രമേശന്‍ വധശ്രമം; മുസ്‌ലിംലീഗ് പ്രവര്‍ത്തകന്‍ കസ്റ്റഡിയില്‍

തളിപ്പറമ്പ്: സിഐടിയു നേതാവ് തളിപ്പറമ്പിലെ ഓട്ടോ ഡ്രൈവര്‍ തൃച്ചംബരത്തെ പട്ടേരി രമേശനെ വെട്ടിക്കൊലപ്പെടുത്താന്‍ ശ്രമിച്ച കേസിലെ ഒരു പ്രതിയെ കൂടി തളിപ്പറമ്പ് പോലിസിന്റെ പിടിയിലായി.
മുസ്‌ലിംലീഗ് പ്രവര്‍ത്തകന്‍ മുക്കോലയിലെ മൊട്ടച്ചി ഫൈസലി(29)നെയാണ് കസ്റ്റഡിയിലെടുത്തത്. ഇയാളുടെ അറസ്റ്റ് ഇന്നു രേഖപ്പെടുത്തി കോടതിയില്‍ ഹാജരാക്കും. 2015 നവംബര്‍ മൂന്നിന് വൈകീട്ടാണ് ടൗണില്‍ നിന്നും ഓട്ടോ ട്രിപ്പ് വിളിച്ച കൊണ്ടു പോയി ഫറൂഖ് നഗറിലെ വാട്ടര്‍ അതോറിറ്റി ഓഫിസിന് സമീപത്ത് വച്ച് രമേശനെ വെട്ടിക്കൊലപ്പെടുത്താന്‍ ശ്രമിച്ചത്. കേസിലെ മറ്റുപ്രതികളായ സാജിര്‍, റാഷിദ് എന്നിവര്‍ നേരത്തെ പിടിയിലായിരുന്നു. ഇവര്‍ക്ക് ഇതുവരെ ജാമ്യം ലഭിച്ചിട്ടില്ല.
തളിപ്പറമ്പ് സിഐ വിനോദ് കുമാറാണാ കേസ് അന്വേഷിക്കുന്നത്.