|    Jun 22 Fri, 2018 11:27 am
FLASH NEWS
Home   >  Todays Paper  >  page 7  >  

തടവില്‍ കഴിഞ്ഞത് പതിനാറ് വര്‍ഷം ; അഹമ്മദ് വാനിക്ക് നഷ്ടപരിഹാരം നല്‍കണം: കോടതി

Published : 24th May 2017 | Posted By: fsq

 

ന്യൂഡല്‍ഹി: 16 വര്‍ഷത്തെ തടവിനു ശേഷം കുറ്റവിമുക്തനാക്കപ്പെട്ട അലിഗഡ് സര്‍വകലാശാലാ ഗവേഷക വിദ്യാര്‍ഥി ഗുല്‍സാര്‍ അഹ്മദ് വാനിക്ക് ഉത്തര്‍പ്രദേശ് സര്‍ക്കാര്‍ നഷ്ടപരിഹാരം നല്‍കണമെന്ന് കോടതി. സബര്‍മതി എക്‌സ്പ്രസ് സ്‌ഫോടനവുമായി ബന്ധപ്പെട്ടാണ് അഹ്മദ് വാനിയെ വിചാരണക്കിരയാക്കിയത്. വാനിയുടെ വിദ്യാഭ്യാസ യോഗ്യത അടിസ്ഥാനമാക്കി തടവ് കാലയളവില്‍ എത്ര സമ്പാദിക്കാന്‍ സാധിക്കുമായിരുന്നോ അത്രയും തുക നല്‍കാനാണ് നിര്‍ദേശം. വാനിയുടെ തടവിനു കാരണം അന്വേഷണത്തിലെ അശ്രദ്ധയാണെന്നും കോടതി കുറ്റപ്പെടുത്തി. 2001ല്‍ വാനിയെ അറസ്റ്റ് ചെയ്യുമ്പോള്‍ അലിഗഡ് സര്‍വകലാശാലയില്‍ നിന്ന് അറബി സാഹിത്യത്തില്‍ ഗവേഷണം പൂര്‍ത്തീകരിച്ചിരുന്നു. വാനിയെ വിചാരണ ചെയ്യാനുള്ള അനുമതി പോലിസുകാര്‍ നേടിയിരുന്നില്ല. കൂടാതെ, ഇദ്ദേഹത്തിന് മാനസിക, ശാരീരിക പീഡനമേറ്റതായും കോടതി പറഞ്ഞു. ഇതിന്റെ അടിസ്ഥാനത്തില്‍ ഉദ്യോഗസ്ഥര്‍ക്കെതിരേ കേസെടുത്തിട്ടുണ്ട്. സബര്‍മതി എക്‌സ്പ്രസ് സ്‌ഫോടനം ആസൂത്രണം ചെയ്‌തെന്നാരോപിച്ചായിരുന്നു വാനിയെയും മുഹമ്മദ് അബ്ദുല്‍ മൂബീനെയും പോലിസ് അറസ്റ്റ് ചെയ്തത്. എന്നാല്‍, ആരോപണം സംബന്ധിച്ച യാതൊരു തെളിവുകളും കോടതിയില്‍ സമര്‍പ്പിക്കാന്‍ അന്വേഷണ സംഘത്തിനു സാധിച്ചിട്ടില്ല. ആദിത്യനാഥ് സര്‍ക്കാര്‍ നഷ്ടപരിഹാരം നല്‍കിയില്ലെങ്കില്‍ വാനിക്ക് അലഹബാദ് ഹൈക്കോടതിയെ സമീപിക്കാമെന്നും കോടതി വ്യക്തമാക്കി.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss