|    Aug 19 Sat, 2017 11:07 am
FLASH NEWS
Home   >  Todays Paper  >  page 11  >  

കളിത്തട്ടില്‍ കീഴടങ്ങാതെ ഇംഗ്ലണ്ട്‌

Published : 9th August 2017 | Posted By: fsq

 

ലണ്ടന്‍: ഇഞ്ചോടിഞ്ച് പോരാട്ടം കണ്ട ഇംഗ്ലണ്ട്- ദക്ഷിണാഫ്രിക്ക ടെസ്റ്റ് പരമ്പര 3-1ന് ഇംഗ്ലണ്ടിന് സ്വന്തം. നാലാം ടെസ്റ്റില്‍ 177 റണ്‍സിന്റെ വിജയം സ്വന്തമാക്കിയാണ് ഇംഗ്ലണ്ട് പരമ്പരസ്വന്തമാക്കിയത്. ഇംഗ്ലണ്ട് പടുത്തുയര്‍ത്തിയ 379 റണ്‍സ് വിജയ ലക്ഷ്യത്തിലേക്ക് ബാറ്റിങിനിറങ്ങിയ ദക്ഷിണാഫ്രിക്കയ്ക്ക് 62.5 ഓവറില്‍ കൂടാരം കയറേണ്ടി വന്നു. അഞ്ച് വിക്കറ്റ് വീഴ്ത്തിയ മോയിന്‍ അലിയുടെ ബൗളിങ് മികവാണ് ദക്ഷിണാഫ്രിക്കയുടെ വിജയമോഹങ്ങളുടെ ചിറകരിഞ്ഞത്. ജെയിംസ് ആന്‍ഡേഴ്‌സണ്‍ മൂന്ന് വിക്കറ്റും സ്വന്തമാക്കി. സ്ഥിരതയില്ലാത്ത ബാറ്റിങാണ് ദക്ഷിണാഫ്രിക്കയുടെ ശാപം. 379 എന്ന പ്രയാസമേറിയ വിജയ ലക്ഷ്യത്തിലേക്ക് ബാറ്റേന്തിയ ദക്ഷിണാഫ്രിക്കന്‍ താരങ്ങളില്‍ ഹാഷിം അംലയ്ക്കും (83) ഫഫ് ഡുപ്ലെസിസിനും (61) മാത്രമാണ് ഭേദപ്പെട്ട പ്രകടനം പുറത്തെടുക്കാനായത്. മുന്‍നിരയും മധ്യനിരയിലും ഒരു പോലെ തകര്‍ന്നടിഞ്ഞപ്പോള്‍ ദക്ഷിണാഫ്രിക്കയ്ക്ക് പരമ്പര ഇംഗ്ലണ്ടിന് മുന്നില്‍ അടിയറവ് വയ്‌ക്കേണ്ടിവന്നു. ആറ് ദക്ഷിണാഫ്രിക്കന്‍ താരങ്ങളാണ് രണ്ടാം ഇന്നിങ്‌സില്‍ രണ്ടക്കം കാണാനാവാതെ മടങ്ങിയത്. പരമ്പരയിലുടനീളം മികച്ച പ്രകടനം പുറത്തെടുത്ത മോയിന്‍ അലി 19.5 ഓവറില്‍ വെറും 69 റണ്‍സ് വിട്ടുനല്‍കിയാണ് അഞ്ച് വിക്കറ്റുകള്‍ പിഴുതത്. ആന്‍ഡേഴ്‌സണും മികച്ച പിന്തുണ നല്‍കിയതോടെ ദക്ഷിണാഫ്രിക്കയുടെ ബാറ്റിങ് നിര കടപുഴകി. 14 ഓവറില്‍ 16 റണ്‍സ് മാത്രം വഴങ്ങിയാണ് ആന്‍ഡേഴ്‌സണ്‍ മൂന്ന് വിക്കറ്റുകള്‍ വീഴ്ത്തിയത്. ആദ്യം ബാറ്റ് ചെയ്ത ഇംഗ്ലണ്ട് ഒന്നാം ഇന്നിങ്‌സില്‍ 362 റണ്‍സ് പടുത്തുയര്‍ത്തിയപ്പോള്‍ ദക്ഷിണാഫ്രിക്കയുടെ പോരാട്ടം 226 റണ്‍സില്‍ അവസാനിച്ചു. ഒന്നാം ഇന്നിങ്‌സില്‍ നേടിയെടുത്ത 136 റണ്‍സ് ലീഡിന്റെ കരുത്തില്‍ രണ്ടാം ഇന്നിങ്‌സിനിറങ്ങിയ ഇംഗ്ലണ്ട് 243 റണ്‍സിന് ഓള്‍ ഔട്ടായി 379 റണ്‍സിന്റെ വിജയ ലക്ഷ്യം ദക്ഷിണാഫ്രിക്കയ്ക്ക് സമ്മാനിക്കുകയായിരുന്നു.  മോയിന്‍ അലി കളിയിലെ താരമായപ്പോള്‍ പരമ്പരയിലെ താരമായി മോയിന്‍ അലിക്കൊപ്പം ദക്ഷിണാഫ്രിക്കയുടെ മോണി മോര്‍ക്കലിനെയും തിരഞ്ഞെടുത്തു. ഒന്നാം ടെസ്റ്റ് ഇംഗ്ലണ്ട് ജയിച്ചപ്പോള്‍ രണ്ടാം ടെസ്റ്റ് ദക്ഷിണാഫ്രിക്ക സ്വന്തമാക്കി. എന്നാല്‍ മൂന്നും നാലും ടെസ്റ്റുകള്‍ സ്വന്തമാക്കി ആതിഥേയരായ ഇംഗ്ലണ്ട് പരമ്പര പിടിച്ചടക്കുകയായിരുന്നു.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക