|    Apr 23 Mon, 2018 7:26 pm
FLASH NEWS

സംസ്ഥാനത്തെ മുഴുവന്‍ പ്രാഥമികാരോഗ്യ കേന്ദ്രങ്ങളെയും കുടുംബാരോഗ്യകേന്ദ്രങ്ങളാക്കും: ആരോഗ്യ മന്ത്രി

Published : 18th March 2018 | Posted By: kasim kzm

പാലക്കാട്: സംസ്ഥാനത്തെ മുഴുവന്‍ പ്രാഥമികാരോഗ്യ കേന്ദ്രങ്ങളെയും കുടുംബാരോഗ്യ കേന്ദ്രങ്ങളാക്കി മാറ്റുമെന്ന് ആരോഗ്യമന്ത്രി കെ കെ ശൈലജ.  ശ്രീകൃഷ്ണപുരം കുടുംബാരോഗ്യ കേന്ദ്രവും ആയുര്‍വേദ ഡിസ്‌പെന്‍സറിയും അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ പ്രഖ്യാപനം നിര്‍വഹിക്കുകയായിരുന്നു മന്ത്രി. ഒരു കുടുംബത്തിലെ മുഴുവന്‍ പേരുടെയും വിവരങ്ങള്‍ കുടുംബാരോഗ്യകേന്ദ്രത്തില്‍ രജിസ്റ്റര്‍ ചെയ്യും.
ഇതുവഴി കുടുംബ ഡോക്ടര്‍ സംവിധാനം വളര്‍ത്തിയെടുക്കും. പരിപാടിയോടനുബന്ധിച്ച് ഗ്രാമപ്പഞ്ചായത്ത്- കുടുംബശ്രീ എന്നിവയുടെ വിവിധ ക്ഷേമ വികസന പ്രവര്‍ത്തനങ്ങളുടെ ഉദ്ഘാടനവും മന്ത്രി നിര്‍വഹിച്ചു. ജില്ലയില്‍ ആദ്യമായാണ് രണ്ട് സര്‍ക്കാര്‍ ആശുപത്രികള്‍ അന്താരാഷ്ട്ര നിലവാരത്തിലേക്കുയരുന്നത്. മൂന്ന് ഡോക്ടര്‍മാരെ ഉള്‍പ്പെടുത്തി വൈകിട്ട് ആറുവരെയുളള ചികില്‍സാ സൗകര്യം ഇതുവഴി ലഭിക്കും.
പി ഉണ്ണി എംഎല്‍എ അധ്യക്ഷനായ പരിപാടിയില്‍ കുടുംബശ്രീയുടെ സൗജന്യ ഉച്ചഭക്ഷണ പരിപാടി “സുഭിക്ഷ”യുടെ സഹായധനം ബ്ലോക്ക് പഞ്ചായത്ത് പ്രസിഡന്റ് പി അരവിന്ദാക്ഷന്‍ ഏറ്റുവാങ്ങി. ആരോഗ്യ പ്രവര്‍ത്തനങ്ങള്‍ക്ക് പിന്തുണ നല്‍കുന്നവരെ ജില്ലാ മെഡിക്കല്‍ ഓഫിസര്‍ ഡോ. കെ പി റീത്ത ആദരിച്ചു.
കുടുംബശ്രീയുടെ ഗ്രാന്റ് വിതരണം ജില്ലാ പഞ്ചായത്ത് അംഗം എം കെ ദേവി നിര്‍വഹിച്ചു. ശ്രീകൃഷ്ണപുരം ഗ്രാമപ്പഞ്ചായത്ത് പ്രസിഡന്റ് അഡ്വ. സി എന്‍ ഷാജു ശങ്കര്‍, ജനപ്രതിനിധികള്‍, രാഷ്ട്രീയപാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Dont Miss