ഫുജൈറ ഇന്റര്‍നാഷണല്‍ ആര്‍ട്ട് ഫെസ്റ്റിവല്‍ 19 ന് ആരംഭിക്കും

ദുബയ്: ഫുജൈറയിലെ ആദ്യത്തെ ഇന്റര്‍നാഷണല്‍ ആര്‍ട്ട് ഫെസ്റ്റിവല്‍ ഈ മാസം 19 ന് ആരംഭിക്കും. 11 ദിവസം നീണ്ട് നില്‍ക്കുന്ന ഫെസ്റ്റിവലില്‍ 55 രാജ്യങ്ങളില്‍ നിന്നുള്ള വിവിധ കലാകാരന്‍മാര്‍ പങ്കെടുക്കും. ഫുജൈറ,ദിബ്ബ, മസാഫി, തുവൈയ്യിന്‍ എന്നീ വ്യത്യസ്ഥ പ്രദേശങ്ങളില്‍ നടക്കുന്ന ആഘോഷത്തില്‍ 600 ആളം വരുന്ന കലാകാരന്‍മാര്‍ ഒരുക്കുന്ന വിവിധ രാജ്യങ്ങളില്‍ നിന്നുള്ള നൃത്ത, സംഗീത, നാടക പെയിന്റിംഗ് പ്രദര്‍ശനം നിരവധി ആളുകളെ ആകര്‍ഷിക്കുമെന്നാണ് സംഘാടകര്‍ പ്രതീക്ഷിക്കുന്നത്.

പ്രദര്‍ശനത്തോടനുബന്ധിച്ച് നടക്കുന്ന വിവിധ മല്‍സരങ്ങളിലെ വിജയികള്‍ക്ക് ആകര്‍ഷകമായ സമ്മാനങ്ങളും നല്‍കുമെന്ന് സംഘാടക സമിതി മേധാവി അബ്ദുല്ല അല്‍ ദന്‍ഹാനി അറിയിച്ചു. ആഘോഷത്തിന്റെ ഭാഗമായി വിവിധ വേദികളില്‍ അറബ്് പരമ്പരാഗത നൃത്ത, സംഗീത വിരുന്നുകളും ഒരുക്കും. വിവിധ രാജ്യങ്ങളിലെ സാംസ്‌ക്കാരിക ചടങ്ങുകള്‍ പരസ്പരം മനസ്സിലാക്കാന്‍ വേണ്ടിയാണ്  ഫെസ്റ്റിവല്‍ ഒരുക്കുന്നതെന്ന് സംഘാടകര്‍ അറിയിച്ചു.