|    Sep 19 Wed, 2018 7:40 am
FLASH NEWS
Home   >  Todays Paper  >  Page 5  >  

കേരളത്തിന് സഹായം നല്‍കിയത് സമയോചിതമായി: മോദി

Published : 27th August 2018 | Posted By: kasim kzm

തിരുവനന്തപുരം: ഗവര്‍ണര്‍ ജസ്റ്റിസ് പി സദാശിവം പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തി. പ്രളയം മൂലം കേരളത്തിലെ ജനങ്ങള്‍ നേരിട്ട യാതനയെയും സംസ്ഥാനത്തെ രക്ഷാ, പുനരധിവാസ പ്രവര്‍ത്തനങ്ങളെയും കുറിച്ചും കൂടിക്കാഴ്ചയില്‍ ചര്‍ച്ചയായി. കേന്ദ്രസര്‍ക്കാര്‍ സംസ്ഥാനത്തിന് യാതൊരു മടിയും കൂടാതെ സമയോചിതമായി തന്നെയാണ് സഹായം നല്‍കിയിട്ടുള്ളതെന്നും 17, 18 തിയ്യതികളിലെ കേരള സന്ദര്‍ശനത്തിനു ശേഷം രക്ഷാപ്രവര്‍ത്തനം താന്‍ കൃത്യമായി എന്നും നിരീക്ഷിക്കുന്നുണ്ടെന്നും പ്രധാനമന്ത്രി ഗവര്‍ണറെ അറിയിച്ചു.തന്റെ നിര്‍ദേശപ്രകാരം തന്നെയാണ് കാബിനറ്റ് സെക്രട്ടറി അധ്യക്ഷനായ ദേശീയ ക്രൈസിസ് മാനേജ്‌മെന്റ് കമ്മിറ്റി നിത്യേന യോഗം ചേര്‍ന്നു കഴിഞ്ഞ 16 മുതല്‍ 21 വരെ രക്ഷാപ്രവര്‍ത്തനം ഏകോപിപ്പിക്കുകയും നിരീക്ഷിക്കുകയും ചെയ്തത്. ഉയര്‍ന്ന സൈനിക, സിവില്‍ ഉദ്യോഗസ്ഥരും ദേശീയ ദുരന്തനിവാരണ സേനാ പ്രതിനിധികളും മറ്റുമടങ്ങിയ ഈ സമിതിയില്‍ കേരള ചീഫ് സെക്രട്ടറി വീഡിയോ കോണ്‍ഫറന്‍സിങ് വഴി പങ്കെടുത്തിരുന്നു. ഈ യോഗങ്ങളുടെ പശ്ചാത്തലത്തിലാണ് 40 ഹെലികോപ്റ്റര്‍, 31 വിമാനം, 182 രക്ഷാടീമുകള്‍, 18 സൈനിക മെഡിക്കല്‍ സംഘങ്ങള്‍, 58 ദേശീയ ദുരന്തനിവാരണ സേനാ ടീമുകള്‍, ഏഴു കമ്പനി കേന്ദ്ര സായുധസേന, നേവി, കോസ്റ്റ് ഗാര്‍ഡ് കപ്പലുകള്‍, രക്ഷാസന്നാഹങ്ങളുള്ള 500 ബോട്ടുകള്‍ എന്നിവയെ വിന്യസിച്ചുകൊണ്ട് കേന്ദ്രം ഒരു വിപുലമായ രക്ഷാപ്രവര്‍ത്തനം നടത്തിയതെന്ന് പ്രധാനമന്ത്രി പറഞ്ഞു. നോട്ടിഫൈ ചെയ്യപ്പെട്ട ഏത് ദുരന്തത്തിലും രക്ഷാപ്രവര്‍ത്തനത്തിനായി ധനസഹായമനുവദിക്കുന്നത് ദേശീയ, സംസ്ഥാന പ്രതികരണനിധിയുടെ മാനദണ്ഡം അനുസരിച്ചാണ്. സംസ്ഥാന ദുരന്തപ്രതികരണനിധി എന്ന നിലയില്‍ ഓരോ സംസ്ഥാനത്തിനും അനുവദിച്ച ഫണ്ടിന്റെ 75 ശതമാനം തുകയും ധനകാര്യ കമ്മീഷന്‍ അനുമതിപ്രകാരം കേന്ദ്രം നല്‍കിയിട്ടുള്ളതാണ്. സംസ്ഥാനത്ത് വെള്ളപ്പൊക്കമുണ്ടായപ്പോള്‍ ജൂലൈ 21ന് സര്‍ക്കാര്‍ ഒരു ഇടക്കാല മെമ്മോറാണ്ടം കേന്ദ്രത്തിന് നല്‍കിയിരുന്നു. അതിന്റെ അടിസ്ഥാനത്തില്‍ ആഗസ്ത് 12ന് ഒരു കേന്ദ്ര ഇന്റര്‍ മിനിസ്റ്റീരിയല്‍ ടീം കേരളം സന്ദര്‍ശിച്ച് നഷ്ടത്തിന്റെ കണക്കെടുത്തിരുന്നു. ഇപ്പോഴത്തെ പ്രളയം വരുത്തിയ നഷ്ടത്തെക്കുറിച്ചുള്ള ഒരു അഡീഷനല്‍ മെമോറാണ്ടം രക്ഷാപ്രവര്‍ത്തനം തീരുന്നമുറയ്ക്ക് സംസ്ഥാനം നല്‍കുമെന്നാണ് അറിയുന്നത്. എന്നാല്‍, ഇതിനുള്ള കാലതാമസം പരിഗണിച്ചാണ് 600 കോടി രൂപ സഹായമായി അനുവദിച്ചത്. ഇതാവട്ടെ, സംസ്ഥാന ദുരന്ത പ്രതികരണനിധിയിലേക്ക് കേരളത്തിന് നല്‍കിയിട്ടുള്ള 562.45 കോടി രൂപയ്ക്കു പുറമേയാണെന്നു പ്രധാനമന്ത്രി ചൂണ്ടിക്കാട്ടി. ഈ സാമ്പത്തിക സഹായത്തിനുപുറമേ ആഹാരം, ജലം, മരുന്നുകള്‍, ധാന്യങ്ങള്‍ തുടങ്ങിയവയും കേരളത്തിന്റെ ആവശ്യമനുസരിച്ച് എത്തിക്കാന്‍ കഴിഞ്ഞു. കേരളത്തിലെ അടിയന്തര സാഹചര്യം പരിഗണിച്ചു നടപടിക്രമങ്ങള്‍ ഒഴിവാക്കിയാണ് സഹായം എത്തിച്ചത്. ഇപ്പോള്‍ അനുവദിച്ചിട്ടുള്ള 600 കോടി രൂപ കേരളത്തിനുള്ള സഹായത്തിന്റെ അഡ്വാന്‍സ് മാത്രമാണ്. ദേശീയ ദുരന്ത പ്രതികരണനിധിയുടെ മാനദണ്ഡമനുസരിച്ച് അധിക ധനസഹായം നല്‍കുമെന്നു പ്രധാനമന്ത്രി ഗവര്‍ണര്‍ക്ക് ഉറപ്പുനല്‍കി. പ്രധാനമന്ത്രിയെ കണ്ടശേഷം ഗവര്‍ണര്‍ കേന്ദ്രമന്ത്രി രാജ്‌നാഥ് സിങിനെയും സന്ദര്‍ശിച്ച് സംസ്ഥാനത്തെ ക്രമസമാധാനത്തെയും അതിനെക്കാള്‍ പ്രധാനമായി രക്ഷാ, പുനരധിവാസ പ്രവര്‍ത്തനത്തെയും കുറിച്ച് ധരിപ്പിച്ചു. നഷ്ടങ്ങളുടെ കണക്കെടുപ്പ് പൂര്‍ത്തിയാവുന്ന മുറയ്ക്ക് അധിക ധനസഹായം ലഭ്യമാക്കുമെന്ന് അദ്ദേഹവും ഉറപ്പുനല്‍കി.

 

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss