|    Sep 19 Wed, 2018 5:44 am
FLASH NEWS
Home   >  Todays Paper  >  page 12  >  

മംഗളൂരു വിമാനദുരന്തത്തിന് എട്ടാണ്ട് : വാദം പൂര്‍ത്തിയായി; വിധി ജൂലൈയില്‍

Published : 18th May 2017 | Posted By: fsq

 

അബ്ദുര്‍റഹ്മാന്‍  ആലൂര്‍

കാസര്‍കോട്: രാജ്യത്തെ നടുക്കിയ മംഗളൂരു ബജ്‌പെ വിമാനദുരന്തത്തിന് എട്ടാണ്ട് പൂര്‍ത്തിയാവുന്നു. 2010 മെയ് 22നു പുലര്‍ച്ചെ 6.10നു മംഗളൂരു ബജ്‌പെ അന്താരാഷ്ട്ര വിമാനത്താവളത്തില്‍ എയര്‍ഇന്ത്യ വിമാനത്തിനു തീപിടിച്ച് 158 പേര്‍ മരണപ്പെട്ടിരുന്നു. എന്നാല്‍, മരണപ്പെട്ടവര്‍ക്ക് എയര്‍ഇന്ത്യ കമ്പനി പൂര്‍ണമായും നഷ്ടപരിഹാരം നല്‍കിയിട്ടില്ല. സംഭവത്തില്‍ മരിച്ച യാത്രക്കാരനായ ആരിക്കാടിയിലെ മുഹമ്മദ് റാഫിക്ക് 35 ലക്ഷം രൂപ മാത്രമാണ് അധികൃതര്‍ നഷ്ടപരിഹാരം അനുവദിച്ചത്. എന്നാല്‍, ഇതു കുറവാണെന്നും മോണ്‍ട്രിയല്‍ കരാറിന്റെ അടിസ്ഥാനത്തില്‍ നഷ്ടപരിഹാരം നല്‍കണമെന്നും ആവശ്യപ്പെട്ട് പിതാവ് അബ്ദുല്‍ സലാം സുപ്രിംകോടതിയില്‍ ഫയല്‍ ചെയ്ത കേസില്‍ ജൂലൈ രണ്ടാം വാരത്തില്‍ വിധി പറയും. കഴിഞ്ഞ ഏപ്രില്‍ 18നു സുപ്രിംകോടതിയില്‍ കേസിന്റെ വാദങ്ങള്‍ പൂര്‍ത്തിയായി. വിധി പറയാന്‍ മാറ്റിവയ്ക്കുകയായിരുന്നു. ദുരന്തത്തില്‍ മരണപ്പെട്ടവരുടെ ആശ്രിതര്‍ക്കു ലഭിക്കേണ്ട അര്‍ഹമായ നഷ്ടപരിഹാരമോ സര്‍ക്കാര്‍ വാഗ്ദാനം ചെയ്ത ജോലിയോ ഇപ്പോഴും ലഭിച്ചിട്ടില്ല. കൂടപ്പിറപ്പിന്റെയും ഭര്‍ത്താവിന്റെയും മക്കളുടെയും മൃതദേഹം പോലും ഒരുനോക്കു കാണാന്‍ സാധിക്കാത്ത 12ഓളം കുടുംബങ്ങള്‍ വേറെയുമുണ്ട്. ദുരന്തത്തില്‍ 103 പുരുഷന്‍മാരും 32 സ്ത്രീകളും 23 കുട്ടികളും നാലു കൈക്കുഞ്ഞുങ്ങളും ഉള്‍െപ്പടെ 158 പേരാണ് മരിച്ചത്. ഇതില്‍ 58 പേരും മലയാളികളാണ്. അപകടത്തിനിടെ കത്തിയമര്‍ന്ന വിമാനത്തില്‍ നിന്നു രണ്ടു മലയാളികള്‍ ഉള്‍പ്പെടെ എട്ടു പേര്‍ അദ്ഭുതകമായി രക്ഷപ്പെട്ടിരുന്നു. വിമാനദുരന്തം നടന്നയുടനെ അന്നത്തെ കേന്ദ്ര വ്യോമയാനമന്ത്രി പ്രഫുല്‍ പട്ടേല്‍ മരിച്ചവരുടെ ആശ്രിതര്‍ക്ക് 2009ല്‍ ഇംഗ്ലണ്ടിലെ മോണ്‍ട്രിയലില്‍ ഉണ്ടാക്കിയ മോണ്‍ട്രിയല്‍ കരാറിന്റെ അടിസ്ഥാനത്തില്‍ നഷ്ടപരിഹാരം നല്‍കുമെന്നു പ്രഖ്യാപിച്ചിരുന്നു. 75 ലക്ഷം രൂപയാണ് അന്താരാഷ്ട്ര ഉടമ്പടി പ്രകാരം നഷ്ടപരിഹാരം ലഭിക്കേണ്ടിയിരുന്നത്. എന്നാല്‍, എയര്‍ഇന്ത്യ നഷ്ടപരിഹാരം നല്‍കുന്നതിനായി ചുമതലപ്പെടുത്തിയ മുംബൈ ആസ്ഥാനമായുള്ള നാനാവതി കമ്മീഷന്‍ ദുരന്തത്തില്‍ മരിച്ചവരുടെ ഇരകളോട് ചര്‍ച്ച നടത്തി നഷ്ടപരിഹാരത്തുക കുറച്ചു നല്‍കുകയായിരുന്നു. ഗള്‍ഫില്‍ മരണപ്പെട്ടവര്‍ക്കു ലഭിച്ചിരുന്ന ശമ്പളം അടിസ്ഥാനമാക്കിയാണ് നഷ്ടപരിഹാരം നല്‍കാന്‍ കമ്മീഷന്‍ തയ്യാറായത്. ഇതനുസരിച്ച് ചിലര്‍ക്ക് ഒന്നര കോടി രൂപ വരെ നഷ്ടപരിഹാരം ലഭിച്ചു. എന്നാല്‍, സാധാരണക്കാരായ തൊഴിലാളികള്‍ക്ക് 35 ലക്ഷം രൂപ മാത്രമാണ് നഷ്ടപരിഹാരം നല്‍കാന്‍ കമ്പനി തയ്യാറായത്. ഷാര്‍ജയില്‍ ജോലിക്കാരനായിരുന്ന അബ്ദുല്‍ സലാമിന്റെ മകന്‍ മുഹമ്മദ് റാഫിക്ക് 35 ലക്ഷം രൂപ നഷ്ടപരിഹാരം നല്‍കാമെന്നായിരുന്നു വിമാനദുരന്തത്തിന്റെ നഷ്ടപരിഹാരം നല്‍കാന്‍ ചുമതലപ്പെടുത്തിയ നാനാവതി കമ്മീഷന്‍ വാഗ്ദാനം ചെയ്തത്. ഇതിനെതിരേ ഹൈക്കോടതിയില്‍ കേസ് ഫയല്‍ ചെയ്തു. അന്താരാഷ്ട്ര ഉടമ്പടി പ്രകാരമുള്ള നഷ്ടപരിഹാരം നല്‍കാന്‍ ഹൈക്കോടതി ഉത്തരവിട്ടിരുന്നു. ഇതിനെതിരേ എയര്‍ഇന്ത്യ അപ്പീല്‍ സമര്‍പ്പിച്ചു. തുടര്‍ന്ന് എയര്‍ ക്രാഷ് വിക്ടിംസ് ഫാമിലി ആന്റ് റിലേറ്റീവ് അസോസിയേഷന്‍ അഡ്വ. സഞ്ജയ് ഹെഗ്‌ഡെ മുേഖന സുപ്രിംകോടതിയില്‍ കേസ് ഫയല്‍ ചെയ്തു. ഈ കേസിലാണ് ജൂലൈ രണ്ടാം വാരത്തില്‍ വിധി പറയുന്നത്.

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss