|    Jun 20 Wed, 2018 5:22 pm
FLASH NEWS
Home   >  Fortnightly   >  

മാഞ്ഞുപോകുന്നവ

Published : 12th October 2015 | Posted By: G.A.G

കവിത/പി.കെ.ഗോപി മടിക്കൈ


 

അന്നുനാമീ വഴി
പോകവേ,യിങ്ങനെ-
യായിരുന്നില്ലയിക്കേരനാട്!
തിങ്ങിനിറഞ്ഞ
മരങ്ങളാലൊരുവനം
തന്നെയുണ്ടായിരു-
ന്നിവിടമാകെ!
കുന്നുകളുണ്ടായിരുന്നു,
കുറെ തോടും
പിന്നെക്കുതിച്ചോടുമാറുകളും
കാറ്റിന്റെ കൈ തട്ടി
ആലോലമാടുന്ന കുളിരുള്ള
തെളിനീര്‍ക്കുഞ്ഞോളങ്ങളും.
അരുവിയോരങ്ങളിലത്തിമരങ്ങളി
ലെന്നുമൊരുപാടു
പക്ഷികളും,
അവരുടെ പാട്ടും, കളികളും
പലമാതിരിയുള്ള
കൂടുകളും.
കാടുകളില്‍ തീവ്രവാദി മൃഗങ്ങളു-
മത്രതന്നെസാധു
ജന്തുക്കളും
കാലിയു,മാളും,
കലപ്പയും കാര്‍ഷിക
വിപ്ലവം തീര്‍ക്കുന്ന ഘോഷങ്ങളും.
കൂടും, കുടിലും
കൃഷിയും, സംസ്‌കാരവു-
മവരന്നുനിര്‍മ്മിച്ച പ്രസ്ഥാനവും.
പാടവരമ്പിലും,
പാതയോരത്തിലും,
പാറിക്കളിച്ചചോരക്കൊടിയും.
എങ്ങുമ്മുഴങ്ങിയശബ്ദത്തി-
ലന്നുരിയാടിയ
വാക്യങ്ങളും.
നോക്കുകനേരെമുന്നോട്ടേയ്ക്കുതന്നെനാം
നെല്‍വയലെല്ലാമി-
ന്നെങ്ങുപോയി?!
പാടം നികത്തി-
പ്പണിത സൗധങ്ങളി-
ലിന്നു ജീവിക്കുന്നതേതു വര്‍ഗ്ഗം?
ഇവിടെയുണ്ടായ മണ്ണിന്റെ മക്കളെ
എവിടെക്കുഴികുത്തി
സംസ്‌കരിച്ചു?!
അവരുടെ പിന്മുറക്കാരായ്പ്പിറന്നവ-
രുണ്ടോയെനിക്കൊന്നു
കണ്ടുപോകാന്‍?!

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss