കപ്പേള തകര്‍ത്ത സംഭവം: മൂന്ന് ആര്‍എസ്എസുകാര്‍ പിടിയില്‍

ഇരിങ്ങാലക്കുട: കുഴിക്കാട്ടുകോണത്ത് കപ്പേള ആക്രമിച്ച സംഭവത്തില്‍ 17കാരനടക്കം മൂന്നു ആര്‍എസ്എസുകാരെ ഇരിങ്ങാലക്കുട പോലിസ് അറസ്റ്റ് ചെയ്തു.
മാപ്രാണം കുഴിക്കോട്ടുകോണം സ്വദേശികളായ കൊങ്കയില്‍ വീട്ടില്‍ പക്കുരു എന്ന അമല്‍, മഠത്തിപറമ്പില്‍ ശബരിദാസ് എന്നിവരും കൗമാരക്കാരനുമാണ് അറസ്റ്റിലായത്. ഈ മാസം അഞ്ചിനായിരുന്നു കേസിനാസ്പദമായ സംഭവം. കപ്പേള ആക്രമിച്ച് ചില്ലുകള്‍ തകര്‍ക്കുകയും മാതാവിന്റെ പ്രതിമയ്ക്കും ദീപാലങ്കാരത്തിനും കേടുപാടുകള്‍ വരുത്തുകയും ചെയ്തിരുന്നു. പിടിയിലായ പ്രതികള്‍ ആര്‍എസ്എസ് പ്രവര്‍ത്തകരാണ്. ഇരിങ്ങാലക്കുട ഡിവൈഎസ്പി പി എ വര്‍ഗീസിന്റെ നേതൃത്വത്തില്‍ രൂപീകരിച്ച പ്രത്യേക അന്വേഷണ സംഘമാണ് പ്രതികളെ അറസ്റ്റ് ചെയ്തത്. പ്രതികളെ പിടികൂടിയ സംഘത്തില്‍ ഇരിങ്ങാലക്കുട എസ്‌ഐ എം ജെ ജിജോ, സീനിയര്‍ സിപിഒമാരായ അനീഷ്‌കുമാര്‍, അനില്‍കുമാര്‍ തൊടുപുഴ, സിപിഒമാരായ വി എന്‍ പ്രശാന്ത്കുമാര്‍, രാകേഷ് എന്നിവര്‍ ഉണ്ടായിരുന്നു.