ചണ്ഡീഗഡ്: പഞ്ചാബിലെ 32 സര്‍ക്കാര്‍ എയ്ഡഡ് സ്‌കൂളുകളിലെ അമ്പതിനായിരത്തിലധികം വിദ്യാര്‍ഥികള്‍ക്ക് ഉച്ചഭക്ഷണം വിതരണം ചെയ്യുന്നില്ലെന്ന് കംപ്‌ട്രോളര്‍ ആന്റ് ഓഡിറ്റര്‍ ജനറല്‍ റിപോര്‍ട്ട്. പഞ്ചാബ് നിയമസഭയുടെ മേശപ്പുറത്തുവച്ച റിപോര്‍ട്ടില്‍ 40 സ്‌കൂളുകളില്‍ 4 മുതല്‍ 245 ദിവസങ്ങള്‍ വരെ ഉച്ചഭക്ഷണം നല്‍കിയിരുന്നില്ലെന്നും പറയുന്നു. പ്രൈമറി സ്‌കൂളുകളിലെ പ്രവേശനവും ഹാജറും വര്‍ധിപ്പിച്ച് വിദ്യാഭ്യാസം സാര്‍വത്രികമാക്കുന്നതിന് വേണ്ടിയാണ് സര്‍ക്കാര്‍ ഉച്ചഭക്ഷണ വിതരണ പരിപാടി നടപ്പാക്കുന്നത്. അമൃത്‌സറിലെയും ലുധായിനയിലെയും 32 സര്‍ക്കാര്‍ എയ്ഡഡ് സ്‌കൂളുകളില്‍ പദ്ധതി നടപ്പാക്കത്തതിനാല്‍ 50,147 വിദ്യാര്‍ഥികള്‍ക്ക് ആനുകൂല്യം നഷ്ടപ്പെട്ടെന്നാണ് റിപോര്‍ട്ടില്‍ സൂചിപ്പിക്കുന്നത്.