|    Jun 19 Tue, 2018 6:16 pm
FLASH NEWS
Home   >  Todays Paper  >  Page 1  >  

ആര്‍എസ്എസിനെതിരായ പരാമര്‍ശം: രാഹുലിനെതിരേ കുറ്റം ചുമത്തി

Published : 13th June 2018 | Posted By: kasim kzm

താനെ (മഹാരാഷ്ട്ര): മഹാത്മാഗാന്ധിയെ വധിച്ചത് ആര്‍എസ്എസ് ആണെന്നു പറഞ്ഞതിനെതിരേ നല്‍കിയ അപകീര്‍ത്തിക്കേസില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കെതിരേ കോടതി കുറ്റം ചുമത്തി. ആഗസ്ത് പത്തിനാണ് വിചാരണാ നടപടികള്‍ ആരംഭിക്കുക. കേസ് ഇന്നലെ പരിഗണിച്ചപ്പോള്‍ കുറ്റങ്ങള്‍ അംഗീകരിക്കുന്നുണ്ടോ എന്ന് രാഹുലിനോട് കോടതി ആരാഞ്ഞിരുന്നു. താന്‍ കുറ്റക്കാരനല്ലെന്ന് രാഹുല്‍ മറുപടിയും നല്‍കി. പരമാവധി രണ്ടു വര്‍ഷം വരെ ജയില്‍ശിക്ഷ ലഭിക്കാവുന്ന വകുപ്പുകളാണ് രാഹുലിനെതിരേ ചുമത്തിയിരിക്കുന്നത്.
തനിക്കെതിരേ എത്ര കേസുകള്‍ വേണമെങ്കിലും ചാര്‍ത്താന്‍ ബിജെപിയെയും ആര്‍എസ്എസിനെയും അനുവദിക്കണമെന്നും ആശയസമരമാണ് നമ്മുടേതെന്നുമായിരുന്നു രാഹുല്‍ കോടതി ഉത്തരവിനോട് പ്രതികരിച്ചത്. ഇതിനോട് പോരാടി വിജയിക്കുമെന്നും കോടതിക്കു പുറത്ത് മാധ്യമങ്ങളോട് രാഹുല്‍ പറഞ്ഞു.
രാഹുലിന് വേണ്ടി അഡ്വക്കറ്റ് നാരായണ അയ്യരും പരാതിക്കാരന് വേണ്ടി ദര്‍ഘാല്‍ക്കറും ഹാജരായി. മഹാരാഷ്ട്ര കോണ്‍ഗ്രസ് അധ്യക്ഷന്‍ അശോക് ചവാനും പാര്‍ട്ടി നേതാക്കള്‍ക്കുമൊപ്പമാണ് രാഹുല്‍ കോടതിയിലെത്തിയത്.
2014 മാര്‍ച്ച് 6ന് ലോക്‌സഭാ തിരഞ്ഞെടുപ്പ് റാലിക്കിടെയാണ് മഹാത്മാഗാന്ധിയെ കൊന്നത് ആര്‍എസ്എസുകാരാണെന്ന് രാഹുല്‍ഗാന്ധി പ്രസംഗിച്ചത്. മഹാത്മാഗാന്ധിയെ കൊന്ന ആര്‍എസ്എസിന്റെ ആളുകള്‍ ഇപ്പോള്‍ അദ്ദേഹത്തെപ്പറ്റി പറഞ്ഞുനടക്കുകയാണെന്നായിരുന്നു രാഹുലിന്റെ പരാമര്‍ശം. ഇതിനെതിരേയാണ് ആര്‍എസ്എസ് പ്രവര്‍ത്തകനായ രാജേഷ് കുന്ദേ കോടതിയെ സമീപിച്ചത്. നേരത്തേ കേസ് റദ്ദാക്കണമെന്നാവശ്യപ്പെട്ട് മുംബൈ ഹൈക്കോടതിയില്‍ രാഹുല്‍ നല്‍കിയ ഹരജി തള്ളിയിരുന്നു. ഇതിനെതിരേ സുപ്രിംകോടതിയില്‍ ഹരജി നല്‍കിയെങ്കിലും പിന്നീട് പിന്‍വലിച്ച് വിചാരണ നേരിടാന്‍ തീരുമാനിക്കുകയായിരുന്നു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss