|    Jul 24 Mon, 2017 10:27 am
FLASH NEWS
Home   >  Todays Paper  >  page 7  >  

എന്താണ് ചരക്കു സേവന നികുതി ?

Published : 4th August 2016 | Posted By: SMR

ന്യൂഡല്‍ഹി: വിശാലാടിസ്ഥാനത്തില്‍ ഒരു വിനിമയ നികുതിയാണ് ഇന്നലെ രാജ്യസഭയില്‍ അവതരിപ്പിച്ച ചരക്ക് സേവന നികുതി(ജിഎസ്ടി) വിഭാവന ചെയ്യുന്നത്. നിലവില്‍ രാജ്യത്ത് കൈമാറ്റം ചെയ്യപ്പെടുന്ന ഉല്‍പ്പന്നത്തിനും സേവനത്തിനും പല തരത്തിലുള്ള നികുതകള്‍ ചുമത്തപ്പെടുന്നുണ്ട്. ചില നികുതികള്‍ കേന്ദ്ര സര്‍ക്കാരിന്റേതാണെങ്കില്‍ മറ്റു ചിലത് സംസ്ഥാന സര്‍ക്കാരിന്റേതാണ്. ജിഎസ്ടി നിലവില്‍ വരുന്നതോടെ ഒറ്റനികുതി മാത്രമായിരിക്കും ഉണ്ടാവുക. ഉല്‍പന്നങ്ങള്‍ വില്‍ക്കുമ്പോഴും സേവനങ്ങള്‍ ലഭ്യമാക്കുമ്പോഴുമാണ് ജിഎസ്ടി പ്രാവര്‍ത്തികമാവുന്നത്.
നിലവിലുളള നികുതിക്കു മേല്‍ നികുതി എന്ന അവസ്ഥ ഇല്ലാതാക്കി ഏകീകൃത നികുതി നിരക്കാണ് ജിഎസ്ടിയിലൂടെ വിഭാവനം ചെയ്തിരിക്കുന്നത്. പല കൈകള്‍ മറിഞ്ഞ് ഉപഭോക്താക്കളിലേക്ക് ഉല്‍പ്പന്നങ്ങളും സേവനങ്ങളും എത്തുമ്പോള്‍ നികുതിക്കു മേല്‍ നികുതിയും മറ്റുമായി വന്‍ നികുതിഭാരം ഉപഭോക്താവിന്റെ മേലുണ്ടാവും. ഇത് ഉല്‍പന്നങ്ങളുടെ വില കൂട്ടും.
ജിഎസ്ടി വരുന്നതോടെ ആ ഭാരം ഒഴിവാകും. കേരളം പോലുള്ള ഉപഭോക്തൃ സംസ്ഥാനങ്ങള്‍ക്ക് ഇത് ഗുണമാണ് ചെയ്യുക. ജിഎസ്ടി വരുന്നതോടെ കേന്ദ്രവാറ്റും സംസ്ഥാനവാറ്റും ഉണ്ടാകില്ല. ഉല്‍പന്നങ്ങളുടെ നികുതിയും ഒറ്റത്തവണയായി ചുരുങ്ങും. ജിഎസ്ടി വരുന്നതോടെ സെന്‍ട്രല്‍ എക്‌സൈസ് ഡ്യൂട്ടി, മെഡിക്കല്‍ എക്‌സൈസ് ഡ്യൂട്ടി, ടെക്‌സ്‌റ്റൈല്‍സ് എക്‌സൈസ് ഡ്യൂട്ടി, കസ്റ്റംസ് ഡ്യൂട്ടി, പ്രത്യേക അധിക കസ്റ്റംസ് ഡ്യൂട്ടി, സേവന നികുതി, ചരക്കുകള്‍ക്കും സേവനങ്ങള്‍ക്കുമുള്ള സര്‍ചാര്‍ജുകള്‍ തുടങ്ങിയ കേന്ദ്ര നികുതികള്‍ ഇല്ലാതാകും.
സംസ്ഥാന വാറ്റ്, കേന്ദ്ര വില്‍പന നികുതി, പര്‍ച്ചേസ് നികുതി, ആഡംബര നികുതി, പ്രവേശന നികുതി, വിനോദ നികുതി, പരസ്യനികുതി, ലോട്ടറി നികുതി, സംസ്ഥാന സെസ്സ് സര്‍ചാര്‍ജ് തുടങ്ങിയ സംസ്ഥാന നികുതികള്‍ ജിഎസ്ടിക്കുള്ളിലാവും. 2000ത്തില്‍ വാജ്‌പേയി സര്‍ക്കാരിന്റെ കാലത്താണ് ഇതിനായുള്ള ആലോചനകള്‍ നടക്കുന്നത്. ഇതിനായി പശ്ചിമബംഗാള്‍ ധനകാര്യമന്ത്രിയായിരുന്ന അസിംദാസ് ഗുപ്ത അധ്യക്ഷനായ ഒരു സമിതിയെ സര്‍ക്കാര്‍ നിയോഗിച്ചു.
പിന്നീട് യുപിഎ സര്‍ക്കാരിന്റെ കാലത്താണ് ഇതുസംബന്ധിച്ച നീക്കം ശക്തമാവുന്നത്. 2006-07 ബജറ്റില്‍ ജിഎസ്ടി സംബന്ധിച്ച് ധനകാര്യമന്ത്രിയായിരുന്ന പി ചിദംബരം പ്രഖ്യാപനം നടത്തി. തുടര്‍ന്ന് പ്രണബ് മുഖര്‍ജി ബില്ല് കൊണ്ടുവന്നു. ജിഎസ്ടി നടപ്പാക്കുമ്പോള്‍ ഉല്‍പാദനമുള്ള സംസ്ഥാനങ്ങള്‍ക്ക് നഷ്ടമുണ്ടാവുമെന്നതിനാല്‍ ചില സംസ്ഥാനങ്ങള്‍ ഇതിനെ എതിര്‍ത്തു. തുടര്‍ന്ന്, സംസ്ഥാനങ്ങളുമായി ചര്‍ച്ച നടത്തിയും ഇതിന്റെ കരടില്‍ ആവശ്യമായ മാറ്റം വരുത്തിയുമാണ് ഇതിന്റെ നടപടികളുമായി യുപിഎ, എന്‍ഡിഎ സര്‍ക്കാരുകള്‍ മുന്നോട്ടുപോയത്.
കഴിഞ്ഞ വര്‍ഷം ബില്ല് ലോക്‌സഭയില്‍ പാസാക്കിയിരുന്നു. എന്നാല്‍, ഭൂരിപക്ഷമില്ലാത്തതിനാല്‍ സര്‍ക്കാരിന് രാജ്യസഭയില്‍ പാസാക്കാന്‍ കഴിഞ്ഞിരുന്നില്ല. ബില്ല് ലോക്‌സഭയില്‍ പാസാക്കിയ ശേഷവും സംസ്ഥാനങ്ങളുടെ ആവശ്യപ്രകാരം ആവശ്യമായ മാറ്റം വരുത്താന്‍ സര്‍ക്കാര്‍ തയ്യാറായിരുന്നു. രാജ്യസഭയില്‍ പാസായെങ്കിലും ഭരണഘടനാഭേദഗതികളോടെയുള്ള ജിഎസ്ടി സമ്പ്രദായം നിലവില്‍വരാന്‍ ഇനിയും നടപടിക്രമങ്ങളുണ്ട്. ലോക്‌സഭയില്‍ പാസാക്കിയ ശേഷം മാറ്റങ്ങള്‍ വരുത്തിയതിനാല്‍ ഒരിക്കല്‍ കൂടി ലോക്‌സഭയില്‍ പാസാവണം. ശേഷം ആകെയുള്ള 29ല്‍ 15 സംസ്ഥാന നിയമസഭകളെങ്കിലും ബില്ല് അംഗീകരിച്ചു പ്രമേയം പാസാക്കണം. തുടര്‍ന്ന്, രാഷ്ട്രപതിയും അംഗീകരിച്ച് വിജ്ഞാപനം ഇറങ്ങണം.

നാള്‍വഴി

  • 2000ല്‍ വാജ്‌പേയി സര്‍ക്കാരിന്റെ കാലത്താണ് ഏകീകൃത നികുതി സമ്പ്രദായത്തെ കുറിച്ച് ചര്‍ച്ച നടന്നത്.
  • 2007ലെ ബജറ്റില്‍ അന്നത്തെ ധനമന്ത്രി പി ചിദംബരം ജിഎസ്ടി സമ്പ്രദായം മൂന്നു വര്‍ഷത്തിനകം വരുമെന്ന് പ്രഖ്യാപിച്ചു.
  • 2008ല്‍ ജിഎസ്ടി സംബന്ധിച്ച മന്ത്രിസഭാ സമിതി  കേന്ദ്രസര്‍ക്കാരിന് റിപോര്‍ട്ട് സമര്‍പ്പിച്ചു.
  • 2011 ഇതുസംബന്ധിച്ച ഭരണഘടനാ ഭേദഗതി ബില്ല് ലോക്‌സഭയില്‍ പാസായി.
  • 2013 പാര്‍ലമെന്റിന്റെ ധനകാര്യ സ്റ്റാന്‍ഡിങ് കമ്മിറ്റി വിശദമായ ചര്‍ച്ചയ്ക്കു ശേഷം റിപോര്‍ട്ട് സമര്‍പ്പിച്ചു.
  • 2014 ഡിസംബര്‍ 19: ഭരണഘടനാ ഭേദഗതി ബില്ല് ലോക്‌സഭയില്‍ അവതരിപ്പിച്ചു.
  • 2015 മെയ് 6: ഭരണഘടനാ ഭേദഗതി ബില്ല് ലോക്‌സഭയില്‍ പാസായി.
  •  2015 മെയ് 12: ബില്ല് സെലക്ട് കമ്മിറ്റിക്ക് മുമ്പില്‍
  •  2015 ജൂലൈ 22: സെലക്ട് കമ്മിറ്റി റിപോര്‍ട്ട് സമര്‍പ്പിച്ചു.
    അനുകൂലിക്കുന്നവരുടെ  വാദം
  • സാധനങ്ങള്‍ക്കും സേവനങ്ങള്‍ക്കും നിലവിലുള്ള
    പതിനഞ്ചോളം നികുതികള്‍ക്ക് പകരം ഒറ്റ നികുതി
    നിലവില്‍ വരും.
  •  രാജ്യത്ത് എല്ലാ സംസ്ഥാനങ്ങളിലും ഒരേ നികുതിനിരക്ക് വരും.
  • സംസ്ഥാനങ്ങള്‍ക്കും ഉപഭോക്താക്കള്‍ക്കും വാണിജ്യ-
    വ്യവസായ മേഖലയ്ക്കും ഇത് ദീര്‍ഘകാല നേട്ടമുണ്ടാക്കും.
  •  നികുതി നിര്‍വഹണ സംവിധാനം സുഗമമാവും.
  • നികുതി ശൃംഖല കൂടുതല്‍ വിപുലമാവും.
  • നികുതിവെട്ടിപ്പ് പരമാവധി കുറയ്ക്കാന്‍ സാധിക്കും.
  • ഉല്‍പാദനച്ചെലവു കുറഞ്ഞ് കയറ്റുമതി കൂടും.
  • സംസ്ഥാനാന്തര നികുതികള്‍ ഒഴിവാക്കുന്നതോടെ
    ഉല്‍പന്നങ്ങള്‍ക്ക് വില കുറയും.
  •  രാജ്യത്തിന്റെ മൊത്ത ആഭ്യന്തര ഉല്‍പാദനത്തില്‍ (ജിഡിപി) രണ്ടു ശതമാനം വര്‍ധനവുണ്ടാവും.
  • നികുതിക്കുമേല്‍ നികുതി എന്ന സമ്പ്രദായം ഇല്ലാതാവും.
  •  കാലക്രമേണ ചെക്‌പോസ്റ്റുകളും അപ്രസക്തമാവും.
    എതിര്‍ക്കുന്നവരുടെ  വാദം
  • വന്‍കിട ഉല്‍പാദകര്‍ക്കും വന്‍കിട വ്യാപാരികള്‍ക്കും മാത്രമായിരിക്കും ഇതുകൊണ്ട് നേട്ടമുണ്ടാവുക.
  • വില്‍പനനികുതി പിരിവില്‍ സംസ്ഥാനങ്ങളുടെ അധികാരത്തെ ഇതു ബാധിക്കും.
  • സംസ്ഥാനത്തിന് നികുതിനിരക്കില്‍ മാറ്റം വരുത്താന്‍ സാധിക്കില്ല.
  •  അന്തര്‍സംസ്ഥാന വ്യാപാരികളുടെയും കയറ്റുമതി- ഇറക്കുമതി മേഖലകളുടെയും ജിഎസ്ടി സംബന്ധിച്ച നിര്‍ദേശങ്ങളില്‍ വ്യക്തതയില്ല.
  • നികുതിദായകരെ സംബന്ധിച്ച് നികുതി അടയ്ക്കാനും കണക്ക് സമര്‍പിക്കാനും രണ്ട് അധികാരകേന്ദ്രങ്ങള്‍ ഉണ്ടാവും.
  •  പുതിയ സാഹചര്യത്തില്‍ സംസ്ഥാന നികുതി വകുപ്പുകള്‍ അഴിച്ചുപണിയേണ്ടിവരും.
                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക