|    Jun 29 Thu, 2017 10:53 am
FLASH NEWS

നിയമസഭാ തിരഞ്ഞെടുപ്പ്: പരാതികള്‍ സ്വീകരിക്കാനും അനുമതികള്‍ നല്‍കാനും ഓണ്‍ലൈന്‍ സംവിധാനം

Published : 9th March 2016 | Posted By: SMR

കൊല്ലം: നിയമസഭാ തിരഞ്ഞെടുപ്പിനോടനുബന്ധിച്ച് പരാതികള്‍ തിരഞ്ഞെടുപ്പ് കമ്മീഷന് സമര്‍പ്പിക്കാനും സ്ഥാനാര്‍ഥികള്‍ക്കും രാഷ്ട്രീയ പാര്‍ട്ടികള്‍ക്കും വിവിധ അനുമതികള്‍ നേടാനും ജില്ലാ തിരഞ്ഞെടുപ്പ് ഓഫിസിന്റെ ആവശ്യങ്ങള്‍ക്ക് ഉപയോഗിക്കുന്ന വാഹനങ്ങളുടെ വിശദാംശങ്ങള്‍ സൂക്ഷിക്കുന്നതിനും ഓണ്‍ലൈന്‍ സംവിധാനം.

ഇ-പരിഹാരം, ഇ-അനുമതി, ഇ-വാഹനം എന്നീ ഓണ്‍ലൈന്‍ ആപ്ലിക്കേഷനുകളാണ് ഇതിനായി ഉപയോഗിക്കുന്നത്. സംസ്ഥാന ഐ ടി മിഷനാണ് ഇവ സജ്ജീകരിച്ചിരിക്കുന്നത്.
പൊതുജനങ്ങള്‍ക്കും രാഷ്ട്രീയ പാര്‍ട്ടികള്‍ക്കും സ്ഥാനാര്‍ഥികള്‍ക്കും പരാതികള്‍ സമര്‍പ്പിക്കുന്നതിന് ഇ-പരിഹാരം എന്ന ആപ്ലിക്കേഷന്‍ പ്രയോജനപ്പെടുത്താം. ഈ സംവിധാനം അക്ഷയ കേന്ദ്രങ്ങളുമായി ബന്ധപ്പെടുത്തിയിരിക്കുന്നു. ഒരു പരാതിക്ക് പത്തു രൂപ ഈടാക്കും. പ്രചാരണത്തിനായി ലൗഡ് സ്പീക്കര്‍ ഉപയോഗിക്കുന്നതിനും, മൈതാനങ്ങള്‍ വിട്ടുകിട്ടുന്നതിനും മറ്റുമുള്ള അപേക്ഷകള്‍ ഇ-അനുമതി മുഖേന സമര്‍പ്പിക്കാം.
രാഷ്ട്രീയ പാര്‍ട്ടികള്‍ക്കും സ്ഥാനാര്‍ഥികള്‍ക്കും ഈ ഏകജാലക സംവിധാനം ഉപയോഗിക്കാം. ഇ-വാഹനം ആപ്ലിക്കേഷന്‍ തിരഞ്ഞെടുപ്പ് കമ്മീഷനു മാത്രമായുള്ളതാണ്. തിരഞ്ഞെടുപ്പ് ആവശ്യത്തിന് ഉപയോഗിക്കുന്ന സര്‍ക്കാര്‍, സ്വകാര്യ വാഹനങ്ങളുടെ വിശദ വിവരങ്ങളാണ് ഇതിലുള്ളത്.
ആപ്ലിക്കേഷനുകള്‍ പരിചയപ്പെടുത്തുന്നതിനായി വരണാധികാരികള്‍, ഉപവരണാധികാരികള്‍, ഇലക്ടറല്‍ രജിസ്‌ട്രേഷന്‍ ഓഫിസര്‍മാര്‍ എന്നിവര്‍ക്കായി ബിഷപ് ജറോം ഇന്‍സ്റ്റിറ്റിയൂട്ടില്‍ ഇന്നലെ പരിശീലന പരിപാടി സംഘടിപ്പിച്ചു. ഐ ടി മിഷന്‍ പ്രതിനിധി എബിന്‍ ബാബു ക്ലാസെടുത്തു.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക