|    Apr 25 Wed, 2018 4:42 am
FLASH NEWS
Home   >  Districts   >  

രാജ്യത്തെ മികച്ച പത്ത് പോലിസ് സ്റ്റേഷനുകളില്‍ വളപട്ടണവും

Published : 7th January 2018 | Posted By: Jesla

തിരുവനന്തപുരം: രാജ്യത്തെ മികച്ച പത്ത് പോലിസ് സ്റ്റേഷനുകളില്‍ ഒന്നായി കണ്ണൂരിലെ വളപട്ടണം പോലിസ് സ്റ്റേഷന്‍ തിരഞ്ഞെടുക്കപ്പെട്ടു. കേന്ദ്ര ആഭ്യന്തരമന്ത്രാലയത്തിന്റെ പരിശോധനയുടേയും പഠനത്തിന്റേയും അടിസ്ഥാനത്തിലാണ് ഈ തിരഞ്ഞെടുപ്പ്.

സ്റ്റേഷനില്‍ രജിസ്റ്റര്‍ ചെയ്ത കേസുകളുടെ എണ്ണം, കേസുകളുടെ അന്വേഷണം പൂര്‍ത്തിയാക്കുന്നതിലെ കാര്യക്ഷമത, ക്രമസമാധാനപരിപാലനത്തിലെ ജാഗ്രത,  പോലിസും ജനങ്ങളും തമ്മിലുള്ള ബന്ധം, ശുചിത്വം, വാറണ്ട് നടപ്പാക്കല്‍ തുടങ്ങി മുപ്പതോളം  മാനദണ്ഡങ്ങള്‍ പരിഗണിച്ചാണ് മികച്ച പോലിസ് സ്റ്റേഷനുകള്‍ തിരഞ്ഞെടുക്കുന്നത്. ഇത്തരം മാനദണ്ഡങ്ങള്‍ പരിഗണിച്ച്  പ്രാഥമിക പട്ടിക തയ്യാറാക്കിയശേഷം, ഇതിലുള്‍പ്പെട്ട സ്റ്റേഷനുകള്‍ കേന്ദ്ര ആഭ്യന്തരമന്ത്രാലയത്തിലെ ഉദ്യോഗസ്ഥര്‍ സന്ദര്‍ശിക്കുകയും പൊതുജനങ്ങളില്‍ നിന്നുള്‍പ്പെടെ അഭിപ്രായങ്ങള്‍ ശേഖരിച്ചും നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് മികച്ച സ്റ്റേഷനുകളെ തിരഞ്ഞെടുക്കുന്നത്.

1905 ലാണ് വളപട്ടണം പോലിസ് സ്റ്റേഷന്‍ സ്ഥാപിച്ചത്. ക്രിമിനല്‍ കേസുകള്‍ കൈകാര്യം  ചെയ്യുന്നതിലും ലഹരി വിരുദ്ധപ്രവര്‍ത്തനങ്ങള്‍ മികച്ച രീതിയില്‍ നടപ്പാക്കിയതും പോലിസുകാരുടെ ജനകീയ ഇടപെടലും വളപട്ടണം പോലിസ് സ്റ്റേഷന് ഈ നേട്ടം കൈവരിക്കുന്നതിന് സഹായകമായി.  കണ്ണൂര്‍ സബ്ഡിവിഷനിലെ വളപട്ടണം സ്റ്റേഷനിലെ എസ് എച്ച് ഒ ഉള്‍പ്പെടെ 53 പോലിസുകാരാണ് ഈ നേട്ടം കൈവരിക്കുന്നതില്‍ മുഖ്യപങ്ക് വഹിച്ചത്.     പോലിസ് സേനയ്ക്കാകെ അഭിമാനിക്കാവുന്ന നേട്ടം കൈവരിച്ച വളപട്ടണം പോലിസ് സ്റ്റേഷനിലെ ഉദ്യോഗസ്ഥരേ സംസ്ഥാന മുഖ്യമന്ത്രി പിണറായി വിജയനും സംസ്ഥാന പോലിസ് മേധാവി ലോക്‌നാഥ് ബെഹറയും അഭിനന്ദിച്ചു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Dont Miss