|    May 21 Mon, 2018 1:00 pm
FLASH NEWS

വനഭൂമി വിട്ടുനല്‍കാന്‍ കേന്ദ്ര അനുമതിയായെന്ന് മന്ത്രി

Published : 21st April 2018 | Posted By: kasim kzm

തിരുവനന്തപുരം:  കോഴിക്കോട് ജില്ലയിലെ താമരശ്ശേരി ചുരത്തിലെ 3, 5, 6, 7, 8 വളവുകള്‍ വീതി കൂട്ടുന്നതിന് ആവശ്യമായി വരുന്ന 0.91968 ഹെക്ടര്‍ വനഭൂമി  വിട്ടു നല്‍കുന്നതിന് സമ്മതമറിയിച്ചുകൊണ്ടുള്ള കേന്ദ്ര വനം-പരിസ്ഥിതി മന്ത്രാലയത്തിന്റെ അറിയിപ്പ് അഡീഷണല്‍ ചീഫ് സെക്രട്ടറിക്ക് ലഭിച്ചതായി മന്ത്രി ജി സുധാകരന്‍ അറിയിച്ചു.
ദേശീയപാത 212-ല്‍ വരുന്ന താമരശ്ശേരി ചുരം വയനാട് ജില്ലയിലേക്കുള്ള പ്രധാന റോഡാണ്. പ്രസ്തുത ചുരത്തിലുളള 9 മുടിപ്പിന്‍ വളവുകളില്‍ 2, 4, 9 വളവുകള്‍ നേരത്തെ വീതി കൂട്ടി ഇന്റര്‍ലോക്ക് ചെയ്തതാണ്. ഈ സര്‍ക്കാര്‍ അധികാരത്തില്‍ വന്നതിനുശേഷം ബാക്കി 5 വളവുകള്‍ വീതി കൂട്ടുന്നതിന് വനംഭൂമി വേണ്ടി വരികയും, അതിനാവശ്യമായ 32,05,099 രൂപ വനംമന്ത്രാലത്തിനു രണ്ടു തവണകളായി നല്‍കുകയും ചെയ്തിരുന്നു.
വനം മന്ത്രാലയം ചില സാങ്കേതിക പ്രശ്‌നങ്ങള്‍ തടസ്സമായി ഉന്നയിച്ചതിന്റെ ഭാഗമായി അനുമതി ലഭിക്കാതെയിരിക്കുകയായിരുന്നു. ഈ ഘട്ടത്തില്‍ പൊതുമരാമത്തുമന്ത്രിയും, വകുപ്പ് സെക്രട്ടറി കമലവര്‍ദ്ധന റാവുവും ഡല്‍ഹിയില്‍ കേന്ദ്ര വനം പരിസ്ഥിതി സെക്രട്ടറി സി കെ മിശ്രയുമായി ചര്‍ച്ച നടത്തിയിരുന്നു. അദ്ദേഹത്തിന്റെ ഇടപെടലിന്റെ കൂടി ഭാഗമായിട്ടാണ് ഇപ്പോള്‍ അനുമതി ലഭിച്ചിട്ടുളളതെന്നും മന്ത്രി അറിയിച്ചു.
ദേശീയപാത 212-ലെ കുന്ദമംഗലം മുതല്‍ ലക്കിടി വരെയുള്ള 42 കിലോമീറ്ററില്‍ നിലവില്‍ നടന്നുകൊണ്ടിരിക്കുന്ന 17 കോടി രൂപയുടെ റോഡ് സുരക്ഷാ പ്രവൃത്തിയില്‍ 3, 5 വളവുകളിലെ വീതി കൂട്ടി വികസിപ്പിക്കുന്നതും ഉള്‍പ്പെടുന്നുണ്ട്.
കേന്ദ്രാനുമതിയുടെ അടിസ്ഥാനത്തില്‍ ഈ പ്രവൃത്തി ഉടന്‍ പൂര്‍ത്തീകരിക്കാന്‍ നടപടി സ്വീകരിച്ചതായും ബാക്കി വരുന്ന 6, 7, 8 വളവുകളില്‍ വീതി കൂട്ടുന്ന പ്രവൃത്തിക്ക് ഫണ്ട് അനുവദിക്കുന്നതിന് കേന്ദ്ര ഉപരിതല ഗതാഗത മന്ത്രാലയത്തോട് ആവശ്യപ്പെടുമെന്നും മന്ത്രി ജി സുധാകരന്‍ അറിയിച്ചു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss