|    May 28 Sun, 2017 8:28 pm
FLASH NEWS

കാറും ലോറിയും കൂട്ടിയിടിച്ച് മൂന്നു മരണം

Published : 28th May 2016 | Posted By: SMR

കണ്ണൂര്‍: പുതിയതെരു ദേശീയപാതയില്‍ കാറും ലോറിയും കൂട്ടിയിടിച്ച് കാര്‍ യാത്രികരായ പിതാവും പിഞ്ചുമകളും ഉള്‍പ്പെടെ മൂന്നുപേര്‍ മരിച്ചു. രണ്ടുപേര്‍ക്ക് ഗുരുതര പരിക്ക്. തിരുവല്ല സ്വദേശികളും രാജസ്ഥാനിലെ ഉദയ്പൂര്‍ ബുവാനയില്‍ സ്ഥിരതാമസക്കാരുമായ അരിസ്റ്റോ വില്ലയില്‍ പരേതനായ ടി ഡി ജോണിയുടെ മകന്‍ ബുവാന പ്ലോട്ട് നമ്പര്‍ 202ല്‍ ജോ ജോണി (48), മകള്‍ കാതറിന്‍ (അഞ്ച്), ജോയുടെ സഹൃത്ത് ആല്‍ഫ്രഡ് എല്‍വിസ് (45) എന്നിവരാണു മരിച്ചത്.
ജോയുടെ ഭാര്യ തിരുവല്ല സ്വദേശിനി പ്രിയ (37), മൂത്തമകള്‍ ക്രിസ്റ്റീന (10) എന്നിവരെ ഗുരുതര പരിക്കുകളോടെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ 1.30ഓടെ പുതിയതെരു ധനരാജ് തിയേറ്ററിനു മുന്നിലാണ് സംഭവം.
ആല്‍ഫ്രഡും ജോയും തല്‍ക്ഷണവും കാതറിന്‍ പരിയാരം മെഡിക്കല്‍ കോളജ് ആശുപത്രിയിലുമാണു മരിച്ചത്. രാജസ്ഥാനില്‍നിന്നു തിരുവല്ലയിലേക്ക് വരികയായിരുന്നു ഇവര്‍. ആല്‍ഫ്രഡാണ് കാറോടിച്ചിരുന്നത്. ആര്‍ജെ 27 സിസി 0429 സാന്‍ട്രോ കാറും എംപി 06 എച്ച്‌സി 0306 ലോറിയുമാണ് അപകടത്തില്‍പ്പെട്ടത്.
തിരുവനന്തപുരത്തുനിന്ന് ഗ്വാളിയോറിലേക്കു പോവുകയായിരുന്നു ലോറി. കാര്‍ ഡ്രൈവര്‍ ഉറങ്ങിയതാണ് അപകടകാരണമെന്നാണ് പോലിസ് നിഗമനം. ഇടിയുടെ ആഘാതത്തില്‍ കാറിനുള്ളില്‍ കുടുങ്ങിയവരെ ഏറെ പണിപ്പെട്ടാണ് വളപട്ടണം പോലിസും ഫയര്‍ഫോഴ്‌സും പുറത്തെടുത്തത്. ഉദയ്പൂരിലെ സ്വകാര്യ കമ്പനി ജീവനക്കാരാണ് ജോയും ആല്‍ഫ്രഡും. ഇരുവരും കുടുംബസമേതം വര്‍ഷങ്ങളായി ഉദയ്പൂരിലാണു താമസം. കാസര്‍കോട് രാജപുരത്തെ ജോയുടെ ബന്ധുവിന്റെ അടുത്തദിവസം നടക്കുന്ന വിവാഹത്തില്‍ പങ്കെടുക്കാനാണ് കേരളത്തിലെത്തിയത്.
ജോയുടെ പിതാവ് ജോണി വിമുക്തഭടനാണ്. ഒരു സഹോദരിയുണ്ട്. ഉദയ്പൂര്‍ സര്‍ക്കാര്‍ മെഡിക്കല്‍ കോളജിലെ സ്റ്റാഫ് നഴ്‌സാണ് ഭാര്യ പ്രിയ. ബിന്ദുവാണ് മരിച്ച ആല്‍ഫ്രഡിന്റെ ഭാര്യ. രണ്ടു മക്കളുണ്ട്.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day