നിപ്പയുടെ ഉറവിടം വവ്വാല്‍ അല്ലെന്ന് പരിശോധനാ ഫലം

കോഴിക്കോട്:  സംസ്ഥാനത്ത് സ്ഥിരീകരിച്ച നിപ്പ വൈറസ് ബാധയുടെ ഉറവിടം വവ്വാല്‍ അല്ലെന്ന് പരിശോധനാ ഫലം. ഭോപ്പാലിലെ നാഷണല്‍ ഇന്‍സ്റ്റിറ്റിയൂട്ട് ഓഫ് ഹൈ സെക്യൂരിറ്റി അനിമല്‍ ഡിസീസില്‍ നടത്തിയ പരിശോധനാ റിപ്പോര്‍ട്ടിലാണ് കണ്ടെത്തല്‍. ചെങ്ങരോത്തെ കിണറ്റില്‍ നിന്ന് പിടിച്ച വവ്വാലുകളുടെ സാമ്പിളുകളാണ് പരിശോധിച്ചത്. നിപ്പ വൈറസ് ആദ്യം റിപ്പോര്‍ട്ട് ചെയ്ത പേരാമ്പ്രയിലെയും പരിസര പ്രദേശങ്ങളിലെയും വവ്വാല്‍, പന്നി, കന്നുകാലികള്‍, ആട് എന്നിവയുടെ 21 സാമ്പിളുകളാണ് പരിശോധനയ്ക്ക് അയച്ചത്. വവ്വാലിന്റെ മൂന്നു സാമ്പിള്‍, പന്നിയുടെ എട്ട്, കന്നുകാലിയുടെ അഞ്ച്, ആടിന്റെ അഞ്ച് എന്നിങ്ങനെയാണ് അയച്ചത്. ഇവയുടെ പരിശോധനാ ഫലവും  നെഗറ്റീവാണ്. വൈറസ് ബാധയുടെ ഉറവിടം കണ്ടെത്താന്‍ കൂടുതല്‍ പരിശോധനകള്‍ വേണ്ടിവരുമെന്ന് മൃഗസംരക്ഷണ വകുപ്പ് അറിയിച്ചു.