മെഡിക്കല്‍ കോളജില്‍ വെന്റിലേറ്റര്‍ സ്ഥാപിക്കാന്‍ എംഎല്‍എമാരുടെ കൂട്ടായ്മ

കോഴിക്കോട്: മെഡിക്കല്‍ കോളജില്‍ വെന്റിലേറ്ററുകള്‍ സ്ഥാപിക്കുന്നതിന് ജില്ലയിലെ എംഎല്‍എമാര്‍ തങ്ങളുടെ പ്രാദേശിക വികസന ഫണ്ടില്‍ നിന്നും 1,48,50,000 രൂപ അനുവദിച്ചു. വെന്റിലേറ്ററുകള്‍ വാങ്ങുന്നതിന് ജില്ലാ കലക്ടര്‍ ഭരണാനുമതി ഉത്തരവ് പുറപ്പെടുവിച്ചു.
മെഡിക്കല്‍ കോളജില്‍ വെന്റിലേറ്ററുകളുടെ കുറവുകാരണം രോഗികള്‍ നേരിടുന്ന പ്രയാസം ജില്ലാ കലക്ടറാണ് ഡിഡിസി യോഗത്തില്‍ എംഎല്‍എമാരുടെ ശ്രദ്ധയില്‍പ്പെടുത്തിയത്.
ഓരോ വെന്റിലേറ്ററിനും 13.5 ലക്ഷം രൂപ വീതമാണ് ചെലവ് വരുന്നത്. പ്രൊജക്ട് നടപ്പില്‍ വരുത്തുന്നതിന് മെഡിക്കല്‍ കോളജ് പ്രിന്‍സിപ്പലിനെയാണ് ചുമതലപ്പെടുത്തിയിട്ടുള്ളത്.
ജില്ലാ വികസന സമിതി യോഗത്തില്‍ തീരുമാനിച്ചതുപ്രകാരം സര്‍ക്കാരില്‍ നിന്ന് ഇക്കാര്യത്തിന് തുക ചെലവഴിക്കാന്‍ പ്രത്യേകാനുമതി ലഭ്യമാക്കുകയായിരുന്നു.