|    Jan 18 Wed, 2017 11:46 pm
FLASH NEWS
Home   >  Life  >  Family  >  

ഏതാണ് വ്യാജന്‍? മുട്ടയോ വ്യാജമുട്ടക്കഥയോ? ആയിരം രൂപയ്ക്ക് വാങ്ങിക്കാമെന്ന് തുമ്മാരുക്കുടിയുടെ വെല്ലുവിളി

Published : 14th October 2016 | Posted By: G.A.G

art-egg

ചൈനയില്‍ നിന്നുള്ള വ്യാജമുട്ട കേരളത്തില്‍ വ്യാപകമാവുന്നുവെന്ന പ്രചാരണം തെറ്റാണെന്ന് വാദമുയരുന്നു. വ്യാജമുട്ടസംബന്ധിച്ച ആരോപണങ്ങള്‍ തെളിയിക്കുന്ന യാതൊന്നും കണ്ടെത്തിയിട്ടില്ലെന്ന് ഭക്ഷ്യസുരക്ഷാവകുപ്പ് അറിയിച്ചതിന് പിന്നാലെ വ്യാജമുട്ട സംബന്ധിച്ച പ്രചാരണം തന്നെ വ്യാജമാണെന്ന വാദവും ശക്തമാവുകയാണ്. ചൈനയില്‍ നിന്നുള്ള വ്യാജമുട്ടക്കഥ പത്തുവര്‍ഷം മുന്‍പ് ഇറങ്ങിയതാണെന്നും പലരാജ്യങ്ങളിലും പ്രചരിച്ചിട്ടും കഥയില്‍ പറയുന്ന വ്യാജമുട്ട ഒരാളും കണ്ടിട്ടില്ലെന്നും ചൂണ്ടിക്കാട്ടി ഐക്യരാഷ്ട്ര പരിസ്ഥിതി സംഘടനയുടെ ദുരന്ത ലഘൂകരണ വിഭാഗം മേധാവി മുരളി തുമ്മാരുക്കുടിയും രംഗത്ത് വന്നിട്ടുണ്ട്. തന്റെ ഫേസ് ബുക്ക് പേജില്‍ ഇതു സംബന്ധിച്ച വാദഗതികള്‍ നിരത്തുന്നതോടൊപ്പം  കേരളത്തിലെ ആദ്യത്തെ വ്യാജ മുട്ട കണ്ടെത്തുമ്പോള്‍ അഞ്ച് രൂപ വിലയുള്ള മുട്ട ആയിരം രൂപക്ക് വാങ്ങാന്‍ താന്‍ തയ്യാറാണെന്നും തുമ്മാരുക്കുടി പ്രഖ്യാപിച്ചിട്ടുണ്ട്.

മുരളി തുമ്മാരുക്കുടിയുടെ പോസ്റ്റിന്റെ പൂര്‍ണരൂപം :

ആദ്യത്തെ മുട്ടയ്ക്ക് ആയിരം രൂപ !

കേരളത്തില്‍ ചൈനയില്‍ നിന്നും വ്യാജമുട്ട എത്തിയെന്ന വാര്‍ത്ത കുറച്ചു ദിവസങ്ങളായി കിടന്നു കറങ്ങുന്നു. ഇന്ന് അന്വേഷണത്തിന് മന്ത്രി ഉത്തരവിട്ടു എന്നും കേട്ടു.

ചൈനയിലെ വ്യാജമുട്ടയുടെ വാര്‍ത്ത ചൈനയില്‍ തന്നെ പുറത്തു വന്നിട്ട്
ഏതാണ്ട് പത്തു വര്‍ഷം കഴിഞ്ഞു. പിന്നെ അത് ഹോങ്കോങ്ങില്‍ എത്തി, സിംഗപ്പൂരില്‍ എത്തി, ഇന്തോനേഷ്യയിലും ഫിലിപ്പൈന്‍സിലും എത്തി. പത്തു കൊല്ലം വൈകിയിട്ടാണെങ്കിലും ഇപ്പോള്‍ ഇതാ കേരളത്തിലും.

നല്ല സ്‌റ്റോറിയാണ്. വലിയ ഒരു ഫാക്ടറി, അവിടെ മൈദയും, രാസവസ്തുക്കളും. കാല്‍സ്യം കാര്‍ബണേറ്റും ഒക്കെക്കൂടി മിക്‌സ് ചെയ്ത് ചൈനക്കാര്‍ നൂറായിരം മുട്ട ഉണ്ടാക്കുന്നു. എന്നിട്ടത് ലോകം മുഴുവന്‍ കയറ്റി അയക്കുന്നു. അത് കഴിക്കുന്നവര്‍ക്ക് തല വേദനിക്കുന്നു, വയറിളകുന്നു, കുഴഞ്ഞു വീഴുന്നു, മരിക്കുന്നു,

ഈ കഥക്ക് ആകപ്പാടെ ഒരു കുഴപ്പമേ ഉള്ളൂ. ഈ പറഞ്ഞ രാജ്യത്തൊന്നും
ഒരാളും ഇതേ വരെ ഈ വ്യാജ മുട്ട കണ്ടിട്ടില്ല. പക്ഷെ അത് കണ്ടിട്ടുണ്ടെന്ന് പറഞ്ഞവരെപ്പറ്റി പലരും കേട്ടിട്ടുണ്ട്. (അതോ നമുക്കും പരമാര്‍ത്ഥമിപ്പോള്‍  അതല്ല ചോദിച്ചതറിഞ്ഞിതോ താന്‍ ?) കടിച്ച പാന്പിനെ തിരിച്ചു വിളിച്ചു വിഷമിറക്കുന്ന നാട്ടിലെ വിഷഹാരികളുടെ കഥ പോലെ തന്നെയാണിത്.

ഇതില്‍ അതിശയം വിചാരിക്കേണ്ട കാര്യമില്ല. മുട്ട എന്നത് അത്ര വലിയ
ലാഭമുള്ള ഒരു വസ്തുവല്ല. ഒരു മുട്ടക്കിപ്പോള്‍ അഞ്ചു രൂപ വില വരും. അത് വില്‍ക്കുന്ന കച്ചവടക്കാരന് അത് നാലു രൂപയ്ക്കു കിട്ടുന്നുണ്ടാവണം. അപ്പോള്‍ അതിലും വളരെ താഴ്ന്ന വിലക്ക് കൃത്രിമ മുട്ട കിട്ടിയാലേ കച്ചവടക്കാരന്‍ അത് വില്‍ക്കാന്‍ തയ്യാറാകൂ. കാരണം മായം ചേര്‍ത്തതിന് പിടിച്ചാല്‍ ജയിലിലും നാട്ടുകാരറിഞ്ഞാല്‍ അടിയും ഉറപ്പാണ്. ആ റിസ്‌ക്ക് എടുക്കുന്നതിന് ഒരു രൂപ എങ്കിലും പ്രീമിയം കിട്ടണം. അപ്പോള്‍ വ്യാജ മുട്ട നാട്ടില്‍ മൂന്നു രൂപക്ക് എത്തിക്കണം. അത് തന്നെ നമ്മുടെ തുറമുഖത്തെ കസ്റ്റംസിന്റെയും പിന്നെ നാട്ടിലുള്ള സകല ഫുഡ് സേഫ്റ്റി സംവിധാനങ്ങളുടെയും മൂക്കിന്റെ താഴെക്കൂടി വേണം കടത്തി കൊണ്ടുവന്ന് ഒരു വിപണന ശൃംഖല ഉണ്ടാക്കാന്‍. നമ്മുടെ നാട്ടിലെ ഈ വക സംവിധാനങ്ങള്‍ക്ക് എന്തൊക്കെ കുഴപ്പമുണ്ടെങ്കിലും നാല് കാശ് കിട്ടാന്‍ വകുപ്പുള്ള ഒരു കാര്യവും അവര്‍ അറിയാതെ വരില്ല. അപ്പോള്‍ അന്പതു പൈസയെങ്കിലും അവരുടെ അക്കൗണ്ടിലും പെടുത്തണം.

ഇനി നമുക്ക് ചൈനയിലേക്ക് ചെല്ലാം. കാര്യം കമ്മൂണിസമൊക്കെ ആണെങ്കിലും കാര്യങ്ങള്‍ നമ്മളുടേത് പോലെ തന്നെയാണ് അവിടെയും. വ്യാജന്‍ ഉണ്ടാക്കി കണ്ടെയ്‌നര്‍ കണക്കിന് ലോകത്ത് എവിടെയും എത്തിക്കണമെങ്കില്‍ അവിടുത്തെ സംവിധാനത്തിനും കുറച്ചു കാശൊക്കെ കൊടുക്കേണ്ടി വരും. ഇതൊക്കെ കഴിഞ്ഞിട്ട് വേണം ഈ വ്യാജന്‍ ഉണ്ടാക്കുന്നവര്‍ക്ക് എന്തെങ്കിലും ലാഭം ഉണ്ടാക്കാന്‍.

എന്നാല്‍ ഈ മുട്ടയാണെങ്കിലോ ഒടുക്കത്തെ പെര്‍ഫെക്ഷന്‍ ഉള്ള സൃഷ്ടിയും ആണ്. കൃത്രിമമായി ഉണ്ടാക്കി എടുക്കുക എളുപ്പമല്ല. നന്നായി 3ഉ പ്രിന്റ് ചെയ്യണമെങ്കില്‍ ഒരു മുട്ടക്ക് ഒരു അയ്യായിരം രൂപയെങ്കിലും വരും. അയ്യായിരം രൂപക്ക് ഒരു മുട്ടയുണ്ടാക്കി അഞ്ചു രൂപക്ക് ഇടുക്കിയില്‍ എത്തിക്കുന്നതിന്റെ ബിസിനസ്സ് മോഡല്‍ ഇപ്പോള്‍ ചൈനയില്‍ ഇല്ല. അതെ സമയം മാസ്സ് പ്രൊഡൂസ് ചെയ്യാനുള്ള സംവിധാനങ്ങള്‍ അതീവ സങ്കീര്‍ണ്ണമായിരിക്കും അതുകൊണ്ടു തന്നെ ചെലവേറിയതും. ഒരു നല്ല ഫാക്ടറി തന്നെ വേണം. അതിനു ലൈസന്‍സ് വേണം, ആധുനിക യന്ത്രങ്ങള്‍ പ്രവര്‍ത്തിപ്പിക്കുന്ന പോളി ടെക്‌നിക്കില്‍ പഠിച്ച ആളുകള്‍ വേണം. ചുരുക്കത്തില്‍ സര്‍ക്കാര്‍ അറിയാതെ നടക്കുന്ന കാര്യം അല്ല. കുടില്‍ വ്യവസായം പോലെ കോഴി മുട്ട ഉണ്ടാക്കാന്‍ പോയാല്‍ കൊഴുക്കട്ട പോലെ ഇരിക്കും.

നാട്ടിലെ കോഴിക്ക് ഇതിന്റെ ആവശ്യമൊന്നുമില്ല. നെല്ലോ തവിടോ മറ്റു കോഴിത്തീറ്റയോ തട്ടി വിടുക, ദിവസവും ആസനം തുറന്ന് ഒരു മുട്ടയിടുക. ഫാക്ടറിയും വേണ്ട, രാസവസ്തുവും വേണ്ട, കൈക്കൂലിയും വേണ്ട.

കോഴിയോട് മുട്ടയുടെ കാര്യത്തില്‍ മത്സരിക്കാന്‍ പറ്റിയ ഫാക്ടറിയൊന്നും
തല്‍ക്കാലം ലോകത്ത് ഉണ്ടായിട്ടില്ല. അത് കൊണ്ട് തന്നെ ഈ വ്യാജ മുട്ടയുടെ വാര്‍ത്ത വ്യാജമാണെന്നാണ് എന്റെ ഉറച്ച വിശ്വാസം.

ഇത് ഞാന്‍ ചുമ്മാ പറയുന്നതല്ല. കേരളത്തിലെ ആദ്യത്തെ വ്യാജ മുട്ട കണ്ടെത്തുന്‌പോള്‍ അഞ്ച് രൂപ വിലയുള്ള മുട്ട ആയിരം രൂപക്ക് വാങ്ങാന്‍ ഞാന്‍ തയ്യാറാണ്. തമിഴ് നാട്ടില്‍ വ്യാപകമായും, ഇടുക്കിയില്‍ കുറച്ചൊക്കെയും ഉണ്ടെന്നാണല്ലോ വാര്‍ത്ത. ആരെങ്കിലുമൊക്കെ ഈ ചലഞ്ച് ഒന്ന് ഏറ്റെടുക്കൂ, പ്ലീസ്.

Share on FacebookShare on Google+Tweet about this on TwitterShare on LinkedIn
(Visited 4,500 times, 1 visits today)
                     
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക