|    Dec 15 Fri, 2017 6:24 am
FLASH NEWS
Home   >  Todays Paper  >  Page 4  >  

വിജിലന്‍സ് കേസ്: സിഡ്‌കോ മുന്‍ എംഡി സജി ബഷീറിനെതിരേ നടപടി

Published : 8th December 2017 | Posted By: kasim kzm

തിരുവനന്തപുരം: അനവധി വിജിലന്‍സ് കേസുകളില്‍ പ്രതിയായ സിഡ്‌കോ മുന്‍ എംഡി സജി ബഷീറിനെതിരേ നടപടിയുമായി സര്‍ക്കാര്‍. ഒരു പൊതുമേഖലാ സ്ഥാപനത്തിലും അദ്ദേഹത്തിന് നിയമനം നല്‍കില്ലെന്ന് വ്യവസായ വകുപ്പ് ഉത്തരവിറക്കി. സജി ബഷീര്‍ ഹൈക്കോടതിയെ തെറ്റിദ്ധരിപ്പിക്കാന്‍ ശ്രമിച്ചതായും വ്യവസായ വകുപ്പ് സെക്രട്ടറി പറയുന്നു. കോടികളുടെ ക്രമക്കേടുകളില്‍ പ്രതിയായ സജി ബഷീറിനെ എല്‍ഡിഎഫ് സര്‍ക്കാര്‍ അധികാരത്തില്‍ വന്നശേഷം കേരള സ്‌റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസിന്റെ എംഡി സ്ഥാനത്തു നിന്നു മാറ്റിയിരുന്നു. സര്‍ക്കാര്‍ വീണ്ടും നിയമനം നല്‍കാത്തത് ചോദ്യംചെയ്താണ് സജി ബഷീര്‍ ഹൈക്കോടതിയെ സമീപിച്ചത്. സിഡ്‌കോയുടെ സ്ഥിരം എംഡിയായി തന്നെ സര്‍ക്കാര്‍ നിയമിച്ചിട്ടുണ്ടെന്നായിരുന്നു അദ്ദേഹം കോടതിയെ അറിയിച്ചത്. തുടര്‍ന്ന് നിയമനം നല്‍കുന്ന കാര്യം പരിശോധിക്കാന്‍ സര്‍ക്കാരിനോട് ഹൈക്കോടതി നിര്‍ദേശിച്ചതിന്റെ പശ്ചാത്തലത്തിലാണ് സജി ബഷീറിനെ പൂര്‍ണമായും തള്ളി വ്യവസായ സെക്രട്ടറി ഉത്തരവിറക്കിയത്. സിആപ്റ്റ് എന്ന സ്ഥാപനത്തില്‍ ജോലി ചെയ്തിരുന്ന സജി ബഷീറിനെ സര്‍ക്കാര്‍ നേരത്തേ പിരിച്ചുവിട്ടതാണ്. ഇക്കാര്യം സജി ബഷീര്‍ കോടതിയെ അറിയിച്ചിട്ടില്ല. മുന്‍ സര്‍ക്കാര്‍ സിഡ്‌കോയില്‍ നിന്നു സജി ബഷീറിനെ കേരള ഇന്‍ഡസ്ട്രിയല്‍ എന്റര്‍പ്രൈസസിലേക്കു മാറ്റിയിരുന്നു. അന്നു സ്ഥലംമാറ്റത്തെ ചോദ്യംചെയ്യാത്തതിനാല്‍ സിഡ്‌കോയുടെ സ്ഥിരം എംഡിയെന്ന വാദം നിലനില്‍ക്കില്ലെന്നും വ്യവസായ സെക്രട്ടറിയുടെ ഉത്തരവില്‍ വ്യക്തമാക്കുന്നു.

വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക