റെയില്‍വേ ബജറ്റ് ഇന്ന്; യാത്രാനിരക്ക് കൂട്ടിയേക്കും

ന്യൂഡല്‍ഹി: നരേന്ദ്ര മോദി സര്‍ക്കാരിന്റെ രണ്ടാമത് റെയില്‍വേ ബജറ്റ് മന്ത്രി സുരേഷ് പ്രഭു ഇന്ന് അവതരിപ്പിക്കും. കൂടുതല്‍ പദ്ധതികള്‍ പ്രഖ്യാപിക്കുന്നതിനു പകരം റെയില്‍വേയെ ശക്തിപ്പെടുത്തുന്ന നടപടികളാവും പ്രധാനമായും ബജറ്റില്‍ ഉണ്ടാവുക. യാത്രാനിരക്ക് 5 മുതല്‍ 10 ശതമാനം വരെ വര്‍ധിപ്പിക്കുമെന്നാണു സൂചന. നിരക്ക് കൂട്ടുന്നില്ലെങ്കില്‍ നിലവിലെ ഇളവുകളില്‍ മാറ്റംവരുത്തിയേക്കും.
കേരളം ഉള്‍പ്പെടെയുള്ള ചില സംസ്ഥാനങ്ങള്‍ റെയില്‍വേയുമായി ചേര്‍ന്ന് സംയുക്ത സംരംഭം ആരംഭിച്ചിട്ടുണ്ട്. പദ്ധതികള്‍ക്കാവശ്യമായ സാമ്പത്തികസഹായം നല്‍കാനും ഭൂമി ഏറ്റെടുക്കാനും ഇതുവഴി കഴിയും.
ഈ മേഖലയില്‍ പ്രധാനപ്പെട്ട പ്രഖ്യാപനങ്ങള്‍ റെയില്‍വേ മന്ത്രി നടത്തും. നിയമസഭാ തിരഞ്ഞെടുപ്പ് നടക്കാനിരിക്കുന്ന കേരളത്തെ തൃപ്തിപ്പെടുത്തുന്ന പ്രഖ്യാപനവും ഉണ്ടാവും. പുതിയ ട്രെയിനുകള്‍ പ്രഖ്യാപിക്കാന്‍ സാധ്യത കുറവാണെങ്കിലും പാത ഇരട്ടിപ്പിക്കല്‍, ഗേജ് മാറ്റം, വൈദ്യുതീകരണം എന്നീ മേഖലകളില്‍ സഹായമുണ്ടാവും.