മൊബൈല്‍ ടവറിലെ ബാറ്ററി മോഷ്ടിച്ചവര്‍ പിടിയില്‍

കാലടി: കാഞ്ഞൂര്‍ ഇന്‍ഡസ് ടവേഴ്‌സ് കമ്പനിയുടെ മൊബൈ ല്‍ ടവറില്‍ സ്ഥാപിച്ചിരുന്ന 72 ബാറ്ററികള്‍ മോഷ്ടിച്ച രണ്ടുപേര്‍ കാലടി പോലിസിന്റെ പിടിയിലായി. ആലുവ വെസ്റ്റ് കുന്നത്തേരി തോപ്പില്‍ ഷാഹുല്‍ ഹമീദ്, തൃശൂര്‍ മതിലകം കൊഴുപ്പിള്ളി അന്‍സാരി എന്നിവരാണ് പിടിയിലായത്.
ശനിയാഴ്ച രാത്രിയിലാണ് മോഷണം നടന്നത്. കമ്പനിയുടെ മൊബൈല്‍ ടവറില്‍ സ്ഥാപിച്ചിരുന്ന ഷെല്‍ട്ടര്‍ റൂമിന്റെ പൂട്ട് പൊളിച്ച് അകത്തുകടന്ന പ്രതികള്‍ അടുക്കിവച്ചിരുന്ന ബാറ്ററികള്‍ മോഷ്ടിക്കുകയായിരുന്നുവെന്ന് പോലിസ് പറഞ്ഞു. പരിസരിവാസികള്‍ സംശയാസ്പദമായ സാഹചര്യത്തില്‍ വാഹനം കണ്ട് പോലിസിനെ വിവരമറിയിക്കുകയായിരുന്നു. തുടര്‍ന്ന് നടത്തിയ പരിശോധനയില്‍ മോഷ്ടിച്ച ബാറ്ററികളുമായി പോവുകയായിരുന്ന എയ്‌സര്‍ വാഹനം പിടികൂടി. കാലടി സിഐ വി എസ് നവാസിന്റെ നിര്‍ദേശാനുസരണം കാലടി എസ്‌ഐ അനില്‍കുമാര്‍, എം ജെ ബേബി, സീനീയര്‍ പോലിസ് ഓഫിസര്‍ ഉണ്ണി, ബൈജുക്കുട്ടന്‍, ബിനു, സാബു എന്നിവരും അന്വേഷണ സംഘത്തിലുണ്ടായിരുന്നു.