|    Jul 17 Tue, 2018 11:34 am
FLASH NEWS

മലപ്പുറം പാസ്‌പോര്‍ട്ട് ഓഫിസ് പൂട്ടാനുള്ള തീരുമാനം കേന്ദ്രം ഉപേക്ഷിക്കണം: കോടിയേരി ബാലകൃഷ്ണന്‍

Published : 14th September 2017 | Posted By: fsq

 

തിരുവനന്തപുരം: മലപ്പുറം പാസ്‌പോര്‍ട്ട് ഓഫിസ് പൂട്ടാനുള്ള തീരുമാനം കേന്ദ്രസര്‍ക്കാര്‍ ഉപേക്ഷിക്കണമെന്ന് സിപിഎം സംസ്ഥാന  സെക്രട്ടറി കോടിയേരി ബാലകൃഷ്ണന്‍ പ്രസ്താവനയില്‍ ആവശ്യപ്പെട്ടു. മലപ്പുറം പാസ്‌പോര്‍ട്ട് ഓഫിസ് കോഴിക്കോട് ഓഫിസുമായി ലയിപ്പിക്കാനുള്ള നീക്കമാണ് അധികൃതര്‍ നടത്തുന്നത്. ഈ നടപടി മലപ്പുറം ജില്ലയിലെ ആയിരക്കണക്കിന് പ്രവാസികളേയും പാസ്‌പോര്‍ട്ട് അപേക്ഷകരായ ഉദ്യോഗാര്‍ഥികളേയും ദ്രോഹിക്കുന്ന നടപടിയാണ്. പുതിയ പാസ്‌പോര്‍ട്ടിനും പഴയത് പുതുക്കുന്നതിനും ആയിരക്കണക്കിന് ആളുകള്‍ ആശ്രയിക്കുന്നതാണ് മലപ്പുറം മേഖലാ പാസ്‌പോര്‍ട്ട് ഓഫിസ്. സ്ത്രീകളടക്കമുള്ള അപേക്ഷകര്‍ കൂടുതലുള്ള ജില്ലയാണ് മലപ്പുറം. വര്‍ഷത്തില്‍ രണ്ടര ലക്ഷത്തോളം അപേക്ഷകരുള്ളതായാണ് കണക്കുകള്‍ വ്യക്തമാക്കുന്നത്. സംസ്ഥാനത്ത് ഏറ്റവുമധികം പ്രവാസികളുള്ള ജില്ലയാണ് മലപ്പുറം.  പാസ്‌പോര്‍ട്ട് ഓഫിസ് പൂട്ടിയാല്‍ ജില്ലയിലുള്ളവര്‍ക്ക് പുതിയ പാസ്‌പോര്‍ട്ടിന് അപേക്ഷിക്കാനും പഴയത് പുതുക്കാനും കോഴിക്കോട് പോവേണ്ടിവരും. ഇപ്പോള്‍ തന്നെ നാല് ജില്ലകള്‍ ആശ്രയിക്കുന്നതാണ് കോഴിക്കോട് പാസ്‌പോര്‍ട്ട് ഓഫിസ്. മലപ്പുറം പാസ്‌പോര്‍ട്ട് ഓഫി സ് പൂട്ടുന്നതോടെ കോഴിക്കോട് ഓഫിസിന്റെ തിരക്ക് വര്‍ധിക്കുകയും ജനങ്ങള്‍ക്ക് അടിയന്തരമായി ലഭിക്കേണ്ട സേവനം നിഷേധിക്കപ്പെടുകയും ചെയ്യും. പാസ്‌പോര്‍ട്ട് ഓഫിസ് നിര്‍ത്തലാക്കാനുള്ള നടപടി കേന്ദ്രം പുനപരിശോധിക്കണമെന്നും കേന്ദ്രസര്‍ക്കാരിന്റെ തെറ്റായ നീക്കത്തിനെതിരേ ശക്തമായ ബഹുജന പ്രതിഷേധം ഉയര്‍ന്നുവരണമെന്നും കോടിയേരി ബാലകൃഷ്ണന്‍ പ്രസ്താവനയില്‍ ആവശ്യപ്പെട്ടു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss