|    Mar 29 Wed, 2017 7:03 pm
FLASH NEWS

യൂറോപ ലീഗ് ഒന്നാംപാദ സെമി ഫൈനല്‍: ഇഞ്ചുറി ടൈമില്‍ ലിവര്‍പൂളിന് ‘ഇഞ്ചുറി’

Published : 30th April 2016 | Posted By: SMR

മാഡ്രിഡ്: യൂറോപ ലീഗ് ഫുട്‌ബോള്‍ ടൂര്‍ണമെന്റിന്റെ ഒന്നാംപാദ സെമി ഫൈനലില്‍ മുന്‍ ചാംപ്യന്‍മാരായ ലിവര്‍പൂളിന് അപ്രതീക്ഷിത തോല്‍വി. സ്പാനിഷ് ലീഗ് ടീമായ വിയ്യാറയലാണ് ഒന്നാംപാദത്തില്‍ ലിവര്‍പൂളിനെ ഞെട്ടിച്ചത്.
മല്‍സരത്തില്‍ എതിരില്ലാത്ത ഒരു ഗോളിനായിരുന്നു വിയ്യാറയലിന്റെ ജയം. ഇഞ്ചുറിടൈം ഗോളാണ് സീസണിലെ ഏക കിരീട പ്രതീക്ഷയായ യൂറോപ ലീഗിലെ ഒന്നാംപാദത്തില്‍ റെഡ്‌സിന് വില്ലനായത്. കളി തീരാന്‍ സെക്കന്‍ഡുകള്‍ മാത്രം ബാക്കിനില്‍ക്കേ അഡ്രിയാന്‍ ലോപസാണ് വിയ്യാറയലിന്റെ വിജയഗോള്‍ നേടിയത്.
മല്‍സരത്തില്‍ ഒപ്പത്തിനൊപ്പം നില്‍ക്കുന്ന പ്രകടനം കാഴ്ചവച്ചതിനു ശേഷമാണ് ലിവര്‍പൂള്‍ ഒരടി പിന്നിലേക്ക് പോയത്. മറ്റൊരു സെമി ഫൈനലില്‍ നിലവിലെ ചാംപ്യന്‍മാരായ സെവിയ്യയെ 2-2ന് ഉക്രെയ്ന്‍ ക്ലബ്ബായ ഷക്തര്‍ ഡൊണെസ്‌ക് 2-2ന് സമനിലയില്‍ തളച്ചു.
തോല്‍വിയോടെ ഹോംഗ്രൗണ്ടില്‍ നടക്കുന്ന രണ്ടാംപാദ സെമി ഫൈനല്‍ ലിവര്‍പൂളിന് ജീവന്‍മരണ പോരാട്ടമായി മാറി. അടുത്ത മാസം അഞ്ചിനാണ് ടൂര്‍ണമെന്റിന്റെ രണ്ടാം പാദ സെമി ഫൈനല്‍ മല്‍സരങ്ങള്‍ അരങ്ങേറുന്നത്.
എന്നാല്‍, മികച്ച പോരാട്ടത്തിനു ശേഷമാണ് സ്പാനിഷ് ടീമായ സെവിയ്യയെ ഷക്തര്‍ സമനിലയില്‍ പിടിച്ചുക്കെട്ടിയത്. സെവിയ്യക്കു വേണ്ടി വിറ്റോലോ (ആറാം മിനിറ്റ്), കെവിന്‍ ഗമെയ്‌റോ (82) എന്നിവര്‍ ലക്ഷ്യം കണ്ടു. മാര്‍ലോസ് (23ാം മിനിറ്റ്), ടറാസ് സ്റ്റിപാനെന്‍കോ (36) എന്നിവരാണ് ഷക്തറിന്റെ സ്‌കോറര്‍മാര്‍.
മല്‍സരം സമനിലയില്‍ കലാശിച്ചെങ്കിലും ഹോംഗ്രൗണ്ടില്‍ നടക്കാനിരിക്കുന്ന രണ്ടാംപാദ സെമി ഫൈനലില്‍ ഗോള്‍രഹിത സമനില നേടിയാലും എവേ ഗോളിന്റെ പിന്‍ബലത്തില്‍ സെവിയ്യക്കു ഫൈനലിലേക്ക് മുന്നേറാന്‍ സാധിക്കും.

thanur-inner                            
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day