|    Jan 22 Sun, 2017 11:19 am
FLASH NEWS

മനോജ് വധം: പി ജയരാജന് പങ്കുണ്ടെന്ന് സിബിഐ

Published : 23rd March 2016 | Posted By: SMR

തലശ്ശേരി: ആര്‍എസ്എസ് നേതാവ് കതിരൂര്‍ മനോജ് കൊല്ലപ്പെട്ട കേസില്‍ പി ജയരാജന്റെ പങ്കാളിത്തം തെളിയിക്കുന്ന വസ്തുതകള്‍ ഹൈക്കോടതിയില്‍ നേരത്തെ സമര്‍പ്പിച്ച കേസ്ഡയറിയില്‍ രേഖപ്പെടുത്തിയിട്ടുണ്ടെന്നും തലശ്ശേരി ജില്ലാ സെഷന്‍സ് കോടതിയില്‍ ഇപ്പോള്‍ സമര്‍പ്പിച്ച സിഡിയിലും ഇതു വ്യക്തമാക്കിയിട്ടുണ്ടെന്നും സിബിഐ പ്രോസിക്യൂട്ടര്‍ എസ് കൃഷ്ണകുമാര്‍ കോടതിയില്‍ വ്യക്തമാക്കി.
പി ജയരാജന്റെ ജാമ്യാപേക്ഷ ഇന്നലെ പരിഗണിച്ചപ്പോഴാണ് കേസ് ഡയറി കോടതി മുമ്പാകെ സമര്‍പ്പിച്ചത്. ജാമ്യാപേക്ഷ വിധിപറയുന്നതിന് ഇന്ന് വീണ്ടും പരിഗണിക്കും. പി ജയരാജന്റെ കിഴക്കേ കതിരൂരിനടുത്തുള്ള തറവാട്ടു ക്ഷേത്രമാണ് കൊലപാതകം നടത്തുന്നതിനുള്ള ഗൂഢാലോചനാ കേന്ദ്രം. 2014 സപ്തംബര്‍ ഒന്നിന് കേസിലെ പതിനൊന്നാം പ്രതി കൃഷ്ണന്‍ 25ാം പ്രതി ജയരാജനെ ഫോണ്‍ ചെയ്തിരുന്നതിന്റെ രേഖകള്‍ ലഭിച്ചിട്ടുണ്ട്. വിക്രമന്റെ അമിത മദ്യപാനവും തുടര്‍ന്നുള്ള ആക്രമണോല്‍സുകതയും ചികില്‍സിച്ചു ഭേദമാക്കുന്നതിന് ബംഗളൂരുവിലെ നിംഹാന്‍സ് ആശുപത്രിയില്‍ ചികില്‍സയ്ക്ക് അയച്ചതും പി ജയരാജനാണ്. മദ്യാസക്തി പൂര്‍ണമായും ഭേദമായെങ്കിലും അക്രമോല്‍സുകത നിലനിര്‍ത്തി മനോജ് വധമെന്ന ലക്ഷ്യം പൂര്‍ത്തീകരിക്കാന്‍ വിക്രമനെ ഉപയോഗിക്കുകയായിരുന്നുവെന്നും സിബിഐ പ്രോസിക്യൂട്ടര്‍ വാദിച്ചു.
നേരത്തെ മനോജിന്റെ കുടുംബവും ജയരാജന്റെ കുടുംബവും വലിയ ഐക്യത്തിലായിരുന്നു. എന്നാല്‍, മനോജ് ആര്‍എസ്എസുമായി അടുത്തത് മനോജിനോടുള്ള ജയരാജന്റെ വൈരാഗ്യത്തിനു കാരണമായിട്ടുണ്ടെന്നും സിബിഐ പ്രോസിക്യൂട്ടര്‍ വിശദീകരിച്ചു. സിബിഐ ശേഖരിച്ച തെളിവുകള്‍ നിയമ വിദഗ്ധരും അന്വേഷണ ഉദ്യോഗസ്ഥരും വിശകലനം ചെയ്താണ് പ്രതിപ്പട്ടികയില്‍ ജയരാജനെ ഉള്‍പ്പെടുത്തിയത്.
ജയരാജനെ ചോദ്യം ചെയ്യുന്നതിന് കോടതി നല്‍കിയ അനുമതി കൃത്യമായി പാലിക്കപ്പെടാതിരിക്കാന്‍ ചോദ്യംചെയ്യുന്ന മുറിയിലേക്ക് കണ്ണൂര്‍ സെന്‍ട്രല്‍ ജയില്‍ സൂപ്രണ്ടിനെ പ്രവേശിപ്പിക്കുന്നിടത്തോളം സ്വാധീനം പാര്‍ട്ടിയും ജയരാജനും പ്രയോഗിച്ചെന്നും സിബിഐ പ്രോസിക്യൂട്ടര്‍ വാദിച്ചു.
എന്നാല്‍, സിബിഐ ഇപ്പോള്‍ ഹാജരാക്കുന്ന തെളിവുകളും രേഖകളുമെല്ലാം വ്യാജമാണെന്നും ഗൂഢാലോചനയുടെ ഉറവിടം ഓരോ റിപോര്‍ട്ടിലും മാറികൊണ്ടിരിക്കുകയാണെന്നും പ്രതിഭാഗം അഭിഭാഷകന്‍ കെ വിശ്വന്‍ പറഞ്ഞു. തെളിവുകള്‍ ഹാജരാക്കാതെ രാഷ്ട്രീയ പകപോക്കലിന് പി ജയരാജനെ സിബിഐ ഉപയോഗിക്കുകയാണെന്നും അഡ്വ. വിശ്വന്‍ പറഞ്ഞു.

Share on FacebookShare on Google+Tweet about this on TwitterShare on LinkedIn
(Visited 63 times, 1 visits today)
                     
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക