|    Jul 18 Wed, 2018 12:11 pm
FLASH NEWS

പുതുതായി നിര്‍മിച്ച ഓവുചാലുകള്‍ അശാസ്ത്രീയമെന്ന് പരാതി

Published : 19th September 2017 | Posted By: fsq

 

മാനന്തവാടി: ഏറെക്കാലത്തെ മുറവിളികള്‍ക്കു ശേഷം നിര്‍മിച്ച ഓവുചാലുകള്‍ യാത്രക്കാര്‍ക്കും പരിസരവാസികള്‍ക്കും ദുരിതം വിതയ്ക്കുന്നതായി ആരോപണം. എടവക പഞ്ചായത്തിലെ പീച്ചംങ്കേട് അംബേദ്കര്‍ റോഡില്‍ നിര്‍മിച്ച ഓവുചാലുകളാണ് വെള്ളം കെട്ടിനിന്ന് കൊതുകുവളര്‍ത്തല്‍ കേന്ദ്രമായി മാറിയിരിക്കുന്നത്. അശാസ്ത്രീയമായ നിര്‍മാണമാണ് യാത്രക്കാര്‍ക്ക് പ്രയോജനമില്ലാതെ പാഴാവാനിടയാക്കിയതെന്നാണ് ആരോപണം. ജില്ലയിലെ ഏക കാന്‍സര്‍ ചികില്‍സാ കേന്ദ്രമായ അംബേദ്കര്‍ ആശുപത്രിയിലേക്കുള്ള രോഗികള്‍ ഉള്‍പ്പെടെ നിരവധി യാത്രക്കാര്‍ കടന്നുപോവുന്ന പീച്ചങ്കോട്-നല്ലൂര്‍നാട് റോഡില്‍ ഏതാനും മാസങ്ങള്‍ക്ക് മുമ്പാണ് ഓവുചാലുകള്‍ നിര്‍മിച്ചത്. പീച്ചംകോട് നിന്ന് 300 മീറ്റര്‍ മാറി റോഡില്‍ നിറയെ വെള്ളം കെട്ടിനിന്നിരുന്ന ഭാഗത്താണ് നാട്ടുകാരുടെ നിരന്തരസമ്മര്‍ദത്തെ തുടര്‍ന്ന് എടവക ഗ്രാമപ്പഞ്ചായത്ത് തൊഴിലുറപ്പ് പദ്ധതിയിലുള്‍പ്പെടുത്തി പ്രവൃത്തി പൂര്‍ത്തീകരിച്ചത്. എന്നാല്‍, പ്രവൃത്തിയിലെ അപാകതയും അശാസ്ത്രീയതയും കാരണം ഓവുചാല്‍ ഗുണത്തേക്കാളേറെ നാട്ടുകാര്‍ക്ക് ദുരിതമായിരിക്കുകയാണ്. മഴപെയ്താല്‍ റോഡിലുള്ള വെള്ളം ഓവുചാലിലേക്കിറക്കാന്‍ പ്രവൃത്തി സമയത്ത് കൂട്ടിയിട്ട കല്ലും മണ്ണും തടസ്സമാവുകയാണ്. ഇതു നീക്കം ചെയ്യാത്തതു കാരണം റോഡില്‍ പഴയതിനേക്കാള്‍ കൂടുതലായി വെള്ളം കെട്ടിനിന്ന് കാല്‍ നടയാത്ര പോലും കഴിയാത്ത നിലയിലാവുകയാണ്. ഓവുചാലുകള്‍ക്ക് വെള്ളം ഒഴുകിപ്പോവാന്‍ വേണ്ടത്ര ചെരിവ് നല്‍കാത്തതിനാല്‍ ചാലുകളില്‍ വെള്ളം കെട്ടി നിന്ന് കൊതുകുകള്‍ പെരുകുന്നതും പരിസരവാസികള്‍ക്ക് ദുരിതമാവുന്നു. ഇതു സംബന്ധിച്ച് നിരവധി തവണ പഞ്ചായത്ത് അധികൃതര്‍ക്ക് പരാതി നല്‍കിയെങ്കിലും ഇതുവരെ പരിഹാരം കാണാന്‍ തയ്യാറാവുന്നില്ലെന്നാണ് നാട്ടുകാര്‍ ആരോപിക്കുന്നത്.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss