മതവിദ്വേഷം വളര്‍ത്തുന്ന രീതിയില്‍ സംസാരിച്ചതിന് വെള്ളാപ്പള്ളിക്കെതിരെ കേസെടുത്തു

ആലുവ : കോഴിക്കോട്ട് ഓടയില്‍ കുടുങ്ങിയവരെ രക്ഷിക്കാന്‍ ശ്രമിച്ച് മരണമടഞ്ഞ നൗഷാദിന്റെ കുടുംബത്തിന് ധനസഹായം നല്‍കിയതിനെ വിമര്‍ശിച്ച് വര്‍ഗീയ പരാമര്‍ശം നടത്തിയതിന് എസ്എന്‍ഡിപിയോഗം ജനറല്‍ സെക്രട്ടറി വെള്ളാപ്പള്ളി നടേശനെതിരെ പോലീസ് കേസെടുത്തു. മതവിദ്വേഷം വളര്‍ത്തുന്ന രീതിയില്‍ സംസാരിച്ചതിന് ഇന്ത്യന്‍ ശിക്ഷാനിയമം 153 എ പ്രകാരമാണ് കേസ്.
വിവാദ പ്രസ്താവനയുടെ പേരില്‍ വെള്ളാപ്പള്ളിക്കെതിരെ കേസെടുക്കണമെന്ന് പതിപക്ഷ നേതാവ് വി.എസ് അച്യുതാനന്ദന്‍, കെപിസിസി പ്രസിഡന്റ് വി.എം സുധീരന്‍, ടി.എന്‍ പ്രതാപന്‍ എംഎല്‍എ എന്നിവര്‍ ആവശ്യപ്പെട്ടിരുന്നു. ഇതിന്റെ അടിസ്ഥാനത്തില്‍ ആഭ്യന്തരമന്ത്രി രമേശ് ചെന്നിത്തലയുടെ നിര്‍ദേശപ്രകാരം ആലുവ പൊലീസാണ് കേസെടുത്തത്.