മല്‍സ്യബന്ധന ബോട്ട് മുങ്ങി രണ്ട് തൊഴിലാളികളെ കാണാതായി

കോഴിക്കോട്: ബേപ്പൂരില്‍നിന്ന് മല്‍സ്യബന്ധനത്തിനു പോയ ബോട്ട് ഗോവന്‍ തീരത്തിനടുത്തു മുങ്ങി രണ്ട് മല്‍സ്യത്തൊഴിലാളികളെ കാണാതായി. ചൊവ്വാഴ്ച വൈകീട്ട് മല്‍സ്യബന്ധനത്തിനു പോയ ഓഷ്യന്‍പ്രൈഡ് എന്ന ബോട്ടാണ് അപകടത്തില്‍പ്പെട്ടത്.
18 പേരായിരുന്നു ബോട്ടിലുണ്ടായിരുന്നതെന്ന് ബേപ്പൂര്‍ ഫിഷറീസ് അധികൃതര്‍ അറിയിച്ചു. ജോലിക്കാരെല്ലാം കുളച്ചല്‍ സ്വദേശികളാണ്. 16 പേര്‍ രക്ഷപ്പെട്ട് കാര്‍വാറിലെത്തിയതായാണ് വിവരം. കൂടുതല്‍ വിവരങ്ങളൊന്നും ലഭിച്ചിട്ടില്ല. മല്‍സ്യബന്ധനത്തിനുപോയ മറ്റു ബോട്ടുകാരാണു വിവരം നാട്ടില്‍ അറിയിച്ചത്. കോസ്റ്റ്ഗാര്‍ഡ് രക്ഷാപ്രവര്‍ത്തനത്തിനായി പുറപ്പെടുകയും ചെയ്തിട്ടുണ്ട്. ബേപ്പൂരുകാരായ ഏതാനും ആളുകളുടെ ഉടമസ്ഥതയിലുള്ള രണ്ടുവര്‍ഷം പഴക്കമുള്ള ബോട്ടിന് ഒരു കോടിയിലധികം രൂപ വിലവരും.