|    May 25 Thu, 2017 1:11 am
FLASH NEWS

മഅ്ദനി ഇക്കുറി അന്‍വാര്‍ശ്ശേരിയില്‍ പെരുന്നാള്‍ ആഘോഷിക്കും

Published : 5th July 2016 | Posted By: mi.ptk

madani

ശാസ്താംകോട്ട: വര്‍ഷങ്ങള്‍ക്കുശേഷം ഇക്കുറി പിഡിപി ചെയര്‍മാന്‍ അബ്ദുന്നാസിര്‍ മഅ്ദനി  മൈനാഗപ്പള്ളി അന്‍വാര്‍ശ്ശേരി യത്തീംഖാനയില്‍ പെരുന്നാള്‍ ആഘോഷിക്കും. നോമ്പ് തുടങ്ങി രണ്ടാഴ്ചയ്ക്കുശേഷം 2010 ആഗസ്ത്് 17ന് വെള്ളിയാഴ്ച ജുമുഅ നമസ്‌കാരത്തിനു ശേഷമാണ് കേരള പോലിസ് അറസ്റ്റ് രേഖപ്പെടുത്തി മഅ്്ദനിയെ കര്‍ണാടക പോലിസിന് കൈമാറിയത്. പുണ്യമാസത്തില്‍ തടവറയിലേക്ക് പോവുമ്പോള്‍ ഇനിയൊരിക്കല്‍കൂടി യത്തീംഖാനയിലെ അന്തേവാസികള്‍ക്കൊപ്പം  പെരുന്നാള്‍ കൂടണമെന്ന മഅ്ദനിയുടെ ആഗ്രഹമാണ് ഇക്കുറി സഫലമാവുന്നത്. 2013 ലും 2015ലും ജാമ്യ ഇളവുമായി മഅ്ദനി കേരളത്തില്‍ എത്തിയിരുന്നെങ്കിലും  റമദാന്‍ മാസത്തിലായിരുന്നില്ല. എന്നാല്‍, ഇക്കുറി അദ്ദേഹം അന്‍വാര്‍ശ്ശേരിയില്‍ എത്തിയപ്പോള്‍ ഇവിടെ വന്‍ ഒരുക്കങ്ങളാണ് നടത്തിയിരിക്കുന്നത്. അന്തേവാസികളായ കുട്ടികളും തങ്ങളുടെ പ്രിയപ്പെട്ട ഉസ്താദിനൊപ്പം പെരുന്നാള്‍ ആഘോഷിക്കാനാവുമെന്ന സന്തോഷത്തിലാണ്.  അന്‍വാര്‍ശ്ശേരിയിലെ കുട്ടികള്‍ക്കൊപ്പം പെരുന്നാളുകൊള്ളാന്‍ തന്റെ മനസ്സ് ആഗ്രഹിക്കുന്നതായി ബംഗളൂരുവില്‍ വച്ച് സന്ദര്‍ശിക്കുന്നവരോടൊക്കയും മഅ്ദനി സൂചിപ്പിക്കാറുണ്ടായിരുന്നു. 1998ല്‍ കോയമ്പത്തൂര്‍ സ്‌ഫോടന കേസുമായി ബന്ധപ്പെട്ട് അറസ്റ്റിലായ മഅ്ദനിയെ 10 വര്‍ഷത്തിനു ശേഷം നിരപരാധിയാണെന്നുകണ്ട് വിട്ടയച്ചെങ്കിലും രണ്ടു വര്‍ഷത്തിന് ശേഷം ബംഗളൂരു സ്‌ഫോടനക്കേസില്‍ പ്രതിയാക്കി വീണ്ടും അറസ്റ്റ് ചെയ്യുകയായിരുന്നു. കഴിഞ്ഞ 18 വര്‍ഷത്തിനുള്ളില്‍ കോയമ്പത്തൂര്‍ ജയിലില്‍ നിന്നും മോചിതനായശേഷമുള്ള രണ്ടുവര്‍ഷക്കാലം മാത്രമാണ് മഅ്ദനിക്ക് സ്വാതന്ത്ര്യത്തോടെ ജീവിക്കാനായത്. നിരന്തരമായ നിയമപോരാട്ടത്തിലൂടെയും പ്രാര്‍ഥനയിലൂടെയും ഇത്തവണ നാട്ടിലെത്തിയപ്പോള്‍ അത് ഒരു റമദാന്‍ കാലമാണെന്നുള്ള പ്രത്യേകതയും ഉണ്ട്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day