|    Feb 21 Wed, 2018 11:14 am

പ്രവാസി പുനരധിവാസവും പ്രത്യേക വരള്‍ച്ചാ പാക്കേജും നിയമസഭ പ്രമേയം പാസാക്കി

Published : 6th May 2017 | Posted By: fsq

 

തിരുവനന്തപുരം: സൗദി അറേബ്യയിലും ഗള്‍ഫ് രാജ്യങ്ങളിലും സ്വദേശിവല്‍കരണത്താല്‍ തൊഴില്‍ നഷ്ടപ്പെടുന്ന മലയാളികള്‍ക്ക് അതാതു രാജ്യങ്ങളിലെ നയതന്ത്ര കാര്യാലയങ്ങള്‍ ചേംബര്‍ ഓഫ് കൊമേഴ്‌സുമായി ബന്ധപ്പെട്ട് തൊഴില്‍ പുനരധിവാസം സാധ്യമാക്കുന്ന കാര്യം കേന്ദ്രസര്‍ക്കാര്‍ ആലോചിക്കണമെന്ന് നിയമസഭ പ്രമേയത്തിലൂടെ ആവശ്യപ്പെട്ടു. കയറ്റുമതിക്കാര്‍ക്ക് നല്‍കുന്ന എല്ലാ ആനുകൂല്യങ്ങളും ഇളവുകളും പ്രവാസികള്‍ക്ക് നല്‍കണം. കെ വി അബ്ദുല്‍ഖാദര്‍ അവതരിപ്പിച്ച അനൗദ്യോഗിക പ്രമേയത്തിന്റെ ചുവടുപിടിച്ച് മുഖ്യമന്ത്രിക്ക് വേണ്ടി മന്ത്രി ജി സുധാകരനാണ് ഇതുസംബന്ധിച്ച ഔദ്യോഗികപ്രമേയം അവതരിപ്പിച്ചത്. മുഖ്യമന്ത്രിയുടെ കീഴിലുള്ള നോര്‍ക്ക വകുപ്പില്‍ പ്രവാസികളുടെ പ്രശ്‌നങ്ങള്‍ സംബന്ധിക്കുന്ന ഫയലുകള്‍ കെട്ടിക്കിടക്കുകയാണെന്നും ഇത് പരിഹരിക്കാന്‍ സര്‍ക്കാര്‍ അടിയന്തരനടപടി സ്വീകരിക്കണമെന്നും പി ടി തോമസ് ആവശ്യപ്പെട്ടു. അനൗദ്യോഗിക പ്രമേയത്തിന്റെ ചര്‍ച്ചയില്‍ പങ്കെടുത്തു സംസാരിക്കുകയായിരുന്നു അദ്ദേഹം. ആദ്യമായി എന്‍ആര്‍ഐ കമ്മീഷന്‍ രൂപീകരിച്ചതും നഴ്‌സ് റിക്രൂട്ട്‌മെന്റ് നോര്‍ക്ക വഴിയാക്കിയതും യുഡിഎഫ് സര്‍ക്കാരാണ്. വിദേശത്ത് സാധാരണ ജോലികളില്‍ ഏര്‍പ്പെട്ടിട്ടുള്ള പ്രവാസികളുടെ മക്കള്‍ക്ക് സ്‌കൂള്‍, കോളജ് അഡ്മിഷന്‍ ഉറപ്പാക്കാന്‍ സര്‍ക്കാര്‍ നടപടി സ്വീകരിക്കണമെന്നും അവധി സമയങ്ങളിലെ വിമാനക്കൂലി വര്‍ധനവിനെതിരെ കര്‍ക്കശ നടപടി വേണമെന്നും പി ടി ആവശ്യപ്പെട്ടു. സംസ്ഥാനം നേരിടുന്ന അഭൂതപൂര്‍വമായ വരള്‍ച്ചയെ നേരിടാനായി പ്രധാനമന്ത്രിയുടെ ദുരിതാശ്വാസ നിധിയില്‍ ഉള്‍പ്പെടുത്തി പ്രത്യേക ധനസഹായ പാക്കേജ് അനുവദിക്കണമെന്നും സഭ മറ്റൊരു പ്രമേയത്തില്‍ ആവശ്യപ്പെട്ടു. ഇ ടി ടൈസണിന് വേണ്ടി മുല്ലക്കര രത്‌നാകരന്‍ അവതരിപ്പിച്ച പ്രമേയം അംഗീകരിക്കാമെന്ന് റവന്യുമന്ത്രി ഇ ചന്ദ്രശേഖരന്‍ അറിയിച്ചു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss