വിദ്യാര്‍ഥിയെ കാറിലെത്തിയ സംഘം തട്ടിക്കൊണ്ടുപോവാന്‍ ശ്രമം

മൂവാറ്റുപുഴ: മഗ്‌രിബ് നമസ്‌ക്കാരം കഴിഞ്ഞ് വീട്ടിലേക്ക് മടങ്ങുകയായിരുന്ന വിദ്യാര്‍ഥിയെ കാറിലെത്തിയ സംഘം തട്ടിക്കൊണ്ടുപോവാന്‍ ശ്രമിച്ചു. പായിപ്ര പഞ്ചായത്തിലെ മുളവൂര്‍ പള്ളി പടിയില്‍ ഇന്നലെ വൈകീട്ട് ഏഴോടെയാണ് സംഭവം.മുളവൂര്‍ മുളാട്ട് അബ്ദുല്‍ സലാമിന്റെ മകന്‍ അഫ്രിന്‍സലാം(10)നെയാണ് സാന്‍ട്രൊ കാറിലെത്തിയ മൂന്നംഗ സംഘം തട്ടികൊണ്ടു പോവാന്‍ ശ്രമിച്ചത്. മുളവൂര്‍ പള്ളിയില്‍ നിന്നും മഗ്‌രിബ് നമസ്‌ക്കാരം കഴിഞ്ഞ് തൊട്ടടുത്തു തന്നെയുള്ള വീട്ടിലേക്ക് നടന്നു പോവുന്നതിനിടെ അമ്പലം പടി റോഡിലൂടെ എത്തിയ കാറ് കുട്ടിയുടെ മുന്നില്‍ നിറുത്തിയ ശേഷം അഫ്രിനെ കാറിലേക്ക് വലിച്ചു കയറ്റുകയായിരുന്നു. ഭയന്നുപോയ കുട്ടി ബഹളം വച്ച് കുതറി മാറി ഓടി രക്ഷപ്പെടുകയായിരുന്നു. ഷര്‍ട്ടിന്റെ ബട്ടന്‍സ് പൊട്ടി ഊരിപ്പോയതു മൂലമാണ് കുട്ടിക്ക് രക്ഷപ്പെടാനായത്. പിടിവലിയില്‍ കുട്ടിക്ക് പരിക്കേറ്റിട്ടുണ്ട്. ബഹളം കേട്ട് സമീപവാസികളും മറ്റും ഓടിയെത്തിയതോടെ കാര്‍ ഓടിച്ചു പോവുകയായിരുന്നു. വെള്ള സാന്‍ട്രോ കാറിലെത്തിയവരാണ് തട്ടികൊണ്ടു പോവാന്‍ ശ്രമിച്ചത്. 6121 ആണ് കാറിന്റെ നമ്പര്‍. വിവരമറിഞ്ഞ് മൂവാറ്റുപുഴ പോലിസ് സ്ഥലത്തെത്തി അന്വേഷണം ആരംഭിച്ചു.