ഫോര്‍വേഡ് പ്രസ്

മാധ്യമപ്രവര്‍ത്തകരെയും പ്രസാധകരെയും ജീവഭയം വേട്ടയാടുന്നതിന്റെ ദുരന്തങ്ങള്‍ ഏറെയാണ്. ആവിഷ്‌കാര സ്വാതന്ത്ര്യത്തിനായി ഏതറ്റം വരെയും പോവുമെന്നു നാം കരുതിയ ഓക്‌സ്ഫഡ് യൂനിവേഴ്‌സിറ്റി പ്രസ് 'ദ ഹിന്ദൂസ്: ആന്‍ ആള്‍ട്ടര്‍നേറ്റീവ് ഹിസ്റ്ററി' എന്ന പ്രൗഢമായ ബൃഹദ്ഗ്രന്ഥത്തിന്റെ കോപ്പികള്‍ പള്‍പ്പാക്കി മാറ്റുകയാണുണ്ടായത്.
അത്തരമൊരു ഭീഷണിയുടെ നിഴലിലാണെന്നു തോന്നുന്നു ദലിത്- പിന്നാക്ക വിഭാഗത്തിന്റെ പ്രശ്‌നങ്ങളില്‍ ഊന്നിയിരുന്ന ഫോര്‍വേഡ് പ്രസിന്റെ മാഗസിന്‍ അടച്ചുപൂട്ടുന്നത്. സര്‍ജനായ സില്‍വിയയും കവിയായ ഐവാനും ചേര്‍ന്നു നടത്തുന്ന ഫോര്‍വേഡ് പ്രസില്‍ പ്രഗല്ഭരായ ദലിത്-ബഹുജന്‍ എഴുത്തുകാര്‍ സ്ഥിരമായി എഴുതാറുണ്ടായിരുന്നു.
2014 ഒക്ടോബറില്‍ മഹിഷാസുരന്റെ ചിത്രം കവര്‍ പേജില്‍ കൊടുത്തതു സംഘികളുടെ രോഷത്തിനു കാരണമായിരുന്നു. അതോടെ ആര്‍എസ്എസിന്റെ പോഷക സംഘടനകള്‍ രംഗത്തിറങ്ങി. മത വൈരമുളവാക്കുന്നു എന്നു പറഞ്ഞ് ആ ലക്കത്തിന്റെ കോപ്പികള്‍ വിനീത വിധേയരായ ഡല്‍ഹി പോലിസ് പിടിച്ചെടുത്തു.
സില്‍വിയയും ഐവാനും അതോടെ ഒളിവില്‍ പോവാന്‍ നിര്‍ബന്ധിതരായി. എന്നാല്‍, സുഹൃത്തുക്കളുടെ സഹായത്തോടെ അവര്‍ മാഗസിന്‍ പുറത്തിറക്കുന്നുണ്ടായിരുന്നു.
ഇനിയും മുന്നോട്ടു പോവുക അസാധ്യമെന്നു കണ്ടതിനാലാണ് ഫോര്‍വേഡ് പ്രസ് പ്രസാധനം നിര്‍ത്തലാക്കുന്നത്.