സാമ്പത്തിക പ്രതിസന്ധി; സര്‍ക്കാര്‍ 1,800 കോടി കൂടി കടമെടുക്കുന്നു

തിരുവനന്തപുരം: സംസ്ഥാനത്ത് സാമ്പത്തിക പ്രതിസന്ധിയില്ലെന്നു സര്‍ക്കാര്‍ ആവര്‍ത്തിക്കുമ്പോഴും വന്‍തുക കടമെടുക്കുന്നു. ഇന്നു നടക്കുന്ന കടപ്പത്രങ്ങളുടെ ലേലത്തിലൂടെ 1,800 കോടി സമാഹരിക്കാനാണ് സര്‍ക്കാര്‍ തീരുമാനം. മുംബൈ ഫോര്‍ട്ടിലുള്ള റിസര്‍വ് ബാങ്ക് ഓഫിസിലാണ് ലേലം. റിസര്‍വ് ബാങ്കിന്റെ കോര്‍ ബാങ്കിങ് സൊല്യൂഷ്യനായ ഇ-കുബേര്‍ സംവിധാനത്തിലൂടെ ഇലക്ട്രോണിക് രൂപത്തിലാണ് ലേലത്തിനുള്ള ബിഡുകള്‍ സമര്‍പ്പിക്കേണ്ടത്. മല്‍സരാധിഷ്ഠിത ബിഡുകള്‍ രാവിലെ 10.30 മുതല്‍ 12 വരെയും അല്ലാത്തവ രാവിലെ 10.30 മുതല്‍ 11.30 വരെയും സമര്‍പ്പിക്കാം. വികസന പദ്ധതികള്‍ക്കു പണം സമാഹരിക്കുന്നതിനാണ് കടപ്പത്രം പുറപ്പെടുവിക്കുന്നതെന്നു വിജ്ഞാപനത്തില്‍ പറയുന്നു.