|    Dec 11 Tue, 2018 6:27 am
FLASH NEWS
Home   >  Todays Paper  >  Page 5  >  

മുഖ്യമന്ത്രിയും പ്രതിപക്ഷ നേതാവും നേര്‍ക്കുനേര്‍

Published : 31st May 2018 | Posted By: kasim kzm

തിരുവനന്തപുരം: കോട്ടയം സ്വദേശി കെവിന്റെ കൊലപാതകവുമായി ബന്ധപ്പെട്ട രാഷ്ട്രീയ വിവാദം ശക്തമാവുന്നതിനിടെ വാക്‌പോരുമായി മുഖ്യമന്ത്രിയും പ്രതിപക്ഷനേതാവും നേര്‍ക്കുനേര്‍. പ്രതിപക്ഷനേതാവ് വിടുവായത്തം പറയുന്നയാളാണെന്ന് മുഖ്യമന്ത്രി.
വിടുവായത്തം പറയാന്‍ കേമനാണ് ചെന്നിത്തല. അതിന്റെ ഭാഗമായാണ് അദ്ദേഹം പലതും പറയുന്നത്. ചെന്നിത്തലയ്ക്ക് പ്രതിപക്ഷ നേതൃസ്ഥാനം എന്താണെന്ന് പിടികിട്ടിയിട്ടില്ല. അതിനാലാണ് അദ്ദേഹം പല കാര്യങ്ങളും പറഞ്ഞുകൊണ്ടിരിക്കുന്നതെന്നും അദ്ദേഹം വിമര്‍ശിച്ചു. ഇതിനു പിന്നാലെ വാര്‍ത്താസമ്മേളനം വിളിച്ചുചേര്‍ത്തായിരുന്നു മുഖ്യമന്ത്രിക്കെതിരേ ചെന്നിത്തല ആഞ്ഞടിച്ചത്. മുഖ്യമന്ത്രി പിണറായി വിജയനല്ല ഏത് മഹാരാജാവാണെങ്കിലും പറയേണ്ടത് താന്‍ പറയുമെന്ന് രമേശ് ചെന്നിത്തല പറഞ്ഞു.
വിടുവായത്തം പറയുന്നത് ആരാണെന്ന് എല്ലാവര്‍ക്കും മനസ്സിലാവുന്നുണ്ട്. ഇത്രയും ദിവസം ഗാന്ധിനഗര്‍ എസ്‌ഐ തനിക്ക് സുരക്ഷ ഒരുക്കാനില്ലെന്നായിരുന്നു മുഖ്യമന്ത്രി പറഞ്ഞത്. ഇപ്പോള്‍ ആ നിലപാട് മാറ്റി. അടിക്കടി നിലപാട് മാറ്റിക്കൊണ്ടിരിക്കുന്ന മുഖ്യമന്ത്രിയാണോ താനാണോ വിടുവായത്തം പറയുന്നതെന്ന് ചെന്നിത്തല ചോദിച്ചു. നാടിനെ അപമാനിക്കുന്നത് മാധ്യമങ്ങളല്ല, മുഖ്യമന്ത്രി തന്നെയാണ്. കെവിനുമായി ബന്ധപ്പെട്ട കേസില്‍ പോലിസിന്റെ വീഴ്ച പുറത്തുകൊണ്ടുവന്നത് മാധ്യമങ്ങളാണ്.
സര്‍ക്കാരിന്റെ വീഴ്ച ചൂണ്ടിക്കാട്ടേണ്ടത് പ്രതിപക്ഷവും മാധ്യമങ്ങളുമാണ്. ഇതൊക്കെ ചെയ്യുന്ന താനാണോ വിടുവായത്തം പറയുന്നത്. പ്രതിപക്ഷ നേതാവെന്നത് തന്റെ ഉത്തരവാദിത്തമാണ്. അത് താന്‍ ചെയ്യുകതന്നെ ചെയ്യും. പ്രതിപക്ഷത്തിന്റെ മേല്‍ കുതിര കയറിയിട്ട് കാര്യമില്ല. തനിക്കെതിരായ ചോദ്യങ്ങള്‍ ആരും ചോദിക്കരുതെന്ന നിലപാടാണ് മുഖ്യമന്ത്രിയുടേത്. പിണറായി പാര്‍ട്ടി സെക്രട്ടറി ആയിരുന്നെങ്കില്‍ ഇങ്ങനെയാവാമായിരുന്നു. എന്നാല്‍ ജനങ്ങളുടെ മുഖ്യമന്ത്രി ആയതിനാല്‍ അവരോട് പ്രതിബദ്ധത ഉണ്ടായേ പറ്റൂ. താനും രണ്ടുവര്‍ഷം ആഭ്യന്തരമന്ത്രി ആയിരുന്നയാളാണ്. അന്ന് ഇത്തരം ഒരു സംഭവം പോലും പ്രതിപക്ഷത്തിന് ചൂണ്ടിക്കാണിക്കാന്‍ കഴിഞ്ഞിട്ടില്ല. മുഖ്യമന്ത്രിയുടെ പോലിസ് ഭരണം പൂര്‍ണ പരാജയമാണെന്ന് ബോധ്യപ്പെട്ടതിന്റെ ജാള്യതയാലാണ് അദ്ദേഹം മാധ്യമങ്ങള്‍ക്കും പ്രതിപക്ഷത്തിനും നേരെ ആരോപണം ഉന്നയിക്കുന്നതെന്നും ചെന്നിത്തല പറഞ്ഞു.

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss