|    Jun 22 Fri, 2018 10:48 pm
FLASH NEWS

അയ്യര്‍മലയിലിറങ്ങിയ കാട്ടാന ജനങ്ങളെ മണിക്കൂറുകളോളം പരിഭ്രാന്തിയിലാക്കി

Published : 5th August 2017 | Posted By: fsq

 

പറളി: കഴിഞ്ഞ കുറേ ദിവസങ്ങളായി മലമ്പുഴ മുണ്ടൂര്‍ മേഖലകളില്‍ പ്രദേശവാസികളെ ഭീതിയിലാഴ്ത്തിയ കാട്ടുകൊമ്പന്‍  പറളിയിലെത്തിയത് ജനങ്ങളെ മണിക്കൂറുകളോളം പരിഭ്രാന്തിയിലാക്കി. ഒലവക്കോട് റെയില്‍വേ സ്റ്റേഷനു പിന്നാലെ വ്യാഴാഴ്ച രാവിലെ  മുണ്ടൂര്‍ ജങ്ഷനിലും എത്തിയ  കാട്ടാന ഇന്നലെ പുലര്‍ച്ചയോടെ മാങ്കുറുശ്ശി അയ്യര്‍മലയിലും എത്തി.   മാങ്കുറുശ്ശി അയ്യര്‍മലയിലെ ശിവക്ഷേത്രത്തിനു സമീപം  പുലര്‍ച്ചയോടെ കണ്ട കാട്ടാന കാടുകയറാന്‍ വൈകിയത് പ്രദേശവാസികളെ മണിക്കൂറുകളോളം മുള്‍മുനയില്‍ നിര്‍ത്തി. ജീവഹാനിയോ മറ്റു നാശനഷ്ടങ്ങളോ ഒന്നും ഉണ്ടാക്കാതെ  പ്രദേശത്തു തന്നെ തമ്പടിച്ച ആനയെ തുരത്താന്‍ വനംവകുപ്പും  തഹസില്‍ദാറും ഉള്‍പ്പെട്ട സംഘത്തിന് വൈകീട്ട് വരെ പണിപ്പെടേണ്ടി വന്നു. സംഭവമറിഞ്ഞ് തടിച്ചു കൂടിയവരെ പിരിച്ചു വിടാന്‍  പോലിസും പാടുപെട്ടു. മുണ്ടൂര്‍ വനമേഖലയില്‍ നിന്നാണ് അയ്യര്‍മല ഭാഗത്തേക്ക് കാട്ടാന വന്നതെന്ന നിഗമനത്തിലാണ് വനംവകുപ്പും പ്രദേശവാസികളും. എന്നാല്‍, കഴിഞ്ഞ കുറേ നാളുകളായി മലമ്പുഴ മുണ്ടൂര്‍ മേഖലകളില്‍ കാട്ടാനയുടെ ശല്യം  തുടരുമ്പോഴും വനംവകുപ്പ് നിസ്സഹായരാവുകയാണ്.  സംഭവസ്ഥലത്ത് മങ്കര പോലിസിന്റെ നേതൃത്വത്തില്‍ ആംബുലന്‍സ് ഉള്‍പ്പെടെ ഉള്ള സുരക്ഷാ സംവിധാനം ഒരുക്കിയിട്ടുണ്ട്. എന്നാല്‍ വൈകീട്ടോടെ കാടുകയറിയ കൊമ്പന്‍ വീണ്ടും മേഖലയില്‍ എത്തുമോയെന്ന ഭീതിയിലാണ് പ്രദേശവാസികളും വനം വകുപ്പുദ്യോഗസ്ഥരും.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss