|    Jul 22 Sat, 2017 6:23 am
FLASH NEWS
Home   >  Editpage  >  Editorial  >  

ബാങ്ക് ലയനവും ഒ രാജഗോപാലും

Published : 20th July 2016 | Posted By: mi.ptk

എസ്ബിടിയെ എസ്ബിഐയില്‍ ലയിപ്പിക്കരുതെന്നാണ് കേരളത്തിന്റെ പൊതുവികാരം. സംസ്ഥാന നിയമസഭയില്‍ ലയനത്തിനെതിരായി മുഖ്യമന്ത്രി പിണറായി വിജയന്‍ പ്രമേയം അവതരിപ്പിച്ചപ്പോള്‍ ഭരണകക്ഷിയിലെയും പ്രതിപക്ഷമുന്നണിയിലെയും അംഗങ്ങള്‍ ഒറ്റമനസ്സോടെ അതിനെ അനുകൂലിച്ചു. എന്നാല്‍, സഭയിലെ ഒരേയൊരു ബിജെപി അംഗമായ ഒ രാജഗോപാല്‍ ലയനം വേണ്ടെന്ന നിലപാടില്‍ രാഷ്ട്രീയം കണ്ടെത്തുകയാണു ചെയ്തത്. മോദിവിരുദ്ധ വികാരം കമ്മ്യൂണിസ്റ്റുകള്‍ ആവിഷ്‌കരിക്കുകയും കോണ്‍ഗ്രസ്സുകാര്‍ ഏറ്റുപിടിക്കുകയും ചെയ്യുകയാണെന്നു പറഞ്ഞ് അദ്ദേഹം പ്രമേയത്തെ എതിര്‍ത്തു. കേരളത്തിന്റെ പൊതുപ്രശ്‌നങ്ങളില്‍ ഹിന്ദുത്വരാഷ്ട്രീയത്തിന്റെ നിലപാട് എന്തായിരിക്കാം എന്നതിന്റെ പ്രത്യക്ഷ സൂചനയാണ് ഒ രാജഗോപാലിന്റെ നിലപാടില്‍ കാണാനുള്ളത്. എല്‍ഡിഎഫ്-യുഡിഎഫ് വീതംവയ്പില്‍ നിന്ന് കേരളത്തെ വിമുക്തമാക്കി പുതിയൊരു രാഷ്ട്രീയബോധവും അതുവഴി സാമൂഹികമുന്നേറ്റവും എന്ന കാഴ്ചപ്പാടാണ് ബിജെപി കൊട്ടിഘോഷിക്കാറുള്ളത്. അതൊരു വീണ്‍വാക്കാണെന്നും കേരളത്തിന്റെ പൊതുതാല്‍പര്യങ്ങളേക്കാള്‍ ബിജെപിയെ സംബന്ധിച്ചിടത്തോളം ഉത്തരേന്ത്യന്‍ ബ്രാഹ്മണ്യവരേണ്യതയുടെ ആശയങ്ങളുടെ പ്രതിനിധാനങ്ങളാണ് പ്രധാനം എന്നും ഒ രാജഗോപാലിന്റെ എതിര്‍പ്പ് വ്യക്തമാക്കിത്തന്നു. കേരളത്തിന് സ്വന്തമായ സംസ്‌കാരവും സാമൂഹികബോധവും ജീവിതവീക്ഷണവും പ്രബുദ്ധതയുമുണ്ട്. ഇവിടെ നിലനില്‍ക്കുന്ന മതസൗഹാര്‍ദവും പുരോഗമനചിന്തയും ജീവിതരീതിയുമെല്ലാം ഈ മലയാളിത്തത്തിന്റെ ഉപോല്‍പന്നങ്ങളാണ്. അവ ഉണ്ടാക്കിവച്ച ഈടുവയ്പുകളില്‍നിന്നാണ് കേരളത്തിന്റേതായ പൊതുവികാരങ്ങള്‍ രൂപപ്പെടുന്നത്. ബിജെപിക്ക് അതുമായി പൊരുത്തപ്പെടാനാവുകയില്ലെന്നു തിരിച്ചറിയാന്‍ ഒ രാജഗോപാലിന്റെ നിലപാടുമൂലം സാധിച്ചു. കേരളത്തിന്റെ പ്രബുദ്ധതയ്ക്കും മതസൗഹാര്‍ദത്തിനും അനുയോജ്യമായ ആരോഗ്യകരമായ സമീപനങ്ങള്‍ ബിജെപിയുടെ ഈ തലമുതിര്‍ന്ന നേതാവ് പുലര്‍ത്തുന്നില്ലെന്നതിനു വേറെയും തെളിവുകളുണ്ട്. ഈയിടെ ഒരു ആഴ്ചപ്പതിപ്പിനു നല്‍കിയ അഭിമുഖത്തില്‍ ”റമദാന്‍ കാലത്ത് മലപ്പുറം ജില്ലയില്‍ ഹിന്ദുക്കളുടെ കട തുറക്കാന്‍ പറ്റില്ല, ഹിന്ദുക്കളായ മല്‍സ്യത്തൊഴിലാളികള്‍ക്ക് വെള്ളിയാഴ്ച കടലില്‍ പോവാന്‍ അനുവാദമില്ല” എന്നൊക്കെയുള്ള മുട്ടന്‍നുണകള്‍ എഴുന്നള്ളിച്ചിരിക്കുന്നു അദ്ദേഹം. തീര്‍ത്തും വസ്തുതാവിരുദ്ധമായ ഈ വാക്കുകള്‍ അദ്ദേഹം പറയാന്‍ കാരണം, കേരളത്തിന്റെ സവിശേഷതയായ മതസൗഹാര്‍ദത്തിലധിഷ്ഠിതമായ സാമൂഹികഘടനയുമായി അദ്ദേഹത്തിന്റെ തീവ്രഹിന്ദുത്വ മനസ്സിന് പൊരുത്തപ്പെടാനാവാത്തതാണ്. ഹിന്ദുത്വരാഷ്ട്രീയം കേരളീയ പൊതുബോധത്തിന് അന്യമാണെന്നാണ് ഇതിന്റെ ചുരുക്കം. എസ്ബിടിയുടെ ലയനകാര്യം നിയമസഭയില്‍ വന്നപ്പോള്‍ പുറത്തുവന്നതും ഈ പൊരുത്തക്കേടാണ്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക