ലീഡര്‍ സ്‌ക്വയര്‍ കാടുകയറി അനാഥമായ നിലയില്‍

മാള: നാല് പതിറ്റാണ്ടുകാലം മാളയുടെ ജനപ്രതിനിധിയും ആഭ്യന്തര മന്ത്രിയും മുഖ്യമന്ത്രിയുമായിരുന്ന കെ കരുണാകരന്റെ ഓര്‍മ്മക്കായി സ്ഥാപിച്ച ലീഡര്‍ സ്‌ക്വയര്‍ കാടുകയറി അനാഥമായ നിലയില്‍. മുന്‍ എംഎല്‍എ  ടി എന്‍  പ്രതാപനാണ്    പൊതുമരാമത്ത് വകുപ്പിന്റെ നേതൃത്വത്തില്‍ മാള പോലീസ് സ്‌റ്റേഷനു സമീപം ലീഡര്‍ സ്‌ക്വര്‍ നിര്‍മ്മിച്ചത്. മുന്‍ മുഖ്യമന്ത്രി ഉമ്മന്‍ ചാണ്ടിയാണ്  ലീഡര്‍ സ്‌ക്വയര്‍  ഉദ്ഘാടനം ചെയ്തത് .പലവട്ടം ഇവിടത്തെ വൈദ്യുതി പണം അടയ്ക്കാത്തതിനാല്‍ അധികൃതര്‍  വിഛേദിച്ചിരുന്നു. പൊതുമരാമത്ത് വകുപ്പോ  ലീഡറിന്റെ അനുയായികളോ ലീഡര്‍ സ്‌ക്വയര്‍ സംരക്ഷിക്കാന്‍ മുന്നോട്ട് വരുന്നില്ലെന്ന് ആരോപണമുണ്ട്. ഇവിടം ഇപ്പോള്‍  കാടുകയറിയ നിലയിലാണ്.ലീഡര്‍ സ്‌ക്വയറിനോടുള്ള അവഗണന അവസാനിപ്പിക്കണം. പൊതുമരാമത്ത് വകുപ്പിന്റെ  കൈവശമായതിനാല്‍ മാള പഞ്ചായത്തിനും ഇതിന്റെ സംരക്ഷണം ഏറ്റെടുക്കാനാവുന്നില്ല. പൊതുമരാമത്ത് വകുപ്പ്  ചുമതലപ്പെടുത്തുകയാണെങ്കില്‍ ലീഡര്‍ സ്‌ക്വയറിന്റെ സംരക്ഷണം ഏറ്റെടുക്കാന്‍  തയ്യാറാണെന്ന് ഷാന്റി ജോസ് തട്ടകത്ത് പറഞ്ഞു.