|    Oct 20 Fri, 2017 12:05 am
Home   >  Todays Paper  >  page 11  >  

ഗോളടിമേളത്തോടെ ഫ്രാന്‍സ്

Published : 9th October 2017 | Posted By: fsq

 

ഗുവാഹത്തി: ആദ്യമായി അണ്ടര്‍ 17 ലോകകപ്പ് ഫുട്‌ബോള്‍ കളിക്കാനെത്തിയ ന്യൂ കാലിഡോണിയ സ്വപ്‌നത്തില്‍ പോലും ഇത്തരമൊരു തോല്‍വി പ്രതീക്ഷിച്ച് കാണില്ല. ഗുവാഹത്തി ഇന്ദിരാ ഗാന്ധി സ്‌റ്റേഡിയത്തില്‍ ഫ്രാന്‍സ് സര്‍വാധിപത്യം സ്ഥാപിച്ചപ്പോള്‍ ഒന്നിനെതിരെ ഏഴ് ഗോളുകള്‍ക്കാണ് ന്യൂ കാലിഡോണിയ തോല്‍വി ഏറ്റുവാങ്ങിയത്. ഒന്നാം പകുതിയില്‍ തന്നെ ആറ് ഗോളുകള്‍ കണ്ടെത്തിയ ഫ്രാന്‍സ് കാലിഡോണിയെ ചിത്രത്തിലേ ഇല്ലാതാക്കുന്ന പ്രകടനമാണ് കാഴ്ചവച്ചത്. 4-4-2 ശൈലിയില്‍ ബൂട്ട്് കെട്ടിയിറങ്ങിയ ഫ്രാന്‍സിനെ 4-5-1 ശൈലിയില്‍ പ്രതിരോധിക്കാന്‍ ശ്രമിച്ച കാലിഡോണിയയുടെ പദ്ധതി കളിക്കളത്തില്‍ തകര്‍ന്നടിഞ്ഞു. അഞ്ചാം മിനിറ്റില്‍ തന്നെ ഫ്രാന്‍സിന്റെ അക്കൗണ്ടില്‍ ഗോള്‍ പിറന്നു. ഗോള്‍മുഖത്തെ കൂട്ടപ്പൊരിച്ചിലിനിടയില്‍ കാലിഡോണിയന്‍ താരം ബര്‍ണാഡ് ഇവയുടെ സെല്‍ഫ് ഗോളാണ് ഫ്രാന്‍സിനെ മുന്നിലെത്തിച്ചത്. കസറിക്കളിച്ച ഫ്രാന്‍സിന് വേണ്ടി 19ാം മിനിറ്റില്‍ അമിനെ ഗൗരി ലീഡുയര്‍ത്തി. ഇടത് വിങില്‍ നിന്ന് യാസിന്‍ അഡ്‌ലി മധ്യത്തിലേക്ക് നീട്ടി നല്‍കിയ പാസിനെ മാര്‍ക്ക് ചെയ്യപ്പെടാതെ നിന്ന അമിനെ ഗൗരി ലക്ഷ്യത്തിലെത്തിക്കുകയായിരുന്നു. (2-0). ഫ്രാന്‍സിന്റെ വേഗക്കരുത്തിന് മുന്നില്‍ കാലിഡോണിയയുടെ പ്രതിരോധം കാഴ്ചക്കാരായപ്പോള്‍ 30ാം മിനിറ്റില്‍ ക്ലൗഡിയോ ഗോമസ് ഫ്രാന്‍സിന്റെ ലീഡുയര്‍ത്തി. നീട്ടിക്കിട്ടിയ പാസ്സ് അമിനെ ഗൗരി പിടിച്ചെടുക്കുമ്പോള്‍ മുന്നില്‍  കാലിഡോണിയന്‍ ഗോളി മാത്രം. വലത് വിങില്‍ നിന്ന ഗോമസിന് ഗൗരി പാസ് നല്‍കിയപ്പോള്‍ അനായാസം ഗോളിയെ മറികടന്ന് പന്ത് വലയില്‍ (3-0).മൂന്ന് മിനിറ്റ് ചേരും മുമ്പേ വീണ്ടും ഫ്രാന്‍സ് വലകുലുക്കി. യാസിന്‍ അഡ്‌ലി വലത് വിങിലേക്ക് നല്‍കിയ പന്തിനെ അമിനെ ഗൗരി നിഷ്പ്രയാസം വലയിലാക്കുകയായിരുന്നു. പ്രതിരോധത്തില്‍ പിഴവുകള്‍ വരുത്തി കാലിഡോണിയ കളി തുടര്‍ന്നപ്പോള്‍ ഫ്രാന്‍സ് വീണ്ടും വീണ്ടും ഗോളുകള്‍ വാരിക്കൂട്ടി. 40ാം മിനിറ്റില്‍ മാക്‌സെന്‍സ് കാക്യുറെറ്റാണ് ഫ്രാന്‍സിന്റെ അഞ്ചാം ഗോള്‍ സ്വന്തമാക്കിയത്. വലത് വിങില്‍ ലഭിച്ച പന്ത് യാസിന്‍ അഡ്‌ലി ഹെഡ് ചെയ്തത് പിഴച്ചെങ്കിലും പോസ്റ്റിന് മുന്നില്‍ നിന്ന കാക്യുറെറ്റ് ലക്ഷ്യം പിഴയ്ക്കാതെ പന്ത് വലയിലെത്തിച്ചു (5-0). ഒന്നാം പകുതിക്ക് വിസില്‍ മുഴങ്ങുന്നതിന് തൊട്ടുമുമ്പ് ഫ്രാന്‍സിന് വീണ്ടും സെല്‍ഫ് ഗോള്‍ സമ്മാനം. കാലിഡോണിയ താരം കിയാം വാനെസ്സിയുടെ പിഴവിലൂടെയാണ് ഫ്രാന്‍സ് അക്കൗണ്ടിലേക്ക് ആറാം ഗോള്‍ ചേര്‍ത്തത്. രണ്ടാം പകുതിയിലും ഫ്രാന്‍സിന് അവസരങ്ങള്‍ നിരവധിയായിരുന്നു. 54ാം മിനിറ്റില്‍ പെനല്‍റ്റി കിക്കെടുത്ത മാക്‌സെന്‍സ് കാക്യുറെറ്റിന് പിഴച്ചില്ലായിരുന്നെങ്കില്‍ ഫ്രാന്‍സിന്റെ അക്കൗണ്ട് വീണ്ടും ഉയര്‍ന്നേനെ. ആശ്വാസ ഗോളിനായി വിയര്‍ത്തു കളിച്ച കാലിഡോണിയയുടെ പ്രയത്‌നം 90ാം മിനിറ്റില്‍ ലക്ഷ്യം കണ്ടു. ഇടത് വിങില്‍ നിന്ന് സിറില്‍ നൈപ്പി എടുത്ത ഫ്രീകിക്കിനെ കാമറോണ്‍ വാഡന്‍ഗസ് വലയിലാക്കുകയായിരുന്നു. എന്നാല്‍ ഇഞ്ചുറി ടൈമില്‍ വില്‍സണ്‍ ലിഡോര്‍ ഫ്രാന്‍സിന്റെ ഗോള്‍ പട്ടിക പൂര്‍ത്തിയാക്കിയത്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക