നാഗ്പുരില്‍ മുത്തശ്ശിയെയും കൊച്ചുമകളെയും കഴുത്തറുത്തു കൊലപ്പെടുത്തി

നാഗ്പുര്‍: മഹാരാഷ്ട്രയിലെ നാഗ്പുരില്‍ മാധ്യമപ്രവര്‍ത്തകന്റെ അമ്മയും മകളും കഴുത്തറുത്തു കൊല്ലപ്പെട്ട നിലയില്‍. നാഗ്പുരിലെ നദിക്കരയിലാണു പ്രാദേശിക പത്രലേഖകന്‍ രവികാന്ത് കംബ്ലയുടെ മാതാവ് ഉഷ കംബ്ല(52)യുടെയും ഒരുവയസ്സുകാരിയായ മകള്‍ രാഷിയുടെയും മൃതദേഹങ്ങള്‍ കണ്ടെത്തിയത്. ഇരുവരെയും ശനിയാഴ്ച മുതല്‍ കാണാതായിരുന്നു.സംഭവത്തില്‍ പവന്‍പുത്ര സ്വദേശിയായ ഗണേഷ് ഷാഹു (26)നെ അറസ്റ്റു ചെയ്തിട്ടുണ്ട്.



ഉഷ പണം പലിശയ്ക്കു കൊടുക്കാറുണ്ടായിരുന്നു.ചിട്ടിക്കാശുമായി ബന്ധപ്പെട്ട ഉഷയും ഷാഹുവും തമ്മില്‍ തര്‍ക്കമുണ്ടായിരുന്നുവെന്നും ഇതേത്തുടര്‍ന്നാണു കൊലപാതകമെന്നും ജോയിന്റ് കമ്മിഷണര്‍ ശിവജി ബോട്‌കെ പറഞ്ഞു. പെട്ടെന്നുണ്ടായ ദേഷ്യത്തില്‍ ഉഷയെ തള്ളിയിട്ട ശേഷം ഷാഹു കഴുത്തുമുറിക്കുകയായിരുന്നു.രാഷി കരഞ്ഞതിനെ തുടര്‍ന്നാണ് അവളെയും കൊലപ്പെടുത്തിയത്. പിന്നീട് ഇരുവരുടെയും മൃതദേഹങ്ങള്‍ ചാക്കില്‍ക്കെട്ടി നദിക്കരയില്‍ കൊണ്ടിട്ടതെന്നും ബോട്‌കെ പറഞ്ഞു.