|    Oct 15 Mon, 2018 10:08 pm
FLASH NEWS
Home   >  Todays Paper  >  Page 1  >  

റഷ്യയുമായുള്ള മിസൈല്‍ കരാറിലും റിലയന്‍സ്

Published : 7th October 2018 | Posted By: kasim kzm

ന്യൂഡല്‍ഹി: റഫേല്‍ കരാറിനു പിന്നാലെ കഴിഞ്ഞ ദിവസം ഒപ്പിട്ട 5.43 ബില്യണ്‍ ഡോളറിന്റെ ഇന്ത്യ-റഷ്യ പ്രതിരോധ കരാറിലും പങ്കാളിയായി റിലയന്‍സ്. വഌദിമിര്‍ പുടിന്റെ ഇന്ത്യാ സന്ദര്‍ശനത്തിനിടെയാണ് ഇന്ത്യ റഷ്യയില്‍ നിന്ന് 39,000 കോടിയോളം രൂപ വരുന്ന അഞ്ച് എസ്-400 ട്രയംഫ് മിസൈല്‍ പ്രതിരോധ സംവിധാനം വാങ്ങുന്നതുമായി ബന്ധപ്പെട്ട കരാര്‍ ഒപ്പുവച്ചത്. ഇതിലാണ് റിലയന്‍സിനെ പങ്കാളിയായി ഉള്‍പ്പെടുത്തിയിരിക്കുന്നത്.
ഇതിനായി 2015ല്‍ തന്നെ എസ്-400 ട്രയംഫ് നിര്‍മിക്കുന്ന റഷ്യന്‍ പൊതുമേഖലാ കമ്പനിയായ അല്‍മാസ്-ആന്റേയുമായി റിലയന്‍സ് നിര്‍മാണത്തിനും അറ്റകുറ്റപ്പണിക്കുമായുള്ള പങ്കാളിയായി കരാറൊപ്പിട്ടിട്ടുണ്ട്. മോദിയുടെ റഷ്യന്‍ സന്ദര്‍ശനത്തിനിടെയാണ് ഈ കരാറും നടന്നിരിക്കുന്നത്. 600 കോടി ഡോളറിന്റെ കരാറാണ് റിലയന്‍സും അല്‍മാസ്-ആന്റേയുമായുള്ളത്.
റഫേല്‍ കരാറില്‍ പൊതുമേഖലാ കമ്പനിയായ എച്ച്എഎല്ലിനെ ഒഴിവാക്കി റിലയന്‍സിനെ പങ്കാളിയാക്കിയത് വിവാദമായ പശ്ചാത്തലത്തിലാണ് ഇക്കാര്യം ഉയര്‍ന്നുവന്നിരിക്കുന്നത്. എന്നാല്‍, കഴിഞ്ഞ ദിവസം സര്‍ക്കാര്‍ പുറത്തുവിട്ട കരാറിന്റെ വിശദാംശങ്ങളില്‍ റിലയന്‍സിന്റെ പങ്കാളിത്തത്തെക്കുറിച്ച് മിണ്ടിയിരുന്നില്ല. എന്നാല്‍, അന്ന് റിലയന്‍സ് പുറത്തിറക്കിയ വാര്‍ത്താക്കുറിപ്പില്‍ അല്‍മാസ്-ആന്റേയുമായി ഉണ്ടാക്കിയ കരാറിനെക്കുറിച്ച് പറയുന്നുണ്ട്.
എസ്-400 ട്രയംഫ് മിസൈല്‍ വാങ്ങുന്നതുമായി ബന്ധപ്പെട്ട ചര്‍ച്ചകള്‍ ഇരുരാജ്യങ്ങളും തമ്മില്‍ കുറച്ചു വര്‍ഷമായി നടന്നുവരുകയായിരുന്നു. ഇതിനിടയിലാണ് റിലയന്‍സ് കരാര്‍ ഒപ്പിടുന്നത്. റഷ്യയുടെ അത്യാധുനിക വ്യോമപ്രതിരോധ മിസൈല്‍ സംവിധാനമായ എസ്-400 ട്രയംഫ് 2007 മുതല്‍ റഷ്യന്‍ സേനയുടെ ഭാഗമാണ്. ആക്രമണങ്ങളെ തടയാനും പ്രത്യാക്രമണത്തിനും ഇത് ഉപയോഗിക്കാം.

 

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss