മതപരിവര്‍ത്തനത്തിന് കലക്ടറുടെയും മജിസ്‌ട്രേറ്റിന്റെയും അംഗീകാരം നിര്‍ബന്ധമാക്കി രാജസ്ഥാന്‍ ഹൈക്കോടതി

ജയ്പൂര്‍: മതപരിവര്‍ത്തനത്തിന് കലക്ടറുടെയും മജിസ്‌ട്രേറ്റിന്റെയും അംഗീകാരം നിര്‍ബന്ധമാക്കി  രാജസ്ഥാന്‍ ഹൈക്കോടതിയുടെ ഉത്തരവ്. വിവാഹശേഷം ഇസ്‌ലാം മതം സ്വീകരിച്ച പായല്‍ എന്ന അരീഫയുടെ ഹേബിയസ് കോര്‍പ്പസ് ഹരജിയില്‍ വാദം കേള്‍ക്കുന്നതിനിടെയാണ് കോടതി ഇത്തരമൊരു ഉത്തരവ് പുറപ്പെടുവിച്ചത്. മതപരിവര്‍ത്തനം നടത്തുന്നതിന് കലക്ടര്‍, എസ്.ഡി.എം, എസ്.ഡി.ഒ എന്നിവരുടെ ക്ലിയറന്‍സ് നിര്‍ബന്ധമാണെന്ന് കോടതി ഉത്തരവിട്ടു.


മതപരിവര്‍ത്തനം നടത്തുന്നവര്‍ പേരു വിവരങ്ങളും മതപരിവര്‍ത്തനവുമായി ബന്ധപ്പെട്ട വിശദാംശങ്ങളും രേഖാ മൂലം കലക്ടറെ അറിയിക്കണം. ഇത് കലക്ട്രേറ്റിലെ നോട്ടീസ് ബോര്‍ഡില്‍ പതിക്കും. കലക്ടര്‍ക്ക് അപേക്ഷ നല്‍കി 21 ദിവസത്തിന് ശേഷം ജില്ലാ മജിസ്‌ട്രേറ്റ്, എസ്ഡിഎം,എസ്ഡിഒ എന്നിവര്‍ക്കുമുമ്പാകെ ഹാജരായി മതപരിവര്‍ത്തനത്തിനുള്ള കാരണമടക്കമുള്ള വിശദാംശങ്ങള്‍ അറിയിക്കണം. മതപരിവര്‍ത്തനത്തിനുള്ള എതിര്‍പ്പും ഈ അവസരത്തില്‍ വ്യക്തമാക്കാവുന്നതാണ്. മതപരിവര്‍ത്തനം നടത്തുന്ന വ്യക്തി ചേരാനുദ്ദേശിക്കുന്ന മതത്തിലുള്ള വിശ്വാസം ഡി.എം, എസ്.ഡി.എം, എസ്.ഡി.ഒ എന്നിവര്‍ക്കു മുമ്പാകെ തെളിയിക്കണമെന്നും കോടതി നിര്‍ദേശിക്കുന്നു. ഈ ചട്ടങ്ങള്‍ പ്രകാരമല്ല മതപരിവര്‍ത്തനം നടന്നതെങ്കില്‍ അതിനുശേഷമുള്ള വിവാഹത്തിനും നിയമസാധുതയുണ്ടാവില്ലെന്നും കോടതി വ്യക്തമാക്കി.