|    Dec 10 Mon, 2018 10:00 am
FLASH NEWS
Home   >  Todays Paper  >  page 12  >  

‘നീതിയില്ലെങ്കില്‍ ദയാവധം തരൂ’

Published : 29th November 2018 | Posted By: kasim kzm

അഹ്മദാബാദ്: നീതിയില്ലെങ്കില്‍ ദയാവധമെങ്കിലും അനുവദിക്കണമെന്ന് ആവശ്യപ്പെട്ട് ഗുജറാത്തിലെ ഉനയിലെ ദലിതുകള്‍ രാഷ്ട്രപതി രാംനാഥ് കോവിന്ദിന് കത്തയച്ചു. ഇരകളിലൊരാള്‍ ഡിസംബര്‍ 7 മുതല്‍ മരണം വരെ നിരാഹാര സമരം നടത്തുമെന്നും വര്‍ഷ്‌റാം സര്‍വയ്യ കത്തില്‍ വ്യക്തമാക്കി.
ദേശീയതലത്തില്‍ തന്നെ വലിയ പ്രതിഷേധങ്ങള്‍ക്കു കാരണമായ ഗുജറാത്തിലെ ഉനയില്‍ നടന്ന ദലിത് വിരുദ്ധ ആക്രമണത്തിലെ ഇരകള്‍ക്ക് ബിജെപി ഭരിക്കുന്ന സംസ്ഥാന സര്‍ക്കാര്‍ നീതിനിഷേധിക്കുന്നതില്‍ പ്രതിഷേധിച്ചാണ് പുതിയ സമരമുഖം തുറക്കുന്നത്. ആക്രമണത്തിനു ശേഷം അന്നത്തെ മുഖ്യമന്ത്രി ആനന്ദിബെന്‍ പട്ടേല്‍ നല്‍കിയ വാഗ്ദാനങ്ങളൊന്നും പാലിക്കുന്നില്ല. ആക്രമണത്തിലെ ഇരകള്‍ക്കെല്ലാം അഞ്ചേക്കര്‍ വീതം ഭൂമി അനുവദിക്കും, യോഗ്യത പരിശോധിച്ച് സര്‍ക്കാര്‍ജോലി, ഇരകളെ മോട്ട സമധ്യാല ഗ്രാമത്തില്‍ നിന്നു മാറ്റിപ്പാര്‍പ്പിക്കും തുടങ്ങിയ വാഗ്ദാനങ്ങളാണ് ബിജെപി സര്‍ക്കാര്‍ പ്രഖ്യാപിച്ചിരുന്നത്. എന്നാല്‍, ആക്രമണം നടന്ന് രണ്ടര വര്‍ഷമാവാറായിട്ടും ഒന്നുപോലും പാലിക്കപ്പെട്ടില്ലെന്നു രാഷ്ട്രപതിക്ക് അയച്ച കത്തില്‍ വ്യക്തമാക്കുന്നു.
ആക്രമണ ശേഷം മാടുകളുടെ തൊലിയുരിയുന്ന പരമ്പരാഗത തൊഴില്‍ ഉപേക്ഷിക്കേണ്ടിവന്നു. കുലത്തൊഴില്‍ ഉപേക്ഷിച്ചതോടെ ഉപജീവനമാര്‍ഗം ഇല്ലാതായി. ഇനിയും ഇതു തുടര്‍ന്നാല്‍ ഞങ്ങള്‍ പട്ടിണി കിടന്ന് മരിക്കും. സര്‍ക്കാരിനോട് നേരിട്ടും നിവേദനങ്ങള്‍ അയച്ചും പല തവണ ഇക്കാര്യങ്ങളെല്ലാം ബോധിപ്പിച്ചതാണ്. ഒന്നും പരിഹരിക്കുന്നില്ല.
ഉന ആക്രമണത്തില്‍ പ്രതിഷേധിച്ച് റാലി നടത്തിയതിനു ദലിതര്‍ക്കെതിരേ പോലിസ് 74 കേസുകളാണ് എടുത്തത്. കെട്ടിച്ചമച്ചതായിട്ടും ഒരു കേസും സര്‍ക്കാര്‍ റദ്ദാക്കിയില്ല. സര്‍ക്കാര്‍ വാക്കു പാലിക്കുന്നില്ല. ഞങ്ങളുടെ ജീവിതം ദുരിതമയമാണ്. ഞങ്ങള്‍ക്ക് ഇങ്ങനെ ജീവിക്കേണ്ട. ദയവായി ഞങ്ങള്‍ക്ക് ദയാവധം അനുവദിക്കണം. ജീവിതം വഴിമുട്ടിയ അവസ്ഥയില്‍ മരിക്കുകയല്ലാതെ മറ്റു മാര്‍ഗങ്ങളൊന്നും മുന്നിലില്ലെന്നാണ് വര്‍ഷ്‌റാം കത്തില്‍ വ്യക്തമാക്കുന്നത്.
ഉനയിലെ വര്‍ഷ്‌റാം, സഹോദരന്‍ രമേഷ്, പിതാവ് ബാലു, മാതാവ് കുന്‍വാര്‍ എന്നിവരടങ്ങുന്ന എട്ടു ദലിതര്‍ക്കു നേരെയാണ് 2016 ജൂലൈ 11ന് ഗോരക്ഷാസംഘം ആക്രമണം നടത്തിയത്. ചത്ത പശുവിന്റെ തോലുരിയുകയായിരുന്ന ഇവരെ ഗോരക്ഷാസംഘം കെട്ടിയിട്ട് മര്‍ദിക്കുകയായിരുന്നു. മര്‍ദനത്തിന് ഇരകളായവരില്‍ ഒരാള്‍ ആത്മഹത്യ ചെയ്തിരുന്നു.
സംഘപരിവാര പ്രവര്‍ത്തകരുടെ ആക്രമണത്തിന്റെ വീഡിയോ ദൃശ്യങ്ങള്‍ പ്രചരിച്ചതോടെ ദേശവ്യാപക പ്രതിഷേധത്തിനു കാരണമായി. ഇപ്പോള്‍ എംഎല്‍എയായ ജിഗ്‌നേഷ് മേവാനിയുടെ നേതൃത്വത്തില്‍ ഗുജറാത്തില്‍ ദലിത് മഹാറാലിയും സംഘടിപ്പിച്ചിരുന്നു.

 

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss