കോണ്‍ഗ്രസ് ഓഫിസില്‍ കെഎസ്‌യു സംഘര്‍ഷം

കൊല്ലം: സ്ഥാനാര്‍ഥിത്വം ലഭിക്കാതിരുന്ന ഒരു വിഭാഗം കെഎസ്‌യു പ്രവര്‍ത്തകര്‍ ഇന്നലെ ഡിസിസി ഓഫിസ് ഉപരോധിച്ചത് സംഘര്‍ഷത്തിനു കാരണമായി. ഉച്ചയോടെ ഏതാനും കെഎസ്‌യു നേതാക്കളുടെ നേതൃത്വത്തില്‍ സംഘടിച്ചെത്തിയ പ്രവര്‍ത്തകര്‍ ഡിസിസി ഓഫിസിന് മുമ്പില്‍ മുദ്രാവാക്യം വിളികളുമായി കുത്തിയിരുന്നു.  നേതൃത്വത്തിനെതിരേ മുദ്രാവാക്യംവിളിച്ച പ്രവര്‍ത്തകര്‍ ഓഫിസിലെ കസേരകള്‍ തല്ലിത്തകര്‍ക്കുകയും ചെയ്തു. കെഎസ്‌യു സംസ്ഥാന ജനറല്‍സെക്രട്ടറി കുരുവിള ജോസഫിന്റെ അനുയായികളാണു സംഘര്‍ഷം ആസൂത്രണം ചെയ്തതെന്ന് എതിര്‍വിഭാഗം ആരോപിച്ചു. ഇന്നു നാമനിര്‍ദേശപത്രിക പിന്‍വലിക്കുന്ന അവസാന ദിവസമാണെങ്കിലും നേതൃത്വത്തെ ധിക്കരിച്ചു വിമതര്‍ പത്രിക പിന്‍വലിക്കില്ലെന്ന നിലപാടിലാണ്.