kasaragod local

വെല്‍ഫെയര്‍ പാര്‍ട്ടി നേതാവ് എല്‍ഡിഎഫ് വേദിയില്‍; പാര്‍ട്ടി വിശദീകരണം തേടി

കുമ്പള: വെല്‍ഫെയര്‍ പാര്‍ട്ടി നേതാവ് സി അഹമദ് കുഞ്ഞി എല്‍ഡി എഫ് വേദി പങ്കിട്ടത് വിവാദമായി. ഇന്നലെ രാവിലെ മഞ്ചേശ്വരം മണ്ഡലം എല്‍ഡിഎഫ് സ്ഥാനാര്‍ഥി സി എച്ച് കുഞ്ഞമ്പുവിന്റെ പ്രചാരണ വേദിയായ കുമ്പളയിലാണ് അഹമദ് കുഞ്ഞി സംബന്ധിച്ചത്.
വെല്‍ഫെയര്‍ പാര്‍ട്ടി മുന്‍ ജില്ലാ പ്രസിഡന്റായ അഹമദ് കുഞ്ഞി ഇപ്പോള്‍ സംസ്ഥാന സമിതി അംഗമാണ്. ലീഗിലൂടെ രാഷ്ട്രീയത്തിലെത്തിയ അഹമദ് കുഞ്ഞി നിരവധി തവണ മഞ്ചേശ്വരം പഞ്ചായത്ത് പ്രസിഡന്റായും 1996 മുതല്‍ 2001 വരെ ജില്ലാ പഞ്ചായത്ത് പ്രസിഡന്റായും പ്രവര്‍ത്തിച്ചിരുന്നു. അച്ചടക്ക ലംഘനം നടത്തിയതിനെ തുടര്‍ന്ന് അഹമദ് കുഞ്ഞിയെ ലീഗില്‍ നിന്ന് പുറത്താക്കിയിരുന്നു.
പിന്നീട് സിപിഎമ്മില്‍ ചേര്‍ന്ന അഹമദ് കുഞ്ഞി മഞ്ചേശ്വരം ബ്രാഞ്ച് കമ്മിറ്റി സെക്രട്ടറിയായി പ്രവര്‍ത്തിച്ചിരുന്നു. ഇതിന് ശേഷം സലഫി പ്രസ്ഥാനത്തില്‍ ആകൃഷ്ടനായി സിപിഎം വിട്ടു. പിന്നീട് വെല്‍ഫെയര്‍ പാര്‍ട്ടിയില്‍ പ്രവര്‍ത്തിച്ചു വരികയായിരുന്നു. നിയമസഭാ തിരഞ്ഞെടുപ്പില്‍ എല്‍ഡിഎഫിനെ പിന്തുണക്കണമെന്ന് ആവശ്യപ്പെട്ടിരുന്നതായി അഹമ്മദ് കുഞ്ഞി തേജസിനോട് പറഞ്ഞു.
എന്നാല്‍ പാര്‍ട്ടി ആരെ പിന്തുണക്കണമെന്നകാര്യം ഇതുവരെ തീരുമാനമെടുത്തിട്ടില്ലെന്ന് വെല്‍ഫെയര്‍ പാര്‍ട്ടി ജില്ലാ സെക്രട്ടറി പി കെ അബ്ദുല്ല അറിയിച്ചു. പാര്‍ട്ടിയുടെ സമ്മതമില്ലാതെ എല്‍ഡിഎഫ് വേദി പങ്കിട്ടതിനെ കുറിച്ച് അഹമദ് കുഞ്ഞിയോട് വിശദീകരണം തേടുമെന്നും അദ്ദേഹം പറഞ്ഞു.
Next Story

RELATED STORIES

Share it