|    Oct 21 Sat, 2017 10:49 am

ജില്ലയില്‍ 70 മാതൃകാ പോളിങ് സ്റ്റേഷനുകള്‍ സജ്ജമാക്കുന്നു; ഇത്തവണ ആദ്യമായി 32 വനിതാ സൗഹൃദ പോളിങ് സ്‌റ്റേഷനുകളും

Published : 3rd May 2016 | Posted By: SMR

തിരുവനന്തപുരം: നിയമസഭാ തിരഞ്ഞെടുപ്പിന് തലസ്ഥാന ജില്ലയില്‍ 70 മാതൃകാ പോളിങ് സ്റ്റേഷനുകളും 32 വനിതാ സൗഹൃദ പോളിങ് സ്റ്റേഷനുകളും സജ്ജീകരിച്ചിട്ടുള്ളതായി ജില്ലാ കലക്ടര്‍ ബിജു പ്രഭാകര്‍ അറിയിച്ചു.
വനിതാ ഉദ്യോഗസ്ഥരും വനിതകള്‍ക്ക് പ്രത്യേക സൗകര്യങ്ങളുമാണ് വനിതാ പോളിങ് സ്റ്റേഷനുകളില്‍ ഒരുക്കുന്നത്. അടിസ്ഥാന സൗകര്യങ്ങള്‍ കൃത്യമായി ഉറപ്പാക്കുന്നവയായിരിക്കും മാതൃകാ പോളിങ് സ്റ്റേഷനുകള്‍. എല്ലാ മണ്ഡലങ്ങളിലും അഞ്ചുവീതം മാതൃകാ പോളിങ് സ്റ്റേഷനുകളാണ് സജ്ജമാക്കിയിരിക്കുന്നത്. വൈദ്യുതി, കുടിവെള്ളം, ശൗചാലയങ്ങള്‍ എന്നീ അടിസ്ഥാന സൗകര്യങ്ങള്‍ എല്ലാ സ്റ്റേഷനുകളിലും നിര്‍ബന്ധമാണ്.
ഇതിനുപുറമേ, ബൂത്തുകളില്‍ തന്നെ കുടിവെള്ള സൗകര്യം, ക്യൂ നില്‍ക്കുന്നവര്‍ക്ക് ഇരിക്കാന്‍ കൂടുതല്‍ കസേരകള്‍, ആവശ്യമായ ഫര്‍ണിച്ചറുകള്‍, വനിതകള്‍ക്ക് വിശ്രമമുറികള്‍ തുടങ്ങിയവ മാതൃകാ പോളിങ് സ്‌റ്റേഷനുകളില്‍ ഉറപ്പാക്കും.
വനിതാ സൗഹൃദ പോളിങ് സ്റ്റേഷനുകളില്‍ പോളിങ് ഉദ്യോഗസ്ഥര്‍ വനിതകളായിരിക്കും. സുരക്ഷയ്ക്ക് വനിതാ കോണ്‍സ്റ്റബിള്‍മാരുമുണ്ടാകും.
ഇതിനുപുറമേ, സിഎപിഎഫ് സേനയും സുരക്ഷയ്ക്ക് പിന്തുണയേകും. മാതൃകാ ബൂത്തുകളിലെ സൗകര്യങ്ങള്‍ക്ക് പുറമേ വനിതകള്‍ക്ക് വിശ്രമമുറികള്‍, ഫീഡിങ് റൂം തുടങ്ങിയവ ഒരുക്കുമെന്നും ജില്ലാ കലക്ടര്‍ അറിയിച്ചു.
ആദ്യമായാണ് വനിതാ സൗഹൃദ പോളിങ് സ്‌റ്റേഷനുകള്‍ തയ്യാറാക്കുന്നത്. മാതൃകാ പോളിങ് സ്റ്റേഷനുകള്‍ നേരത്തെ ഒരുക്കിയിട്ടുണ്ടെങ്കിലും ഇത്രയും കേന്ദ്രങ്ങളില്‍ ആദ്യമായാണ്.
മാതൃകാ, വനിതാ പോളിങ് സ്റ്റേഷനുകള്‍ സജ്ജീകരിക്കുന്നതിന്റെ ഒരുക്കങ്ങളുടെ പുരോഗതി ജില്ലാ കലക്ടറുടെ നേതൃത്വത്തില്‍ നിരവധി തവണ വിലയിരുത്തിയിരുന്നു. റാമ്പുകള്‍ ഇല്ലാത്ത പോളിങ് സ്റ്റേഷനുകളില്‍ അവ ഒരുക്കാനുള്ള നടപടികളും ഏതാണ്ട് പൂര്‍ണമായിട്ടുണ്ട്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക