുന്നു. ഇന്റര്‍വ്യൂകളിലും പരീക്ഷകളിലും ഉദ്യോഗാര്‍ത്ഥികള്‍ക്ക് പരീക്ഷാ ഏജന്‍സിയാണ് മാര്‍ക്കിടുന്നത്. 20-ശതമാനം മാത്രമാണ് ബോര്‍ഡിന്റെ അധികാരപരിധി. മറുപടി അര്‍ഹിക്കാത്ത വിലകുറഞ്ഞ ആരോപണങ്ങള്‍ ഉന്നയിക്കുന്നവരോട് ബാങ്ക് ഡയറക്ടര്‍ ബോര്‍ഡ് പ്രതികരിക്കുന്നില്ലെന്നും പ്രശസ്തിയുടെ അത്യുന്നതിയില്‍ നില്‍ക്കുന്ന ഗുരുവായൂര്‍ കോ:ഓപ്പറേറ്റീവ് അര്‍ബ്ബന്‍ ബാങ്കിനെ കരിവാരിതേക്കാന്‍ ശ്രമിക്കുന്നവരുടെ കുപ്രചരണങ്ങളില്‍ സഹകാരികള്‍ വഴുതിവീഴരുതെന്നും ചെയര്‍മാന്‍ അഭ്യര്‍ത്ഥിച്ചു. വാര്‍ത്താസമ്മേളനത്തില്‍ ബാങ്ക് ജനറല്‍ മാനേജര്‍ യു ശ്രീനാരായണന്‍, ഡയറക്ടര്‍ ബോര്‍ഡ് അംഗങ്ങളായ ആന്റോതോമസ്, കെ പി ഉദയന്‍, അരവിന്ദന്‍ പല്ലത്ത്, കെ ഡി വീരമണി, ലൈലാമജീദ്, കെ ഐ വാസു, എം എസ് ശിവദാസ് പങ്കെടുത്തു.

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss