|    Jan 21 Sun, 2018 4:32 pm
FLASH NEWS

ബാലവേല: മിന്നല്‍ പരിശോധനയില്‍ നാലു കുട്ടികളെ മോചിപ്പിച്ചു

Published : 4th January 2018 | Posted By: kasim kzm

കാസര്‍കോട്: ബാലവേല നിരോധനവും തെരുവുകുട്ടികളുടെ പുനരധിവാസത്തിനുമായി രൂപീകൃതമായ ജില്ലാതല ടാസ്‌ക്‌ഫോഴ്‌സ്  ബാലവേലയില്‍ ഏര്‍പ്പെട്ട നാലു കുട്ടികളെ മോചിപ്പിച്ചു. ചൈല്‍ഡ്‌വെല്‍ഫെയര്‍ കമ്മിറ്റി മുമ്പാകെ ഹാജരാക്കിയ കുട്ടികളെ പരവനടുക്കത്തെ ശിശുമന്ദിരത്തിലേക്ക് മാറ്റി.  വനിതാശിശുസംരക്ഷണവകുപ്പ് വിവിധ വകുപ്പുകളെ ഏകോപിപ്പിച്ചാണ് മിന്നല്‍ പരിശോധന നടത്തിയത്.
ജില്ലാലേബര്‍ ഓഫിസര്‍ കുമാരന്‍ നായര്‍, അസിസ്റ്റന്റ്‌ലേബര്‍ഓഫിസര്‍ ജയകൃഷ്ണ എന്നിവരുടെ നേതൃത്വത്തില്‍ രണ്ട് സ്‌പെഷ്യല്‍ ടാസ്‌ക്‌ഫോഴ്‌സുകള്‍ രൂപീകരിച്ചായിരുന്നു പരിശോധന. വിവിധ ഹോട്ടലുകള്‍, ഫാക്ടറികള്‍, വീടുകള്‍, റെയില്‍വെസ്റ്റേഷനുകള്‍, തീവണ്ടികള്‍ എന്നിവിടങ്ങളിലായിരുന്നു പരിശോധന. ലേബര്‍ഓഫിസര്‍ കുമാരന്‍ നായരുടെ നേതൃത്വത്തിലുള്ള സംഘം തൃക്കരിപ്പൂരില്‍ ബാലവേലചെയ്തിരുന്ന 12, 13 വയസുകാരായ രണ്ടുപെണ്‍കുട്ടികളെ മോചിപ്പിച്ച് സിഡബ്ല്യുസിക്ക് മുമ്പാകെ ഹാജരാക്കി.
ടീമില്‍ ഡിസിപിയു പ്രൊട്ടക്ഷന്‍ ഓഫിസര്‍ കെ ശുഹൈബ്, ഡിസിപിയു സോഷ്യല്‍വര്‍ക്കര്‍ എം എ ശോഭ, ശിശുക്ഷേമസമിതിഅംഗം പി വി ജാനകി, ചൈല്‍ഡ് ലൈന്‍ കൊളാബ്‌കോ-ഓഡിനേറ്റര്‍ അനീഷ്‌ജോസ് സംബന്ധിച്ചു. അസിസ്റ്റന്റ്‌ലേബര്‍ ഓഫിസര്‍ ജയകൃഷ്ണന്റെ നേതൃത്വത്തിലുള്ള സംഘം ബദിയടുക്കയില്‍ ബാലവേലചെയ്തുവന്നിരുന്ന അസം സ്വദേശികളായ രണ്ട്കുട്ടികളെ മോചിപ്പിച്ച് ചൈല്‍ഡ്‌വെല്‍ഫെയര്‍ കമ്മിറ്റി മുമ്പാകെ ഹാജരാക്കി. ഡിസിപിയു ലീഗല്‍ കം പ്രൊബേഷന്‍ ഓഫിസര്‍ എ ശ്രീജിത്ത്, കൗണ്‍സിലര്‍ നീതു കുര്യാക്കോസ്, ശിശുക്ഷേമസമിതി സെക്രട്ടറി മധു മുതിയക്കാല്‍, ചൈല്‍ഡ് ലൈന്‍ പ്രവര്‍ത്തക രമ്യ സംബന്ധിച്ചു.
കുട്ടികളെ നിയമവിരുദ്ധമായി ജോലിചെയ്യിക്കുകയോ ഭിക്ഷാടനത്തിനുവേണ്ടി ഉപയോഗിക്കുകയോ ചെയ്താല്‍ ബന്ധപ്പെട്ടവര്‍ക്കെതിരെ കര്‍ശനമായ നിയമനടപടികള്‍ സ്വീകരിക്കുമെന്ന് ജില്ലാശിശുസംരക്ഷണ ഓഫിസര്‍ പി ബിജു അറിയിച്ചു. ബാലവേല, ബാലഭിക്ഷാടനം എന്നിവ ശ്രദ്ധയില്‍ പെട്ടാല്‍ 1098 (ചൈല്‍ഡ് ലൈന്‍), 04994 256950 (ജില്ലാലേബര്‍ഓഫിസ്), 1517 (ശിശുക്ഷേമസമിതി(തണല്‍), 04994 238490 (സിഡബ്ല്യുസി കാസര്‍കോട്) എന്നീ നമ്പറുകളില്‍ വിവരം നല്‍കണം.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day