|    Oct 19 Thu, 2017 10:07 pm
FLASH NEWS
Home   >  Todays Paper  >  Page 5  >  

എംഎല്‍എ ഫണ്ടില്‍ കൈയിട്ട് വാരാനുള്ള നീക്കം ഉപേക്ഷിക്കണം : ചെന്നിത്തല

Published : 8th October 2017 | Posted By: fsq

 

തിരുവനന്തപുരം: എംഎല്‍എമാരുടെ ആസ്തിവികസന ഫണ്ടില്‍ നിന്ന് ജില്ലാ കലക്ടറേറ്റിലെ ഭരണ, കൈകാര്യ ചെലവുകള്‍ക്കു എന്ന പേരില്‍ 1.25 ലക്ഷം രൂപ കൈയിട്ടു വാരാനുള്ള തീരുമാനം പുനപ്പരിശോധിക്കണമെന്ന് ആവശ്യപ്പെട്ടു മുഖ്യമന്ത്രി പിണറായി വിജയന് പ്രതിപക്ഷ നേതാവ് രമേശ് ചെന്നിത്തല കത്ത് നല്‍കി. നിയോജക മണ്ഡലത്തിലെ ആസ്തി വികസന ഫണ്ടിന്റെ നടത്തിപ്പിനു ജില്ലാ കലക്ടറെ ചുമതലപ്പെടുത്തിയതിനെ തുടര്‍ന്നാണ് ഇതു സംബന്ധിച്ച ഭരണ ചെലവുകള്‍ക്കും അടിസ്ഥാന സൗകര്യ രൂപീകരണത്തിനുമായി ഫണ്ടായ അഞ്ചു കോടി രൂപയുടെ 0.25 ശതമാനം നീക്കിവയ്ക്കാന്‍ ധനകാര്യ വകുപ്പ് ഉത്തരവിട്ടത്. മണ്ഡലത്തിലെ വികസന പ്രവര്‍ത്തനങ്ങള്‍ക്ക് അഞ്ചുകോടി രൂപ തന്നെ അപര്യാപ്തമാണെന്ന് എംഎല്‍എമാര്‍ പരാതിപ്പെടുമ്പോള്‍ അതില്‍ നിന്ന് 1.25 ലക്ഷം രൂപ ഭരണ ചെലവിനെന്ന പേരില്‍ കവര്‍ന്നെടുക്കുന്നത് അംഗീകരിക്കാനാവില്ല. ഓഫിസ് ചെലവുകള്‍ക്കു പ്രത്യേക ഫണ്ട് കണ്ടെത്തുകയോ, നിലവിലുള്ള ഓഫിസ് ചെലവുകളുടെ ഭാഗമായി ക്രമീകരിക്കുകയോ ആണു ചെയ്യേണ്ടത്. എംഎല്‍എമാരുടെ അഭിപ്രായം ആരാഞ്ഞ ശേഷമല്ല അവരുടെ ഫണ്ടില്‍ നിന്ന് കുറവുവരുത്താന്‍ തീരുമാനിച്ചത്. കലക്ടറേറ്റില്‍ ആസ്തി വികസന ഫണ്ട് കൈകാര്യം ചെയ്യുന്നതിനു പ്രത്യേക സംവിധാനം ഉണ്ടാവുന്നതു നല്ലതാണെങ്കിലും എംഎല്‍ എമാരുടെ  ഫണ്ടില്‍ കുറവു വരുത്താനുള്ള തീരുമാനം ശരിയല്ലെന്നും ചെന്നിത്തല പറഞ്ഞു.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക