സൗദിയുമായുള്ള ബോംബ് ഇടപാടില്‍ നിന്നു സ്‌പെയിന്‍ പിന്‍മാറി

മാഡ്രിഡ്: സൗദി അറേബ്യക്ക് ലേസര്‍ നിയന്ത്രിത ബോംബുകള്‍ വില്‍ക്കാനുള്ള തീരുമാനത്തില്‍ നിന്നു പിന്‍മാറിയതായി സ്‌പെയിന്‍ അറിയിച്ചു. 400 ബോംബുകളാണ് സൗദിക്കു വില്‍ക്കാന്‍ തീരുമാനിച്ചിരുന്നത്. ബോംബുകള്‍ യമനിലെ വിമതര്‍ക്കു നേരെ പ്രയോഗിക്കുമെന്ന ഭയത്താലാണ് ഇടപാടില്‍ നിന്നു പിന്‍മാറിയതെന്നു സ്‌പെയിന്‍ സര്‍ക്കാര്‍ അറിയിച്ചു. സ്‌പെയിനിലെ മുന്‍ സര്‍ക്കാര്‍ 2015ലാണ് സൗദിക്ക് ലേസര്‍ നിയന്ത്രിത ബോംബുകള്‍ കൈമാറാനുള്ള കരാര്‍ ഒപ്പിട്ടത്. 106 കോടി ഡോളറിന്റേതായിരുന്നു ഇടപാട്. പുതുതായി വന്ന ഇടത് അനുകൂല സര്‍ക്കാര്‍ ഇടപാടില്‍ നിന്നു പിന്‍മാറാനും പണം തിരിച്ചുകൊടുക്കാനും തീരുമാനിക്കുകയായിരുന്നു. യമനില്‍ സഖ്യസേന വ്യോമാക്രമണം നടത്തുന്നതിനെതിരേ സ്‌പെയിനില്‍ പ്രതിഷേധം ഉയരാറുണ്ട്.