|    Jul 26 Wed, 2017 10:31 am
FLASH NEWS

സഹകരണ ബാങ്ക് വഴി ക്ഷേമ പെന്‍ഷന്‍ വീടുകളില്‍; പരീക്ഷണ പദ്ധതിക്ക് തുടക്കം

Published : 20th August 2016 | Posted By: SMR

കൊല്ലം: സഹകരണ ബാങ്കുകള്‍ വഴി ക്ഷേമപെന്‍ഷനുകള്‍ വീടുകളിലെത്തിക്കുന്ന പദ്ധതിക്ക് കൊല്ലത്ത് തുടക്കമായി. സംസ്ഥാനത്ത് മയ്യനാടു പഞ്ചായത്തിലാണ് പൈലറ്റ് പ്രോജക്ട് നടപ്പാക്കുന്നത്. പഞ്ചായത്തിലെ മയ്യനാട് റീജ്യനല്‍ സഹകരണ ബാങ്ക്, ഉമയനല്ലൂര്‍ സര്‍വീസ് സഹകരണ ബാങ്ക്, കൂട്ടിക്കട സഹകരണബാങ്ക് എന്നിവ വഴിയാണ് വിതരണം ചെയ്യുന്നത്.
എം നൗഷാദ് എംഎല്‍എയുടെ നേതൃത്വത്തില്‍ മയ്യനാട് സ്വദേശി വാസുദേവന്‍പിള്ളക്കും ഭാര്യക്കുമായി കുടിശ്ശിക പെന്‍ഷനായി 27,000 രൂപ നല്‍കി പദ്ധതിക്ക് തുടക്കം കുറിച്ചു. പഞ്ചായത്തിലെ 23 വാര്‍ഡുകളിലെ അയ്യായിരത്തോളം ഗുണഭോക്താക്കള്‍ക്കു വീടുകളില്‍ പെന്‍ഷന്‍ ലഭിക്കും.
പെന്‍ഷന്‍ ലഭിക്കാന്‍ ആധാര്‍ കാര്‍ഡ് നിര്‍ബന്ധമാക്കി ധനവകുപ്പ് ഉത്തരവിറക്കിയിരുന്നു. ആധാര്‍ കാര്‍ഡ് നിര്‍ബന്ധമാക്കിയതോടെ ഒരാള്‍ക്ക് 1000 രൂപയുടെ ഒരു ക്ഷേമപെന്‍ഷന് മാത്രമേ അര്‍ഹതയുണ്ടാവുകയുള്ളൂ.
നിലവില്‍ പലരും ഒന്നിലേറെ ക്ഷേമ പെന്‍ഷനുകള്‍ വാങ്ങുന്നുണ്ട്. ഒരാള്‍ ഒന്നിലധികം ക്ഷേമ പെന്‍ഷന്‍ വാങ്ങുന്നത് തടയുകയാണ് പദ്ധതിയിലൂടെ ലക്ഷ്യമിടുന്നത്. ഗുണഭോക്താക്കള്‍ക്ക് ക്ഷേമ പെന്‍ഷന്‍ സഹകരണ ബാങ്കുകള്‍ വഴി നേരിട്ടു വീട്ടിലെത്തിക്കാന്‍ കഴിഞ്ഞ മന്ത്രിസഭായോഗം തീരുമാനിച്ചിരുന്നു. ക്ഷേമ പെന്‍ഷനുകള്‍ ജൂണ്‍ മുതല്‍ 1000 രൂപയാക്കി ഉയര്‍ത്തിയിരുന്നു. എന്നാല്‍, കൈപ്പറ്റുന്നവരുടെ വിവരങ്ങള്‍ ക്രോഡീകരിച്ചിരുന്നില്ല. ഈ വിവരങ്ങള്‍ ക്രോഡീകരിക്കുന്നതിനായി ഇന്‍ഫര്‍മേഷന്‍ കേരള മിഷനെ ചുമതലപ്പെടുത്തി. വിവരശേഖരണം പൂര്‍ത്തിയായാല്‍ ഒന്നിലധികം പെന്‍ഷന്‍ വാങ്ങുന്നതു കണ്ടെത്തി തടയാന്‍ കഴിയും. സഹകരണ ബാങ്കുകളും പ്രാഥമിക സഹകരണ സംഘങ്ങളും വഴിയാണു പെന്‍ഷന്‍ വീടുകളില്‍ എത്തിക്കുന്നത്. കുടുംബശ്രീ വഴി സര്‍വേ നടത്തിയപ്പോള്‍ 70 ശതമാനം ഗുണഭോക്താക്കളും ക്ഷേമ പെന്‍ഷനുകള്‍ വീടുകളില്‍ എത്തിക്കാന്‍ നടപടി സ്വീകരിക്കണമെന്ന നിര്‍ദ്ദേശമാണ് ഉന്നയിച്ചത്. ഇതിന്റെ അടിസ്ഥാനത്തില്‍ ക്ഷേമ പെന്‍ഷന് അര്‍ഹതയുള്ളവരില്‍ 70 ശമാനം പേര്‍ക്കും സഹകരണ ബാങ്കുകള്‍ പെന്‍ഷന്‍ വീട്ടിലെത്തിക്കും. മറ്റുള്ളവര്‍ക്കു നിലവിലുള്ളതുപോലെ ബാങ്ക് അക്കൗണ്ട് വഴി പെന്‍ഷന്‍ വിതരണം ചെയ്യും. നേരത്തേ പോസ്റ്റ് ഓഫിസ് വഴിയായിരുന്നു പെന്‍ഷന്‍ വിതരണം. എന്നാല്‍, ഇതുമൂലം പെന്‍ഷന്‍ ലഭിക്കാന്‍ മാസങ്ങള്‍ വേണ്ടിവന്നതായി പരാതി ഉയര്‍ന്നിരുന്നു. ഇതേത്തുടര്‍ന്നാണു പോസ്റ്റ് ഓഫിസിനെ ഒഴിവാക്കിയത്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക